過年前公司玩交換禮物，講明每人嘅budget係$200左右，唔好平太多就得喇，我買咗隻杯……聽埋先，有牌子㗎，THERMOS，$178，正確嚟講係真空保溫杯，都ok啦！
好衰唔衰，抽中交換禮物嘅對象係老細，再一次好衰唔衰，老細話太忙，完全唔記得咗買禮物呢回事，然後佢行入房，唔使10秒就拎住份包咗花紙嘅禮物出嚟，原來老細嗰排都去咗個商家佬飯局，席間有抽獎，但當時飲到貓晒，佢完全唔記得係咩，亦都唔得閒拆，既然唔志在，當時冇禮物同我交換又好掃興，所以就直接畀咗我。
講到明係商家佬飯局，我已經意識到份禮物唔會平得去邊，四四方方仲幾聚手，等到公司party完咗之後，成班同事都擾攘要拆嚟睇，仲估係錶，又話係iPhone，重量就似，不過盒嘅形狀就唔似囉！
拆完花紙，終於開估，原來係一部Canon相機，其實我對攝影係完全冇研究，平時影嘢就咁用電話，不過$178嘅保溫杯換你部幾千蚊嘅相機，我內心堅係過意唔去。
「嘩！EOS R5呀！配埋支鏡，水貨都賣緊2萬尾3萬頭左右，痴線㗎！」有個識影相嘅同事當場疾呼。
我自己上網check，真係咁貴！仲話係全球首部 8K唔知乜乜乜無反相機，睇完都唔知講咩，不過當我想還返畀老細嘅時候，佢已經離開咗公司出去見客。
第二日返工我搵機會入老細房，直接道明來意：「你知唔嗰份禮物係相機嚟㗎？我唔要得㗎！」
老細：「我真係唔知係咩嚟，無所謂啦，交換禮物吖嘛，橫掂我都唔知買乜，又唔記得咗呢！」
我：「冇禮物好閒之嘛！後補都得啦！部相機成3萬蚊㗎！其實我根本唔識影相……」
老細：「你覺得我又識影相咩？收咗佢啦！」
結果我就拎咗部相機返屋企，其實同事撩過我7折平讓，但始終係老細嘅禮物，知道咗就唔係幾好，何況現實啲講，係賣都賣出去啦！全新可能唔使7折蝕讓，仲乾手淨腳添！
勁唔好意思，一直覺得自己應該做返啲嘢，真心問意見，好唔好私底下請老細食餐飯呢？利申，我只係低級員工一名，人工連二字頭都冇，約老細食飯似乎有點兒那個，可以點做呢？