收到個inbox係講求職者唔應該1st in就問人工，容許我喺度公開作答，目的唔係要批判，而係唔少人都有相同疑問，純粹分享睇法。
Client搵headhunt請人，會同我哋講明個position人工上限係幾多，不過求職者自己send CV出去apply嘅時候，唔知道對方公司肯畀咩價位係好正常，加上唔少人未必會填expected salary，又或者填negotiable，以致見工後先發現間公司根本出唔起價。
個人認為去interview開心見誠討論人工係好合理，不嬲唔鍾意壓價，我要20K，你話淨係出得起18K，根本冇傾落去嘅必要，呢個係誠意問題，而且係雙向，interviewer會睇求職者嘅誠意，求職者同樣需要睇公司嘅誠意。
我都聽過客人講：「人工只係一部分啫，仲要視乎公司嘅前景同埋發展吖嘛。」
唔係話前景同埋發展唔重要，只係對於打工仔而言，返工最主要目的係賺錢，衣食住行柴米油鹽樣樣都係錢，我都好有誠意買新鴻基啲樓，差少少首期你賣唔賣比我？
好多人計算interview嘅成本就係搭兩程車來回幾廿蚊，如果你待業的話，勉強嚟講都算係嘅，不過假設你有份工在身，要請假先可以見到工，成本就包括埋你一日人工，有2nd in就係兩日人工，即使係扣AL都係一個成本，AL都係錢。
求職，問人工待遇，係現實最基本，上到嚟見工都唔問，請問幾時問先恰當呢？係咪請咗一兩日假甚至resign完先問你人工就稱之為大體？
生我出嚟個老母有時都同我講錢啦！呢個社會得一種人係唔同你講錢，最鍾意講夢想、抱負、遠景，呢種人就係做傳銷班hihi，但只限於佢sell你入會嘅初期，之後佢唔止同你講錢，仲會呃你啲錢，真小人同埋偽君子，你揀邊樣？
所以請換個角度去睇一啲同你傾人工待遇嘅求職者，起碼證明咗一樣嘢，就係呢啲求職者係正常人，唔係傻hi。