返咗份新工，我個部門好似圖書館咁靜，啲氣氛古古怪怪，同事之間唔講嘢，但明眼人都見到佢哋密密咁打msg，肯肯定將所有說話留喺私人WhatsApp或者group裡面講，我近乎冇機會同佢哋溝通，因為阿姐親自教我做嘢，完全唔經其他同事。
第一日返工阿姐就約我食飯，話係Welcome lunch，雖然話餐廳同枱有限人數啫，但係其他同事一個都唔叫又有點兒那個，食完飯返嚟我仲察覺到其他同事望一望我哋，跟住又係咁低頭打msg，如無意外應該係講緊我，總之成個感覺都好怪。
返工第一日已經有散水餅食，第二日阿姐又叫我一齊食lunch，又係冇預其他同事，成個朝早除咗阿姐教我嘢之外，又係冇其他人同我講嘢，食完lunch又有散水餅食，仲要打孖，換言之兩日內有3個同department嘅同事last day，有冇咁巧合呀？
第三日成個過程又loop一次，唯一唔同嘅係阿姐食lunch嗰陣咁講：「你唔好痴嗰班人咁多，聽日我同唔到你食飯，你最好自己食啦。」
我：「邊班人？你指我哋department？」
阿姐：「係呀，費事佢哋教壞你。」
個人覺得每間公司同每個部門都會有害群之馬，但如果你講到成班都係，仲會集體教壞我，似乎太誇張喎，成年人有思想，咁易教壞咩！同埋我未遇過一個上司會阻止同事之間食lunch或者交流，應該係咁講，呢個阿姐擺到明唔畀我同其他同事交流，咁就真係唔多尋常。
第四日我冇同其他同事食lunch，唔係聽阿姐話，而係冇人叫我，咁我咪自己買飯盒返office食囉，不過未食完佢哋成班就返晒嚟，見我自己食飯盒，終於有同事同我講嘢喇！
「你唔係同阿姐食lunch咩？」Sorry，我唔記得呢個同事叫咩名。
我：「唔係呀，阿姐好似約咗人。」
「咁你頭先同我哋一齊食吖嘛。」另一個同事咁樣同我講。
唔通話你哋班人呢幾日冇睬我，我唔好意思開聲要跟埋去食lunch咩？更加冇可能講阿姐阻止我同大家一齊食啦！
「我肯定係阿姐叫佢唔好同我哋食。」竟然有個同事估到發生咩事。
既然有人講起，我就嘗試探聽：「唔好意思，我想問下呢，點解你哋好似唔係好鍾意阿姐，阿姐又唔係好鍾意你哋嘅，利益申報先，我正常睇招聘廣告嚟見工，唔係皇親國戚，純粹好奇想問下。」
「你遲啲就知㗎喇，你唔覺日日都有人走咩？呢個阿姐係新嚟，佢都係早你兩個幾月返工，總之夾唔到啦，我下星期都last day喇。」
又走一個？呢位同事講啲唔講啲，其實都好正常既，始終我係新人，大家又唔熟，佢哋會防範我報寸，講咁多算係咁喇。
就喺呢個時候阿姐亦都食完lunch返嚟，見到我同班同事傾計竟然黑晒面，後來我去廁所，真心覺得阿姐係特登跟住嚟，因為佢從後行上嚟劈頭已經問我：「頭先你同佢哋食lunch咩？」
我：「唔係呀，我買飯盒喺公司自己食之嘛！」
阿姐：「佢哋有冇同你講啲咩呀？一定有講我壞話啦！」
嘩！呢條女咩事呀？我唔知阿姐同班同事有咩牙齒印，但係咁樣問會唔會疑心太重呢？我唔係你個女喎，同其他人傾計都要問准你？講咗咩都要匯報？
雖然我唔知誰是誰非，但可以肯定呢度唔多好做，好好彩之前仲有經headhunt見另一份工，喺我最迷茫嘅時候有feedback返，offer都有埋，坦白講人工係低過呢一份少少，不過我都決定quit喇，返咗幾日已經見到3個同事請食散水餅，呢啲都係眼見嘅事實，仲有個同事預告埋下星期last day添！
當然我都唔排除係成班同事玩個阿姐，不過呢個世界始終冇無緣無故的恨，我個部門明顯麻煩㗎喇，加上阿姐真係神經過敏，疑心極重，唔想咁大個人同邊個食飯傾計都要報告同埋睇面色，男朋友都唔會限制我人身自由啦！
由於我返得幾日工，一日通知就走得，見班同事個樣都好驚訝，你哋個個走得咁快，傻嘅都知有古怪，小妹先「走」為敬！