公司IT同事Justin真係一個搵錢奇才，首先佢除咗正職之外，一向都有幫人寫網站同埋寫App做Freelance，我之前有個朋友要寫App都介紹咗畀Justin，出嚟嘅效果都完全符合我朋友要求，加上follow up得好好，難怪佢出面啲job多到做唔晒。
Justin嘅IT Freelance收入一定多過公司份正職，不過最近先知佢原來大小通吃，而且都幾踩界，事緣我搵佢傾公事嘅時候，發現Justin喺個位係咁對住部電話嘟八達通，枱面亦有3張八達通卡，咁我好自然就問佢搞咩啦！
Justin：「等等先，拎埋啲消費券再同你講，等多陣，幫緊你幫緊你。」
我：「搞咩咁多張？幫老豆老母拎呀？」
Justin：「我老豆老母好醒㗎，自己識得攞，我幫Derek佢哋拎消費券之嘛！」
我哋公司喺柬埔寨、孟加拉同埋越南都有廠，每個地方都分別喺香港請咗人過去長駐，原來嗰幾位同事因為呢兩年冇飛返嚟，分別拜託咗Justin幫佢哋搞，但呢個衰仔應該唔會花時間同人搞消費券㗎喎，因為佢嘅性格真係鳳凰無寶不落。
Justin：「Derek有次打返嚟問我關於system嘅嘢，嗰陣啱啱派第一輪消費券，條友話喺香港冇friend，得一個家姐，但佢家姐睺住佢啲消費券，話反正Derek限期前都返唔到嚟，不如開張八達通畀晒佢，Derek唔制，但又真係攞唔到，咪問我可唔可以幫手買張新八達通登記，叫我收8折，過返cash畀佢，張卡歸我。」
我：「嘩！8折，$5,000賺$1,000，$10,000就賺$2,000，你又幾和味喎！」
Justin：「唔止，柬埔寨嘅Derek又同孟加拉嘅Henry講，跟住越南嘅Taft又知，全部走嚟叫我搞，Henry仲話問過出面嘅人，有人收7折，既然咁唔抵寧願8折益我喎！點知今年又話派多次消費券，總共賺咗佢哋兩轉。」
其實好多國家都可以飛返香港㗎喇，不過呢幾位駐外地同事都有個共通點，就係煙鏟，佢哋唔可以忍受喺香港隔離21日冇得喺酒店食煙，就算而家隔離7日都頂唔順，加上全部孤家寡人，Taft仲娶咗個越南妹，所以8折套現消費券就順勢益咗Justin喇。
Justin：「我最初唔肯㗎，因為收折頭幫人拎消費券係犯法，但Derek話係佢哋要我幫手咁做，而且每次ebanking過錢畀佢哋當地銀行都會收手續費，所以冇可能要我免費做喎，仲話幾百蚊報酬冇意思，咪全部劃一8折囉，佢哋提出㗎！唔係我開條件！」
消費券唔係時時有，但Justin仲有一個副業係長賺長有，因為公司喺觀塘，好耐之前佢放工過去觀塘廣場個馬會買六合彩，無意中撞到公司兩個老屎忽去買鹹碟……
我：「仲興買老翻AV㗎咩？唔識download？」
Justin：「第一，Download AV對曾生同楊生呢兩個60後嚟講太麻煩，曾生仲話鍾意喺個透明袋拎隻VCD出嚟嘅感覺，電腦太冷冰冰喎！我哋呢啲後生仔唔明㗎喇，上一代啲情意結嚟㗎，如果唔係咁，網上咁多鹹相點解仲會有人去買龍虎豹吖！」
我：「不過去觀塘廣場買鹹碟真係好容易撞到同事㗎喎！」
Justin：「我嗰次咪就係咁樣同曾生楊生講囉，好多女同事喺樓下馬會買六合彩，然後再行上嚟穿過去地鐵站，我話畀人見到一次就邊度都唔使去，結果佢兩個話我熟電腦不如幫手download，條件係每套片要燒返隻碟出嚟，要入透明膠套同埋print封面，照出面市價咁同我買。」
🤣🤣🤣究竟係乜嘢癖好？
我：「而家仲係咁？」
Justin：「熟客仔嚟㗎，佢兩個同我買咗幾年，每個月都畀一千幾百我賺，我咪用嚟幫補啲飯錢同埋車錢囉！我知係翻版，不過真係佢哋叫我整，我好被動，你知佢兩個幾高級㗎啦，唔通唔幫咩，呢啲咪係被動收入囉！」
被動收入唔係咁樣解㗎喎！見到Justin咁鬼多Freelance，相信佢都儲埋唔少錢，我個朋友見佢上次個App寫得咁好，而家又介紹咗人叫佢寫嘢喇，咁多生意做唔做得切呀？可以判鹹碟嗰part出嚟喎，我屋企有部腦可以燒碟。