「做過一年油站，然後去咗做麵包學徒，跟住做一年電訊CS Hotline，又無厘頭轉行做解款員，請問你點解要約呢個人上嚟見工？」Scan CV同埋約Candidate上嚟嘅工作我交咗畀下屬，而家公司請Sales Representative，呢個人真係適合咩？
下屬：「因為我見佢上一份工係做Sales，咁其他CV又好似唔係好啱，所以……」嗰一年仲未有疫情，加上係年尾，公司出招聘廣告收返嚟嘅CV的確比預期少，不過呢位Candidate上一份Sales嘅工作做得半年，而且Career Path亂七八糟，真心唔明我下屬點解要約對方上嚟見工。
由於下屬係當日朝早先至畀啲CV我睇，而個Candidate已經上咗嚟，冇理由要人白行一趟，所以我都如常入房見一見，喺HR嘅角度，轉工密已經係大忌，呢句說話你未必啱聽，但係站於我哋嘅立場，如果你嚟到做一年半載又走，我只會搞著自己，何況我唔識你，你唔識我，請人一定係睇經歷，呢個係唯一可以參考嘅資料。
仲記得入到房嘅時候，我劈頭就問呢位叫Dennis嘅求職者：「你轉親每份工都係唔同行業喎，油站、麵包學徒，熱線中心CS，仲有解款員，全部風馬牛不相及。」
Dennis：「係呀，最初做油站純粹係有朋友做緊，當時細個冇諗咁多，知道份工唔忙，肯去見又一定請，傻下傻下就走咗去做，至於麵包學徒就係因為家姐想開麵包舖，我又真係有興趣，兩姐弟考慮過夾份搞，連計劃書都整埋，所以我想親自去做下同埋了解下，可惜搵舖嘅時候遇到好多問題，最終都擱置咗，既然唔開舖，我就冇再做落去喇。」
坦白講，Career Path亂七八糟，我以為呢個人係唔知自己想要乜，但係油站同麵包學徒佢都解得通，所以我決定繼續問落去：「咁解款員又點解？」
Dennis：「其實解款員之前我去咗做CS先，可能係因為做麵包學徒嗰一年太辛苦，日日天未光就返工，所以想做文職，然後又發覺全日坐定定唔太適合，quit咗之後我想搵一啲文職得嚟又比較「生」嘅工，例如可以見下人或者出去見下客，唔係hotline對住四面牆係咁講電話嘅工，不過正如你所講，油站同埋麵包學徒已經冇關連，再加多份CS……每次去見工都會畀人質疑，所以CS之後用咗三個幾月都搵唔到工，我屋企唔係有錢，坐食山崩唔係辦法，結果亂石投林乜嘢工都send CV，終於有份解款員請咗我，呢個唔係我理想嘅職業，所以一路做一路搵行街Sales，終於可以入行。」
我：「既然入到行，點解呢份Sales又做半年唔做呢？」
Dennis：「因為呢間公司係賣影碟，我好享受呢份行街Sales嘅工作，但係賣實體碟已經式微，加上我公司代理發行嘅片真係唔吸引，有啲舖頭同我攞5至10隻已經好好，知道自己鍾意做Sales，所以想搵一間可以長遠發展嘅公司。」
我：「你應該唔止Send CV去我哋公司，仲有冇搵其他Sales嘅工作？」
Dennis：「有，但係冇回音，真係得你哋叫我上嚟見工，同埋我冇再亂咁Send CV，好專注搵呢個行業，所以我預計到Interview機會唔多。」
我：「你轉工密唔係最大問題，份份嘅工種都唔同，其實唔好話HR，就連求職網都好難將你分類。」
Dennis：「知道，所以我而家先會咁堅持，我29歲喇，再不斷轉行，隨住年紀越大，出路就會越窄。」
唔需要我去引導，佢已經知道自己個問題喺邊，正如一開始所講，CV亂七八糟，工種份份唔同，請呢種Candidate絕對係一場賭博，不過我願意推薦佢畀Sales Manager，其實一路聽Dennis講，我一路諗返自己行過嘅路，每個人都後生過，可能都經歷過亂咁搵工，又或者有工就做嘅年紀，唔係每個人嘅家庭背景同經濟狀況都容許佢哋慢慢摸索，好多人真係會手停口停，甚至有四方八面嘅壓力，有得揀邊個唔想份CV靚一靚，不過出嚟社會有時真係睇際遇。
而家Dennis已經喺我公司做咗4年，係佢職業生涯做得最耐嘅一份工，啱啱仲升咗Title，雖然開唔開心只有佢自己知，但係至少穩穩定定。經歷咗呢件事之後，上得嚟見工嘅Candidate我都會耐心問多幾句，我嘅角色畀機會人係好廉價，不過對於Candidate嚟講，可能會影響佢嘅自信心，甚至係成個Career Path點樣行落去。
如果你份工都有決定請人嘅生殺大權，試下唔好咁快判求職者死刑吖，CV靚可以係堆砌，CV爛或者背後有故事，見字不如見人，雖然每日咁多嘢做，冇可能每一個求職者都約上嚟見面，但約得上嚟就試下耐心傾聽，畀個機會人，其實都係畀個機會自己，好似Dennis咁，佢呢個位已經4年冇轉人，我都煩少樣啦！