早幾日，細佬奉阿媽之命拎咗一大袋糭過嚟，數唔到有幾多隻，唔想數，亦唔敢數，總之呢排早午晚三餐都會食糭，保守估計可以食兩個星期。
細佬拎嚟嗰陣仲話：「記得過兩日先擺落雪櫃，你阿媽話要回油。」
我：「不如我將啲糭『回郵』寄返畀你仲好啦！」
今日放假，有兩個朋友話要去我屋企，仲問附近有咩好食，我心中暗喜：「你哋上嚟先啦！」
門鐘響，唔覺意偷笑咗一下，開門熱烈歡迎兩位貴賓，其中一個連hello都未講，已經舉起佢手上一個裝住3隻糭嘅膠袋：「喂！特登拎咗我阿媽包啲糭畀你試，成隻都係肥豬肉呀，慢慢嘆唔使感動。」
真係一山還有一山高，未出招就畀佢完全封阻，如是者，我屋企而家又多咗3隻糭。
拎糭嚟呢位朋友話，如果地獄廚神有世界排名，佢阿媽應該會長期穩佔三甲，平時喺屋企食飯已經到達一個生無可戀嘅地步，經典嘅暗黑料理多到可以出書，最近一次係蒸魚，當阿媽由廚房拎出嚟擺上枱嗰一眼，佢見到已經想喊。我話蒸魚應該好穩陣，問佢係咪未熟，我朋友話食唔出，只係覺得成條魚都係紹興酒味同橄欖油味，原來佢阿媽話怕腥，用紹興酒浸咗條魚兩粒鐘，後來又發現唔記得落油，蒸到後段再淋啲橄欖油。
我：「你肯定自己係親生？」
佢答：「應該係，但曾經都懷疑過。」
另一個朋友喺度大笑，我哋問佢阿媽廚藝好唔好？佢話唔算太好，但因為阿媽已經過身，所以好掛住阿媽煮嘅所有食物，每逢去人哋屋企「痴餐」就會諗起以前一家人食飯嘅日子。
聽完佢咁講之後，我分咗5隻媽媽糭畀佢拎走，原來我好幸福，起碼仲可以食到阿媽整嘅嘢，有好多人已經冇呢種機會，所以真係要好好珍惜，味道只係錦上添花，家人齊齊整整先係重點。
佢哋走咗之後，又得返我一個人喺屋企，叮咗一隻媽媽糭（細啲嗰隻），仲有一隻朋友阿媽糭（長身嗰隻），人情味搭夠，我食到老人家嘅心意。