噚晚通宵睇住警總門口同埋灣仔一帶嘅直播，6點鐘先至上床，小睡片刻又要起身開工。
隔離組個同事就繼續遲大到，佢平時最低消費都10點幾先返工，有時唔知醒就索性請半日假或者全日假，佢阿姐會黑面，但唔會炒，因為同組啲人更廢，而且成日遲到呢位同事把口係ok嘅，其他時候都氹得人幾開心，喺公司好多friend。
正如我所講，呢位同事份人冇乜嘢，仲同我幾好傾（梗係啦！都唔同team，影響唔到我吖嘛），佢都好憎自己成日遲到，有一次好認真咁問我：「有咩方法可以唔賴床，迫自己早起身準時返工呀？」
坦白講，我以前同佢一模一樣，10個鬧鐘都嘈唔醒，幾個friend打嚟morning call都照翻瞓，前一晚早瞓又好，夜瞓又好，根本冇分別。
呢幾年，我開始唔使鬧鐘喇，12點瞓，又係7:30am起身，凌晨兩三點瞓，又係7:30am起身，今朝6點瞓，都係7:30am起身，我終於明白叫醒一個人嘅唔係鬧鐘，係責任感，係生活嘅壓力。
可能我同事仲未感受到呢股生活壓力，所以我冇咩方法可以提供畀佢，或者佢可以考慮下返shift嘅工，例如返23:45會唔會舒服啲？咁就唔使驚瞓過龍啦！我亦建議佢睇多幾次噚晚一位阿sir返工嘅片段，嗰種千軍萬馬突圍而出都要返工嘅精神，係我哋每一個打工仔嘅榜樣。