噚日Facebook癱瘓嘅時候，我同老婆睇緊電視，係老細打嚟我先知。
「喂！你搞咩嚟呀？公司個page死晒喎！Facebook仲要自動登出，係咪你哋撳咗唔知咩link中毒呀？而家連Instagram都冇埋，你搞返掂佢呀！」
首先我當時唔知咩事，第一下以為老細畀人hack account，即刻收線check下，加埋當時老婆喺身邊，啲friend都有WhatsApp嘈生晒，原來個個都係咁，安心晒，全世界出事，唔係得我老細同公司出事。
打返去同老細講，佢竟然鬧我。
「咁你搞返佢啦，公司頭先出咗個減價嘅post，而家咪冇人見到囉！」
我：「Facebook出事唔係我哋公司出事喎！」搞得掂我去咗矽谷，唔係同你間19公司打工啦！
後來老細仲一直voice msg嚟抱怨，你聽得出佢係以為我識整，但唔肯幫公司整，呢下先至最嬲。
躁躁地我回返個voice msg：「你問下朋友先啦！個個都係咁㗎！Facebook問題呀！」
老細：「我邊有朋友呀？總之而家公司個Facebook同Instagram死晒，入都入唔到，撳忘記密碼都冇用！你睇下點搞啦！」
生番嚟㗎喎！唔識唔緊要，仲要完全唔聽人講，聽到佢嗰句「我邊有朋友呀？」
把聲又急又無助，肯定係真情流露，咁我就開心返喇，你條生番真係唔應該有朋友。
結果我冇理佢，睇完電視瞓覺，今朝返公司仲見到老細黑口黑面，喂！你冇朋友冇屋企人啫，不過上得返Facebook，應該周圍洗晒版講緊啦！
係咪仲覺得我可以憑一己之力整返好成個Facebook呀？痴線！