星期六日講下日本職場，有冇興趣？話說我有個日本同事叫佐藤，佢同我有共同話題，就係大家都鍾意足球，不過佢狂熱啲，總共join咗3個收費電視台睇波，我作為一個前體育記者，嚟到呢度都係join咗兩個台啫，最近直頭想cut添！
喺日本你想睇晒四大聯賽同歐洲賽嘅足球轉播，咁你就要裝ABEMA、DAZN、WOWOW，睇德甲仲要另外喺露台裝隻鑊，呢啲都算喇，話說英超嘅轉播權落喺ABEMA手上，佢哋唔係好似香港嘅NOW咁樣場場播晒，咁播咩呢？個個星期只會播阿仙奴同埋白禮頓。
只播阿仙奴同白禮頓嘅原因係，前者有冨安健洋，後者有三笘薫，兩位都係日本球員，我當然理解呢個行為啦，自己球員自己撐，呢樣直頭係Appreciate，不過上星期曼城對曼聯呢啲大戰……有冇可能冇直播呀？成場波好似唔存在一樣，肯另外再畀錢都冇得睇🤦🏻♂️
講返我個同事佐藤，佢除咗裝晒啲收費電視台睇波，仲會搞一啲踢波group，每個星期日聚集一大班人去踢波，由於冇年齡同性別限制，幾廿歲後生仔又有，40幾歲阿叔又有，連女仔都有，冇錯呀，係㗎妹呀！
去踢波班女仔又係咩年紀呢？師奶有，後生女又有喎，當然你唔好預期係新垣結衣或者綾瀨遙咁靚啦，不過都唔差嘅，起碼唔係豬西火雞批先，有個廿幾歲嘅女仔未換波衫前仲要係文青打扮，完全睇唔出佢會嚟呢度踢波。
作為成個group裡面唯一嘅香港人，我都好開心可以參與，因為佢哋踢完波之後仲會去食嘢聯誼，最難捱反而係一開始去到球場，因為你首次參與，成班人係要圍個圈聽你介紹自己，我用非常爛嘅日文自我介紹，緊張過當年見工。
臨開波之前佐藤同我講：「差啲唔記得，因為呢度有女仔，所以我哋嘅規例係唔可以剷波，唔可以攔截，同埋唔可以勁射。」
當然啦，佐藤係用日文講，我只係將佢譯返做中文打出嚟。
我：「唔可以攔截……冇問題，但係點為之勁射？」我以極爛嘅日語問返佢。
佐藤：「要好細力咁射囉！」
大佬呀！時速幾多公里為之勁先，計唔計埋風速？咩叫好細力咁射呀？你射一次嚟睇下先啦！射吖！射出嚟吖！
結果我成場波都冇射，做咗不射男，行行企企，逗住逗住交波就算，有得踢冇得射，我究竟做咗啲乜？反而個文青㗎妹一個人入咗4球，梗係啦，每次佢起腳射波，負責守龍個阿叔都唔飛唔撲，嘩，咁樣溝女都得㗎咩？
我：「佐藤，咁樣踢波唔過癮喎！有冇正常少少嘅踢波group呀？」
佐藤：「之前我哋冇呢個規例，不過有一次，有個男仔射波省中個女隊員，搞到人哋喊住退出，然後我哋就唔畀勁射喇，或者你試下攞角度，細細力攞角度……」
其實佐藤平時畀到我好多創作靈感，由interview開始已經充滿故事，佢對上一份工之所以唔做，係因為成日畀社長鬧，仲要畀人用拖鞋打頭。
我：「點樣用拖鞋打頭？」
佐藤：「我哋公司係嗰種住宅改建嘅office，門口都有個玄關位，同事會除鞋換拖鞋先入去，我達唔到公司個目標，所以成日畀社長用拖鞋打我個頭。」
題外話，我而家公司個office都係住宅改建，相信個結構同內部環境同佐藤舊公司好相似，不過我唔會換拖鞋。
我：「咁又真係幾過份，我見你辭職冇幾耐，咁你遞信嘅時候有冇再畀社長用拖鞋打頭？」
佐藤：「我唔係自己辭職。」
我：「解僱？」
佐藤：「我意思係搵人幫手辭職，唔係自己向社長講。」
原來佐藤喺舊公司已經多次遞信resign，不過次次都被留難，最終要花錢搵「退職代行」搞掂。
Sorry，英超就開波，我join咗個ABEMA但係冇得睇車路士，上網搵搵link先（慘），明日再續。