我同事話佢表妹個男朋友好仆街，一腳踏幾船，雙方離離合合已經好多次，某次分手嘅時間比較長，結果就捉咗表妹嚟speed dating，原意唔係要表妹即刻搵個新男友，只係想表妹識多啲人，眼界擴闊啲。
我：「你表妹讀女校兼教幼稚園㗎？」
同事：「唔係，係佢條仔疑心重，乜都要管，一有其他男仔搵佢就會發癲，同事send工作上嘅WhatsApp嚟，佢都話人哋係想搞呀表妹，只係用公事做藉口，根本呢條友佔有慾好強，你知唔知重點係咩？係佢男友自己本身就一腳踏幾船。」
我：「我諗你表妹條仔應該係將自己嘅行為投影去人哋身上，因為佢頻頻出軌，所以覺得全世界嘅人都會對愛情不忠，佢打親畀其他女仔就係想搞人，有其他男仔打畀你表妹，佢咪覺得其他人想搞自己條女囉！」
同事：「呢個分析ok。」
我：「之前咪有啲藍絲廢老話，邊有咁多人抗爭吖，一定係收咗錢先出嚟啦！其實講得出呢啲嘢，就代表嗰個人嘅價值觀同人格係要收咗錢先出嚟，完全係心理投射，反映自身人格。」
同事：「係，就係咁！而我唔鍾意呢條仔係因為佢痴線，有次表妹比較決絕想分手，直情唔聽電話，條仔竟然走上去表妹屋企踢鐵閘大吵大鬧，仲有其他老人家喺度㗎！」
我：「佢就係覺得屋企有其他人，表妹唔想難落台同埋搞到長輩，所以會就範開門出嚟，同埋接受返復合，其實係一種精神勒索，不過你哋又點知條仔自己一腳踏幾船？」
同事：「我同屋企人都撞見過啦。」
我：「得罪講句，你表妹有少少犯賤。」
同事：「唔係少少啦，佢唔捨得咁多年感情。」
Any肥，最後表妹都被我同事勸咗嚟speed dating，有個男仔仲對佢好有意思，正正常常㗎，唔係甩皮甩骨嗰啲，因為係表妹嘅緣故，同事同我都睇得好緊，個男仔都畀我哋scan過，起碼有份穩定職業，唔係痴撚線。
嗰個男仔追表妹期間無微不至，有次佢都知道表妹畀男朋友鬧同埋電話滋擾，所以特登第二日8點買定早餐去送畀表妹，真係送完就走，話希望佢食完會開心返，會有能量應付工作，之後一句都唔多，亦冇久留，自己去咗返工，算係咁啦。
可惜，佢個躁狂男友稍為轉少少軟功，表妹又心軟。其實佢同唔同speed dating個男仔一齊唔緊要，拍拖唔一定要一個接一個，觀察下先囉，最重要係擺脫一個會上你屋企踢鐵閘騷擾埋老人家嘅人，最重要係認清呢個會一腳踏幾船仲反屈你同其他男仔有路嘅仆街。
不過我講咗咁大段嘢都冇用，總之表妹都係繼續同嗰條打靶仔一齊。
早幾日同事話表妹又搵佢哭訴，個仆街仔幾日都唔覆msg唔聽電話，我哋都冇嘢再補充喇，勸又勸過，插手又插過，咁大個人，唔通我哋綁住表妹唔畀佢見條仆街仔咩？
唔好留戀一個唔珍惜你嘅人，天高海闊，太唔值得，時間一耐咗，對方會覺得你所能接受嘅一切都係應份，即使有一日撐唔住，人哋都唔會心疼。
表妹，如果你唔自救，我哋其實救唔到你。