保錡瘋狂畀人問有冇MIRROR飛雖然好搞笑，不過某程度上都可以理解，起碼保錡識MIRROR，講到尾大家都係ViuTV同事，但係我作為一介草民兼普通嘅打工仔，要四周圍搵啲客同埋Agency問有冇演唱會飛真係尷尬到一個點。
講返幾日前某銀行信用卡客戶可優先訂票，老細早一晚已經叫我哋成班同事早啲返，第二日要全部人一齊幫手click入條link搶飛，寫定晒佢張卡嘅資料出嚟，總之邊個入到去就撳咗先，仲話買到飛會「重重有賞」，平時有大生意都冇咁緊張。
雖然有廿幾個同事加埋廿幾部電腦，但係根本冇人可以成功入到去，而老細呢個舉動亦可以話癱瘓咗公司，最好笑係呢度都有MIRROR粉絲，佢哋話：「睬你都傻，老細大晒呀？我自己唔使買呀？入到去我自己買唔會出聲啦！」
癱瘓office撲飛最後食白果（包括鏡粉同事自己都買唔到），老細癲到打啲客同埋Agency嘅主意，事緣我哋公司本身有搵啲廣告Agency做campaign同埋宣傳，佢知道有幾間Agency之前分別做過同鏡仔有關嘅job之後，又再總動員叫我哋搵人R飛，呢下真係覺得難為。
老細：「喂，上次嗰間嘢呢，之前sell我哋嗰陣咪話做過一個Anson Lo嘅廣告既，你問下佢哋有冇MIRROR飛吖！」
我：「下，我接觸嗰個Sales應該係散仔嚟咋喎，話唔到事啦！其實有飛點會益我哋呀？」
老細：「你問咗先啦，如果佢班到MIRROR演唱會飛，你話我會做多次campaign。」
我：「你唔係話今年冇budget再做campaign咩？」
老細：「應承住佢先啫，我記得仲有一間Agency sell我哋嗰陣又話做過姜濤廣告㗎？邊間呀？搵返出嚟吖！邊個同事跟㗎？」
老細好似成個人發晒茅咁，仲要一直唔做嘢企喺我旁邊，喂你老細嚟㗎，生性啲好冇？我好擔心公司仲可唔可以營運落去呀！
結果我無奈地要搵個客R飛，你知唔知對方點樣答我？
客：「大哥，Anson Lo個廣告唔係我拍㗎！出面拍完再畀我間agency搵KOL同Publisher散出去咋，你唔係以為我識Anson Lo呀？保錡都冇飛啦，我二打六嚟㗎咋！」
我梗係知啦，不過我老細唔知呢！小弟何嘗又唔係二打六呢？
不如講下我老細係何許人先，佢唔係女，而係一名中坑，中坑走嚟迷MIRROR？佢對MIRROR基本上係冇感，不過我老細單身，呢期溝緊條女，對方細佢10年，係姜濤fans，所以咪要用盡一切手段搶演唱會飛囉！
其實咩原因都好，你癱瘓咗公司兩個鐘，又要我撕爛塊面去問agency攞飛，咁就唔係太好啦，老細仲要不到黃河心不死，因為今次演唱會係某間保險公司贊助，佢周圍問人識唔識呢間保險公司嘅經紀，話如果拎到飛可以將公司啲強積金轉晒過去喎……
睇嚟一日MIRROR未開show，呢單嘢仲有排煩。
IG個post都關MIRROR事🙈
https://www.instagram.com/p/CdCw-Mwr-iQ/