我條team之前個Manager係英國人，佢份人超級nice，好鍾意開玩笑，所以一年前佢決定辭職話要返去Stockport嘅時候，成班同事都非常唔捨得，我哋仲約好咗遲啲要飛過去搵佢，可想而知彼此嘅情誼有幾深。
後來有個香港人接替佢個位，冇咁nice，但係都正正常常啦，做嘢啫，上司同下屬唔需要打成一片嘅，最緊要唔好互相為難已經好好㗎喇，不過呢個Manager做咗唔夠半年就辭職，話搵到另一份工喎，然後我哋就有3個月時間冇人lead住冇王管。
聽講搵極都搵唔啱心水，卒之公司要出錢用headhunt，獵頭直接喺英國搵咗個candidate仲請埋，我哋心中暗爽，因為之前個英國Manager太好喇，所以新阿頭又係來自英國，大家都滿心期待，可惜個反差就相當之大。
呢個新Manager其實係蘇格蘭人，佢叫Sean，之前一直喺倫敦工作，佢好嚴肅，咩都揸到正，如果喺做嘢嘅角度出發，其實呢位新阿頭係完全冇問題，只不過之前嘅英國Manager太friendly喇，所以同事最初期望咁大，結果就失望更大。
舉個例，新Manager阿Sean會捉同事嘅英文grammar，我哋最初send email出去，10次有8次都畀佢鬧，不過你話阿Sean咁嚴格係錯咩？其實又冇錯㗎喎，同事英文唔好，錯grammar的確會影響自己同埋公司形象，所以我會抱正面心態去睇，假設畀阿Sean捉到，我咪當係上英文堂囉，有個鬼佬親自指導喎，直頭袋錢入你袋啦！
都係嗰句，之前個英國Manager太nice太寬鬆喇，Sean嘅管理模式同埋做事風格令到個別同事好反感，特別係成日畀佢捉到錯grammar嘅兩位女同事。
「呢條友真係勁煩囉！講真，你覺得我哋啲客英文又好好咩，明就得㗎啦，係咁捉啲文法，嘥晒啲時間。」
「咪係，扮晒嘢，上次請假仲問長問短，以前幾個（佢指以前嗰幾個阿頭）都唔會咁，新官上任三把火，揸住雞毛當令箭。」
呢兩個女同事講嘢特登唔用任何英文字，例如Manager，佢哋會話以前嗰個，Sean更加唔會講出口，只係會用「呢條友」，grammar就轉返做中文講「文法」，因為Sean係冇房坐，直接喺我哋後面，佢哋唔想阿Sean聽到，所以講嘅時候仲會冇語氣、扮傾公事、扮笑住講其實用詞係鬧緊Sean。
兩個女同事用「笑住鬧」嘅方法討論阿Sean係每日嘅家常便飯，有次啱啱畀人鬧完，可能係谷住道氣，佢哋仲會笑住爆粗。
「CLS！其實佢係咪離鄉別井冇老婆慰藉，谷埋谷埋好多火呀？谷住就落蘭桂坊或者叫雞出火啦，日日返嚟黑口黑面，DLLM欠咗佢條仆街咩！」
「你點知佢冇叫雞呀？鬼佬最濫㗎啦！喂，佢不如唔L好喺度做啦，咁L鍾意捉人啲英文，點解唔去教書啫，真係On99！」
講真佢兩個鬧阿Sean我都聽到煩，但係今次唔同，因為突然聽到阿Sean講中文，口音當然唔算正啦，但隻隻字都聽得好清楚。
Sean：「唔好講粗口，respect，respect你自己，respect我，同你講grammar錯，我為你好。」
今次輪到我心裡面講英文，Oh My God！點解阿Sean識講中文㗎，雖然句子唔算連貫，但都好犀利喎，最恐怖係原來阿Sean識聽，唔止粗口，佢連同事鬧佢捉grammar都知，即係連「文法」呢個中文詞語都知點解啦！
兩個女同事嚇到O晒嘴，唔敢再講嘢，不過阿Sean仲補多句。
Sean：「我老婆係香港人，廣東話我識。」
Oh！呢鋪真係玩完，自從呢次之後，我個部門就日日都靜過圖書館，特別係嗰兩位女同事，好驚阿Sean會秋後算帳，而家返工純過小綿羊，莫講話呻或鬧，佢兩個直頭唔敢再傾計，好似做緊默劇啞咗咁，好在我之前冇參與咋，否則真係有得震冇得瞓。
後來嗰兩個女同事唔知點解諗到開假account去check阿Sean嘅LinkedIn，原來呢位Manager雖然係由獵頭喺倫敦搵返嚟，不過佢喺英國工作之前，其實曾經喺香港做嘢做咗6年，所以娶咗個香港人做老婆真係冇咩咁出奇，就算唔係老婆教，之前喺香港6年咁耐，同事或者工作夥伴都會教佢廣東話啦！
所以成件事嘅關鍵唔係先入為主覺得鬼佬一定唔識中文，而係喺職場講人壞話呢啲嘢可免則免，諗起阿Sean原來一直聽得明，結局好似唔意外，但我都替嗰兩位女同事心寒。