上咗間公司見工，填完form喺reception坐低等嗰陣，突然有條女喺office裡面衝出嚟，因為佢行動好急促，動作又好大，我不其然都望咗眼，跟住有個著西裝嘅男人又追埋出嚟，緊隨其後邊行邊講：「喂！你咩事呀？見見下工走咗去？未in完喎！」
條女勁嬲回應：「嘥我時間！你有咩資格問我last salary呀？呢啲係私隱，你請咗我喇咩？不過你請我都唔做呀！」咦……似乎佢同我一樣係嚟見工喎！只見個男人又忟憎又茫然，唔知佢哋誰對誰錯都好，冇戲再睇喇，因為條女撳完個門制就走咗出去。
我唔知對眼嘅焦點應該放喺邊度好，望個男人又好似太八卦，望自己手上張form又太唔自然，我仲聽到個男人念念有詞：「都唔知有冇搞錯……」呢個時候Receptionist姐姐打破沉默，佢同呢個男人講：「楊生，呢位小姐都係見工，係咪而家帶佢入去？」
提到我，咪抬起頭關注事態發展囉！呢位叫楊生嘅男人眼尾都冇望我，明顯係畀頭先嗰位求職者激親，情緒仲未回復平靜，然後佢丟低一句：「唔使in喇，下星期直接返工。」
下？？？Hello？？發生咩事？你意思係直接請我？雖然我身份係求職啫，但都聽下我意願好喎！
唔止我手足無措，Receptionist姐姐都呆咗，嗰位楊生返入office之後，Receptionist姐姐打咗個內線，應該係同HR講緊呢單嘢，冇幾耐HR又出埋嚟，佢兩個當面傾咗幾句，HR再行返入去，相信係請示嗰位楊生點做，或者confirm多次唔使in直接返工係咪講笑。
唔係等咗好耐，Receptionist姐姐就收到order，佢帶咗我入meeting room坐，又等多幾分鐘，HR走入嚟同我對資料，講咗啲position嘅詳情，開埋人工，然後嗌我星期一9點直接返，我係連最basic嘅自我介紹都唔使，快過打針就請咗喇。
佢開嘅人工係直接跟我張form嘅expected salary，冇壓價亦都冇議價，咁早知寫高啲啦！不過我係填完form先見到條女衝出嚟，又的確預計唔到嘅。
最終我有返工，呢件事已經係幾個月前喇，其實請人嘅過程咁求其，又咁一時之氣，正常會有啲卻步先啱，無奈我當時已經失業兩個月，雖然唔係好長時間，不過有份工始終會安心啲，而且有咩唔妥咪走人囉，返得一日得一日，有糧出㗎嘛！
托賴做落好正常，唔可以話係筍工，但都稱唔上係一份惡做嘅工，中規中矩啦！當日簽約我唔敢問HR太多，後來做落咗，我膽粗粗開口問楊生咩事，嗰位楊生其實就係我直屬上司。
原來當日條女填form係漏空晒全部last salary嘅欄位，application form咪有一part係working experience嘅，嗰部分除咗要寫舊公司名，仲要寫舊公司個position係咩，最後一欄係每份工嘅last salary，楊生見到條女冇填，所以就直接問，點知條女粒聲唔出拎袋起身走，跟住就係我見到嗰一幕喇！
楊生話，問last salary只係想衡量出幾多錢offer，出發點唔係要八卦人哋私隱，有人「起晒槓」係因為心態上覺得間公司想撳價，又或者見你之前太低，請你都唔需要出咁多。
講起呢單嘢又好勞氣嘅楊生表示：「佢連expected salary都冇填，我反而係驚開低咗人工，其實所有嘢都係睇你個心點諗，佢要諗到人哋咁差都冇辦法，仲有啲人用外國做例子，話外國公司問last salary係犯法，咁你咪唔好喺香港搵工囉！外國交稅重好多添，你唔引用外國例子，自己交多啲畀政府？唔好對自己有利就話外國點點點，不利嘅時候就好似阿叻咁，我唔知，我睇唔到。」
大家又點睇呢？個人認為當日個女仔的確有自由，佢可以選擇唔填last salary資料，不過如果喺香港搵工，呢種堅持應該好蝕底，畢竟問你last salary嘅公司唔止一間，相信10間當中，起碼有7間會咁問（可能更多），大公司甚至要你出示上一份工嘅薪金證明，我呢度算好喇，你講幾多佢就信，起碼冇問我拎payslip、銀行record，或者係稅單，我又唔覺得佢侵犯我私隱喎！
講返自己，唔使見工即刻請呢種經歷，我諗一世人都唔會再遇到，朋友介紹都冇咁正，適逢我當時又好需要一份工，所以呢次真係冷手執個熱煎堆，不過我都希望嗰個女仔已經搵到工，佢似乎有好多稜角同堅持，如果用喺適當嘅地方其實幾好。