《世伯》2 父女之間咁樣真係正常?

我有時見完客可以直接收工,唔一定要返公司打卡,嗰日我5點鐘返到屋企,一開門就見到Yvonne同佢爸爸坐喺梳化睇電視。

Yvonne:「咁早嘅?」

女朋友著住條底褲同埋小背心,仲要冇戴bra,雖然佢同世伯係分開坐,但有冇可能著到咁呀?爸爸都係咁話啦!你兩個都係成年人,我仲凝住佢哋本身係坐埋一齊,只係聽到開門聲先至彈開。

我冇照鏡都知自己塊面黑晒,世伯仲望一望我點頭,我點你老母咩,招呼都費事同佢打,直接叫我女朋友入房。

入到房我即刻發脾氣:「你冇嘢呀?著到咁。」

Yvonne:「有咩問題呀?自己屋企咋喎,嗰個係我爸爸嚟㗎!」

我:「你唔係小朋友呀,邊有人會著住條底褲,bra都唔戴咁樣同個阿爸睇電視?」

Yvonne:「對住屋企人唔帶bra有咩問題?好多女仔都係咁㗎啦!」

我:「唔係囉!我以前啲女朋友冇一個係咁。」

Yvonne:「你唔係連我爸爸都呷醋呀?」

我:「唔係呷醋問題,係道德問題!」

世伯喺房門外講咗句:「我走先喇,下次再上嚟。」

我同Yvonne因為呢件事冷戰咗幾日,冇出口發洩,又唔知同邊個講,因為覺得講出嚟好羞家,我仲係迷失喺一個位~~~究竟係我太小器,抑或覺得女友同佢阿爸有不尋常關係?

最終我選擇同一位男性好朋友講。

朋友:「嘩,你唔係講緊亂倫呀?好核突喎!」

我:「我都唔想係。」

朋友:「你係咪睇得AV多呀?」

我:「認真㗎!不如你幻想下個阿爸拍個女屁股,而個女又著住底褲同阿爸睇電視,大前提係個女已經廿幾歲喎!發育完喎!」

朋友:「我記得之前睇過段新聞,日本有個明星廿幾歲女仲會同阿爸阿哥一齊沖涼浸浴。」

我:「記得,北見直美吖嘛,我有睇過呢單新聞,個阿哥仲會拍片,然後話日本有20%女性成年後仲會同家人一齊浸浴。」

朋友:「咪係囉!咪就係咁囉!」

我:「呢度係香港,唔係日本。」

朋友:「一係你偷偷地set cam囉!如果你真係懷疑。」

我:「痴線,女朋友已經畀我去佢屋企住,我仲set佢cam,點都講唔通啦!就算本身係佢哋做衰嘢,都變咗犯法嘅人係我。」

朋友:「咁你就唔好諗太多,當佢係北見直美啦!」

傾唔到咩結果,我選擇返去同Yvonne破冰,雖然心裡面有好多疑問,但疑點利益歸於被告,無理由自己諗咗就當真,不過與此同時,我覺得世伯嚟得密咗,最頂唔順係我同佢都唔想Yvonne難做,大家刻意扮冇事,或者我應該再同Yvonne傾一傾點樣處理,再唔係我哋另覓小天地,最多住間細啲囉,以前佢同個friend住就話要兩間房啫,而家我哋同居,搵間一房或者細一半都得啦!

同Yvonne傾咗幾次,佢口頭上都話好,仲同我一齊上網睇租盤,起碼大家肯踏出第一步,唔係紙上談兵。

直至有一晚我同Yvonne落樓食飯,離遠見到世伯同個女人一齊行。

我:「世伯喎,嗰個係伯母?」

當時世伯都見到我哋,但明明係向我哋個方向行,突然又調轉頭走去搭扶手電梯。

我:「調頭走呀?你爸爸究竟有幾憎我?」

Yvonne:「唔會啦,佢見唔到你啫!不如買返去食啦,可以睇住電視,唔想喺餐廳食。」

我:「哦,你話事吖,我冇所謂。」

其實我有所謂,已經擺埋一邊嘅疑問又再湧上心頭,直覺話我知係有啲嘢,Yvonne同伯母唔啱?呢個係繼父?好似啲新聞咁侵犯個繼女?還是呢個係繼母?係喎,從來冇聽過Yvonne提起佢媽媽。

好多問題,又苦無對策,本來想搵到屋盡快搬走,但係我覺得世伯有心示威,因為有幾次返到屋企雖然見唔到佢個人,但佢又好刻意留低啲嘢畀我發現,例如打火機、煙、眼鏡盒、眼鏡布……

我做咗個好仆街嘅決定,預咗講出嚟比人鬧爆,就係行裝cam呢條路,底線係set喺廳,唔會set喺浴室同埋Yvonne間房,而且有時間性,兩至三日。

我知道咁樣做好唔道德,但如果我想同Yvonne行落去,有啲謎團點都要解開。

原來而家嘅偷拍器材已經好先進,叉電器都可以有偷拍鏡頭,只不過講幾千蚊,插落個插蘇位真係做到叉電,同時無間斷監視,雖然畫質唔高,唔使旨意有高清,但我唔係想偷睇啲咩,只係想搞清楚件事。

買好,試埋,插掣,我同Yvonne講要同屋企人去澳門三日兩夜,叫佢好好照顧自己。

=

《世伯》1 https://hkofficedaily.com/?p=15857

error: