大家有冇做過一啲公司，喺resign之後要進行Exit Interview（離職面談）？我做HR嗰陣幫離職員工做過，自己resign都經歷過。
剛剛有位做HR嘅朋友同我分享一件事：
「噚日做Exit Interview好唏噓，嗰位同事向我講，辭職係因為上司迫走啲唔聽話嘅下屬，夜晚同星期六日都WhatsApp講公事，遲咗覆仲要畀說話下屬聽，成日為加班而加班，又話老細未走就唔可以收工，否則影衰條team，會畀老細覺得冇士氣，同埋個上司搞好多辦公室政治，分化同事，例如同A講B壞話，同B又講返A嘅壞話，總之要同事之間不和，因為唔想啲人私底下咁friend。」
我：「咁多不滿，張紙夠唔夠位寫呀？」
「以上嘅說話佢只係口頭同我講，完全冇寫落張紙度，我問點解？佢話費事畀人秋後算帳，轉新工做reference check隨時瀨嘢。」
我：「有前科？」
「係呀，之前有人走，Exit Interview照寫真心話，結果佢上司玩嘢，三催四請都唔出reference letter，後來出咗都打到好差，擺明公報私仇。」
我：「唔怪得啦！」
換言之，所謂Exit Interview嘅意義係彰顯唔到，因為每間公司要做離職面談，最大原因就係了解員工點解要走，從而修正同檢討公司嘅不足之處，而員工選擇避而不談，不外乎兩個原因，1）好似呢個case咁，佢太清楚公司文化，個老細或者管理層根本唔會接受現實，2）佢已經對呢間公司死心，通俗啲去表達即係～～～點醒你都廢事！
好多公司嘅Exit Interview純粹係一種形式，就當有人會睇，請問邊個睇先？HR收返嚟之後直達天庭畀老細？老細真係重視？
我見過另外一個case係收返啲Exit Interview畀員工嘅直屬上司，但係內容正正係鬧個上司，即係自己查自己，投訴信係畀返被投訴嗰個人去查，成個流程同架構係咁樣，你仲有咩期望吖？
另一位朋友間公司嘅Exit Interview仲搞笑，有個員工resign之後好坦白，內容有成幾百字，主要係話老細刻薄，每年人工加$150，最勤力個同事都係加$200，office設備又殘殘舊舊，電腦都唔捨得換，每朝開機要半個鐘，雖然入面冇講佢直屬上司嘅壞話，但係個上司拎住呢份嘢都唔敢畀老細睇，報喜不報憂，想進步都難啦！
其實一個員工resign，唔使問都知道係得幾個原因，簡單綜合就係：
A)上司廢
B) 冇前途，冇晉升機會
C) Policy同管理模式唔夠人性化
D) 付出嘅努力同收獲唔係正比例
E) 忙到hihi仲要應付辦公室政治
有啲嘢唔使做Exit Interview都知道，問題係你知道又會唔會去正視呢？真係要啲員工講你先知？唔講就完全唔察覺？
用包容、開放、認真嘅態度去聆聽員工意見，Exit Interview先至有意義同埋作用，否則就等同做show交差。