公司之前唔夠人，但係上面未批budget，所以請咗兩個contract base嘅同事返嚟，我哋一開始都唔敢同佢哋講有機會轉Permanent（長工），因為驚budget最後批唔到，咁就無謂比假希望人啦，寧願有得轉嘅時候當做一個驚喜。
兩位新同事分別係Winnie同Fion，Contract base嘅合約期係三個月，其實佢哋做到第二個月嘅時候，公司已經批咗個Permanent嘅position，不過得一個位，換言之佢兩個最終只能活一個，當時Fion嘅優勢都幾明顯，話頭醒尾，好多嘢講，同其他同事比較多交流，相反Winnie係勤力，但就比較文靜，學嘢亦都慢少少。
雖然一齊入嚟做，不過Fion幾乎唔會同Winnie傾計，佢鍾意同office裡面其他同事玩，對我仲特別熱情，因為我係上司角色吖嘛，有時我做嘢忙到出唔到去食lunch，Fion都會主動問我想食乜，可以幫手買外賣，我其他下屬都冇咁識做。
不過有一次畀我無意中發現佢鬧大廈個清潔嬸嬸，當時我去完廁所洗緊手，聽到女廁出面有人好大聲講咗句：「嘩，睇住吖！撞跌我部電話係咪你賠呀？你個口罩遮住個嘴啫，唔係遮住對眼吖嘛！借過少少啦，阻住我呀！」
緊接推門入嚟嘅人就係Fion，當時佢的確係拎住部手提電話，不過當Fion見到我嘅時候就好好禮貌笑晒打招呼，如果唔係女廁出面冇其他人，我都好難想像咁惡鬧完人之後可以一秒變親切。
我洗完手出返去嘅時候，清潔嬸嬸已經由女廁門口行咗出長走廊，我故意行快幾步問一問嬸嬸：「頭先冇咩事吖嘛？」
嬸嬸：「冇事冇事，放低袋垃圾之後冇睇清楚後面有人，差啲撞到個小姐。」
我哋嗰度個設計係長長嘅走廊推開防煙門先去到女廁，咁我喺廁所嘅時候又冇人出去，雖然唔係親眼見到，但差啲畀嬸嬸撞到嘅人應該係Fion無誤。
過咗幾日食lunch，今次我都有join，食完之後我同另一個同事，Fion，仲有Winnie四個女人見有時間就入咗間化妝品店買嘢，出嚟之後Fion同我哋講：「頭先咪有個客係咁煩住個Sales問嘢嘅，佢應該顧唔掂，一路答一路嘟貨，嘟漏咗我支Hand Cream，啱啱睇過單，真係冇計到，即係支Hand Cream免費。」
另一個女同事問：「咁你頭先唔同個Sales講？一陣佢埋數會唔啱㗎喎！」
Fion：「銀行就話有出數入數，唔啱數可以計到啫，呢啲鋪頭邊有㗎！唔通佢哋每日數晒display啲貨同埋倉先收工咩，佢哋自己都唔知啦！」
我：「雖然我唔知化妝品呢行係咪唔使對數對貨，但你咁樣都唔係咁好啦，不如返轉頭畀返錢人，支Hand Cream又唔係貴。」
Fion：「唔係呀，我拎返去如果畀佢個Shop Manager見到，隨時鬧個Sales唔小心添呀！佢都未必想我返去畀錢。」
咁嘅歪理都講得出？Fion應該認為大家都係女人，咁著數成件貨冇計錢會覺得好抵同埋好雀躍，但你要貪都唔係貪嗰幾廿蚊嘅Hand Cream啦！
放工嘅時候我做咗兩個決定，第一個係落返間舖頭幫Fion畀返Hand Cream錢，我認得邊支，都係30幾蚊啫，我落到去冇話係邊個員工收少咗錢，淨係話同事返到Office對過張單原來冇計到，應該唔會害到啲sales啦！
第二個決定係將嗰個Permanent嘅position留畀Winnie，我明白Fion做嘢比較快上手，單計工作能力的確喺Winnie之上，但係能力不高可以理解，人品不好無法將就 ，我有信心Winnie慢慢會熟能生巧，但Fion我反而驚長遠會有其他問題出現，其實選擇朋友定係員工都好，人品絕對係一個考慮因素。
今日個IG post 睇咗未呀？
https://www.instagram.com/p/CcFBTjRrbzz/