承接噚日個主題，今日繼續講埋落去。同事佐藤嘅舊office環境，同我而家個office好相似，辦公室裡面有廁所、浴缸、廚房，唔係pantry，係有晒煤氣爐嗰種，其實我初初都唔習慣，當時細佬幫手睇咗20間office左右，分佈於唔同地區，但都係呢種格局。
後來我細心研究，都只能怪自己日本間公司規模唔夠大，職員唔夠多，如果我哋需要嘅面積大啲，絕對有又靚又正統嘅辦公室可以揀（當然租都會貴啲），所以我哋只可以喺相對上細嘅辦公室或者shared office埋手。
東京嘅shared office唔多抵租，100呎鬆啲已經要13萬日圓左右，大約7千幾港幣，而家yen跌咗咋，當初租嗰陣仲係1對6點幾㗎！後來細佬搵到一間六本木嘅獨立office，面積大好多，擺晒枱可以坐到6-8個人，仲有個area擺梳化同枱傾偈食飯飲咖啡，平過shared office同埋Co-working space，咁梗係即刻租啦！
我試過喺公司樓下望過，4樓以下基本上全部有人「住」，因為個露台晾晒衫，高層嘅單位就真係office喇，我嗰層幾個單位都掛晒水牌，有建築材料公司，亦都有稅理士辦公室，so far都正正常常。
離咗題走去講東京office行情，講返佐藤辭職單嘢先，舊老細除咗用拖鞋打佢個頭之外，平時仲有好多尖酸刻薄同埋人身攻擊嘅說話，其實喺日本職場嚟講，我諗呢啲都唔係咩新聞，而且舊老細唔止對佢一個員工係咁，眼見同事同埋自己先後提出辭職都被留難，佢最終決定搵「退職代行」。
我：「搵人幫你辭職，其實要幾多錢？」
佐藤：「最後要6萬幾yen，仲可以用信用卡分期。」
當佢60,000 yen，即係3千幾港幣，坦白講冇我想像中咁貴。
我：「真係咩都唔使自己跟進？」
佐藤：「基本上唔使，我委託嘅代理會協助完成，我唔使再同舊公司聯絡，幸運地，過程中冇牽涉其他法律問題，否則就唔止呢個價錢，其實舊公司都怕麻煩。」
我：「咁啲假期呀，reference letter呀，仲有其他文件手續呢？」
佐藤：「代理會幫我同舊公司傾，會扣埋啲假，文件都會全部備妥，至於一啲職員證同埋鎖匙嘅物件，我只要喺限期前郵寄返去舊公司。」
我：「完全冇麻煩事？」
佐藤：「有，如果用呢種服務辭職，原則上好難喺同一個行業再搵工作。」
果然冇咁簡單，辭職可以批畀你，但係舊公司會視佐藤為「社会的マナーがない非常識な人と認定」（沒有社交禮儀），同埋「自分勝手な行動で職場に迷惑をかけている」（佢嘅自私行為令公司添麻煩），所以喺日本有好多打工仔都遇到佐藤嘅情況，不過係咪個個都搵代理幫手辭職呢，咁又係另一回事，唔係捨唔捨得畀幾萬yen出嚟嘅問題，係會擔心舊公司報復。
日本嘅黑心公司絕對唔少，否則呢度嘅職場亦唔會衍生出「社畜」一詞，但最黑暗嘅係，日本坊間曾先後有幾個網站記錄黑心公司名稱與及事例，結果都因為不敵大財團嘅打壓同埋法律行動，令呢啲網站最終消失得無影無蹤。
我唔知自己喺呢度開公司會唔會成功，因為日本同事話我嘅工作方式同佢哋以前有好大分別，首先我好憎開會，而佢哋以前係每日都要開會，我亦唔需要佢哋mark低每個鐘做啲乜，與其花時間砌KPI呢啲門面嘢，不如落手落腳做啦！
我嚟咗東京兩個月，印象中已經打咗兩至三次風，我會喺打風前一晚叫佢哋第日work from home，幾位日本同事都覺得好驚訝，以前佢哋係打風冇交通工具，都要喺JR等列車重開，其實同事有啲誤會，因為我仲未畀鎖匙佢哋，如果打風都要返工……我咪要返去開門囉😅
仲有一件事我好唔習慣，就係麻煩唔使見親我都鞠晒躬，easy啲就得㗎喇，掛名係社長啫，其實我公司好濕鳩，敬語亦無須講究，我日文程度未去到咁細緻，最緊要大家做得開開心心。
我：「佐藤，辭職可以搵人代行，咁公司炒人可唔可以搵人代行？」
佐藤：「點解？」
我：「對於你個踢波group……我唔係好滿意。」
佐藤：「社長，我仲有個散步group，大家約埋喺公園散步，有男有女，下次叫埋你去。」
散步group我就未join，因為東京呢個星期天氣麻麻，早兩日仲得13度，但我就第一次搵咗家政婦幫手執屋清潔，下星期再分享。
少少資料補充，其實日本已經有「一般社團法人日本退職代行協會」，因為過往有人搵代理幫手辭職嘅時候，往往會出現代理人冇律師資格，結果幫唔到人辭職，仲令到個客要賠錢畀舊公司。
佐藤搵邊間公司同邊個機構代辦，我冇問得好詳細，但係見到日本開始有呢啲服務去協助打工仔，講到尾都係一件好事，希望舊公司唔會作出更多報復行為，更希望我喺日本開公司嘅期間，唔會有員工搵「退職代行」向我辭職，幾萬yen你畀人賺，不如益我仲好啦！