首先想澄清下，星期六日或者公眾假期喺WhatsApp group講公事冇問題，出嚟做嘢好難斤斤計較，問題係我老細唔止要員工覆msg咁簡單，佢仲要求你即時覆，如果遲10分8分鐘先覆係會躁返你轉頭，咁你點頂呀？
我明白好多行業都會喺office hour以外傾工作，不過講到尾，星期六日始終係我私人時間，要覆嘢問嘢唔係唔得，但你冇理由要求我放假秒覆啩？
最初我都有覆㗎，直至有個sunday嘅下晝，老細喺group度send咗一大堆msg，叫大家度定啲嘢，星期一返公司開會傾，當時我同男友睇緊戲，部電話較咗唔響唔震，所以要到散場後先見到msg，老細最後一句係：「Jade，知唔知道？Hello！」
CLS小學生咩，就算我唔係睇緊戲，都唔使個個指令同msg都答：「知道」咁樣啩！
最恐怖係我阿姐原來打咗7次電話畀我，真係有7個missed call，見佢搵得我咁急，所以就打返畀佢，點知我阿姐一聽電話就埋怨：「Jade你去咗邊呀？老細問你知唔知道呀？做咩唔覆呀？」
我：「星期日喎，睇緊戲喎！」
阿姐：「星期日還星期日吖，你睇戲都可以覆一句知道㗎啫！老細發晒火呀，佢打嚟問你點解唔覆？叫我同你傾傾呀！唔好講咁多喇，你覆返msg話知道先啦，順便同老細講句sorry。」
可能係性格問題，你愈係迫我，我就愈唔想做，唔係對老細先係咁，就算對住屋企人同男友都一樣，試問邊個想畀人強迫做嘢同答嘢呢？正常人都唔想做扯線公仔啦！何況你嗰啲唔係急嘢，我亦有自己嘅私人時間，你話我做公關之類都心甘命抵啫，我做普通文職咋喎，咩事呀你哋？
嗰次我連「知道」兩個字都唔覆，之後每逢星期六日或者公眾假期，我一樣係唔會覆任何公司msg，甚至特登唔撳入去睇，唔想畀佢哋知我睇咗，期間阿姐再警告過我幾次，話老細唔鍾意我放假唔理嘢，我都好坦白講，咁大個人出嚟做嘢，唔習慣用呢種方式工作，路過覆msg冇問題，要我office hour以外秒覆就唔使旨意。
你估事情發展成點？升職加薪當然冇我份啦，老細對我嘅面口亦都特別衰，不過佢已經習慣咗我星期六日同埋假期唔覆WhatsApp group msg，亦冇再追住要我覆。
有同事同我講：「你就好啦，老細放棄咗你，而家放假唔使睇msg。」
我分唔清同事呢啲說話係曲定直，但係你要做狗係你嘅事，同埋老細惡到連下屬遲覆msg都發脾氣，咪就係你哋班人平時阿諛奉承，先至會做成今日咁囉！
投稿讀者：Jade