上篇講完自己細個嘅經歷之後，見到大家都有一齊分享，甚至係inbox打氣，好多謝你哋❤️
其實我還好啦，童年係影響咗我對婚姻嘅感覺，甚至有恐懼，但因為我讀完大學之後已經搬出嚟住，算係「及早治療」，即使用咗好長時間先逆轉到，例如細個做錯嘢講對唔住，媽咪係唔會原諒，或者原諒都唔會好聲好氣，如果佢答：「走走走，唔想聽。」其實已經係原諒咗我。
呢種方式令我長大後一度唔識得原諒別人，因為會潛移默化，有段時間我覺得自己好小器，後來一個人住，又喺社會浸耐咗，遇到一啲好大方，心胸好廣闊嘅人，我會慢慢喺佢哋身上學習，所以擺脫咗呢啲影響，而我通常都喺呢類朋友身上見到，佢哋同屋企人關係好好，可以攬頭攬頸串嚟串去嗰種。
我媽咪其實係一位好盡責嘅母親，只係某啲位令我……唔識點講。有一次返媽咪屋企同細佬打機，唔記得咩事媽咪要封利是畀人，佢以為屋企冇利是封，後來好辛苦搵到一個，跟住行埋嚟同我講：「好在你嗰次結唔成婚有疊利是封淨低咋。」連細佬都停咗手冇打機望住我，我知細佬好難做，話媽咪又唔係，安慰我又唔係。
自此之後，我其實冇乜帶女朋友返屋企，明白呢種感受嘅人自然會明。
我身邊正正有兩個朋友成長背景好極端，先講A先生，佢喺模範家庭長大，小康之家衣食無憂，老豆老母好開通，咩都聽下個仔意見，好open去討論任何事，支持仔女任何決定，即使有啲嘢想叫停個仔唔好做，都唔會用鬧或者怨嘅方式，而係慢慢分析，出到嚟個仔唔聽就由得佢做，因為唔想佢第日後悔或者埋怨父母，最終撞板亦唔會用：「嗱，係咪呢，叫咗你啦！」呢種語氣去支持當初父母論調冇錯。
另一位朋友B先生就相反，由細到大都唔敢點反抗，屋企講嘢會畀老豆老母無視，所有嘢都由父母決定，唔聽就會一直被哦，撞板就會話佢抵死，家中兩老長期都係讚其他人啲仔女好叻，人前人後甚至喺屋企都會踩個仔，舉例人哋轉工升職加薪就會話陳師奶個仔好生性，自己個仔如果想轉工就叫佢唔好搞咁多嘢。
A先生同B先生都係好多人嘅故事係咪？你唔將呢兩個背景嘅人擺埋一齊其實係冇乜嘢，但拍埋一齊就會見到明顯分別。我同AB先生一齊出嚟係正常嘅，講真有時B先生講嘢仲好笑，不過去到多人嘅場合，A先生會好敢講嘢，正常發揮，B先生就好冇自信，唔敢出聲好似隱形一樣，所以A先生朋友較多，圈子較大，職場上都順利好多。
冇比較係冇傷害，偏偏A先生係代入唔到B先生嘅世界，舉例有次B先生話想打多份工儲錢搬出嚟，A先生就會問：「點解要咁辛苦呢？人搵咁多錢做乜先？」即係點講呢……唔，字面上你唔可以話A先生錯，佢嗰啲對白係好心靈雞湯，看透世情嗰種，因為佢唔需要面對搬出嚟住嘅煩惱吖嘛，佢都唔明你做咩咁想擺脫屋企？做咩要打兩份工儲錢？A先生喺屋企住得好開心喎！
每次我叫B先生轉工，佢都係唔敢轉，我明白佢心理上好掙扎，其實想試，但由細到大都被灌輸一種訊息：「你冇撚用你冇撚用你冇撚用！」佢潛意識真係會覺得自己冇撚用，轉工、升職、加薪，統統係人哋嘅事，自己唔配擁有，就算把口同埋身體好想反抗，不過心理上已經係未打先輸。
曾經我都係B先生，好在我遇到唔少A先生，更加慶幸自己可以成為A先生同B先生嘅中間，因為我唔會過份樂觀，亦唔會一味悲觀，希望將來我啲仔女可以做一個進化版A先生，同時會識得體諒同埋拯救生命中所遇到嘅每個B先生。
“A lucky person’s lifetime is cured by childhood, while an unlucky person’s lifetime is spent curing childhood.”
－Alfred Adler