我知道坊間有啲公司會推出「員工推薦獎勵計劃」，只要成功介紹朋友入嚟公司做，咁你就會攞到獎金，我女友做retail sales，佢公司就係咁，而且獎金都唔少㗎，又冇上限，如果佢keep住介紹朋友入職真係可以月月出bonus。
我唔係做Sales，公司亦冇呢類現金獎勵計劃，但係老細同department head都成日鼓勵同事介紹朋友，坦白講，我當時連試用期都未過，阿頭係咁嗌我搵朋友入嚟做，個感覺係幾安全嘅，換言之阿頭唔會喺試用期郁我，又預咗我會長做囉！
做落就會發現呢度好多同事都係藤掕瓜，瓜掕藤，例如隔籬位嘅Lucia同Tiffany係識嘅，原來佢兩個係大學同學，然後Account個Iris又同Admin個Grace係朋友，IT仲誇張，一個部門裡面有4個人係舊公司同事，佢哋一個介紹一個咁入咗嚟做，所以我好快就學識一樣嘢，就係唔好隨便講人壞話，因為阿A可能係識阿B，阿B又識阿C，office個關係圖千絲萬縷。
起初我好羨慕佢哋，特別係食lunch同放工嗰陣，一個二個行「孖必」或者係一大夥人咁樣，永遠唔會有人落單，有邊個返工唔想咁吖，起碼冇咁悶冇咁戇居吖嘛！
返咗一個半月，阿頭已經問咗我最少5次：「有冇朋友介紹呀？」你諗下，個半月都係得6個禮拜，佢問咗我5次咁多，計落差唔多平均一個星期問一次，頻密程度可想而知。
我：「我都想介紹朋友入嚟做呀，不過班friend個個有著落，冇人搵緊工呀！」
阿頭：「唔一定要friend㗎，你介紹朋友個朋友都得，介紹舊同事又得，介紹親戚一樣咁歡迎，係咪嫌公司冇介紹費先？」
我：「傻啦，介紹工都係幫人啫，有介紹費係bonus，冇都可以當幫朋友。」
阿頭：「啱呀！咁你有冇兄弟姊妹呀？阿哥細佬家姐細妹都得㗎喎！」
我：「冇呀，我係獨生子，哈哈！」
阿頭：「唔緊要，你睇下有冇啦！」積極到咁嘅地步，唔知以為佢sell緊保險，想我介紹親戚朋友買。
講真我係有留意過身邊人需唔需要搵工，最大原因唔係想滿足阿頭要求，而係我都想有friend一齊做嘢，有個伴咁囉，公司啲人個個三五成群，我有時夾硬痴埋去一齊食lunch，成餐飯好似局外人咁，係有少少無癮。
後來有一次，我聽到阿頭捉住隔籬位個Lucia係咁訓話：「點搞㗎？Tiffany係咁請星期五同星期一，連續幾個星期係咁喇喎，下下都搞到連放3至4日，你都知星期一例牌最多嘢做㗎啦，你話一話你個friend啦！」
又有一次，我聽到另一team嘅阿姐發爛渣：「Joyce，搵唔搵到Flora啫？辭職還辭職吖，可唔可以做好晒啲嘢先呀？我好得閒幫佢執手尾呀？我打畀佢又唔聽電話，WhatsApp又唔覆，試下用你電話打，check下佢係咪特登避我。」
嘩！好恐怖喎！叫同事打去check個friend係咪特登避聽？咁如果Flora真係選擇性唔接阿姐電話，而Joyce打去係通，之後個局面會點呀？Flora就話辭咗職啫，Joyce仲生勾勾喺度返工喎，你叫佢之後點面對呢？
相類似嘅事件喺office裡面已經發生過幾次，例如阿A遲到，就一定會有人走去鬧唔關事嘅阿B：「你叫你個friend準時啲啦，下下返9:30！我費事講佢呀，佢係你舊同事吖嘛，你叫佢醒醒定定啦！」
有個再癲啲，因為涉事嘅係兩姐妹，個阿head咁樣同個家姐講：「你哋係親生姐妹吖嘛，點解差咁遠嘅，大嘅做嘢明明好ok，細嘅就次次都一鑊粥，你細妹真係大學畢業？我見佢一封email都串錯幾隻字喎！」
雖然個阿head係嗰種老油條，明明係畀說話人聽又笑住講，不過你咁樣話阿妹，作為家姐都好難做，你想對方點回應吖，唔通話「係呀，我個妹廢㗎！」定係為個妹同你反面呢？結果個家姐聽完就好無奈咁話：「好，我返去會話下佢㗎喇！」
藤掕瓜，瓜掕藤，絕對唔係想像中咁過癮，一個人犯錯，又或者高層睇唔順眼，嗰位介紹人都會被興師問罪，似足古代唔關事都要誅九族咁樣，假設我介紹人入嚟，做好本份原來未夠，仲要你個friend或者親戚朋友一齊醒醒定定先得，諗起都大壓力，咪預我，我絕對唔會介紹friend入自己公司，盞搞！ （完）
我哋YouTube聽晚又有新一集喇，上星期嗰集睇咗未㗎？
【辦公室性騷擾】配匙入女下屬屋企偷底褲趁公司冇人聞高踭鞋
