武漢肺炎引發倒閉潮陸續出現，其實唔止香港，大陸都係，只不過上面報喜不報憂。
我有個親戚一直喺大陸做生意，收埋個二奶喺上面，三年前同老婆離婚，個二奶就轉正印，所以近幾年家庭聚會已經冇見過呢位親戚喇，不過佢最近就打嚟搵我阿媽，原來係武漢肺炎搞到公司頂唔住褶埋，二奶走埋佬。
咁呢位親戚搵我阿媽做咩呢？好在唔係借錢，只係想搵返個老婆，因為三年前棄糟糠嗰陣，佢老婆死晒心，改電話兼搬出舊址，話時話好在佢哋只係租樓而唔係買，否則真係大把手續同埋手尾，更好彩係佢哋冇仔女，亦唔使煩咩小朋友跟邊個嘅問題，不幸中之大幸。
呢個親戚仲係戇鳩鳩打份牛工嘅時候，老婆已經同佢一齊捱，公一份婆一份，甚至仲喺金錢上支持個老公搞生意，基本上兩公婆嘅時光都係捱騾仔，我喺一啲家庭聚會嘅細節中亦睇得出佢老婆好慳家。
老公喺上面叫做搵到少少錢之後，好快已經識咗個大陸女仔，聽講係去按腳嗰陣識，然後喺深圳住埋，跟手狠撇香港呢個老婆。
由於呢位親戚聯絡唔返老婆，佢就搵我阿媽求救，希望傳達一個「我知錯喇」嘅訊息，傾談中不斷呻個大陸女人有幾現實，使咗佢幾多錢，拎咗佢幾多嘢，可以共富貴但不能共患難……等等，我阿媽屌到佢屎忽開花，不過角色上都係要同返佢老婆講聲，原唔原諒就交畀當事人自己決定。
好在佢老婆爭氣，聽完之後完全冇反應，其實應該好難冇感覺嘅，只係唔想表露出嚟，而且哀莫大於心死，坦白講吖，聽完之後覺得呢個棄糟糠包二奶嘅老公抵撚死真係人之常情啦！開香檳都要啩！Anyway，佢老婆不為所動，堅決地叫我阿媽唔好畀任何contact對方，離婚後各行各路，永不回頭。
有錢之後玩女人嘅故事我聽唔少，冇乜幾個有好下場。作為男人，一定要珍惜嗰個陪你捱，有粥食粥，有飯食飯嘅女人，你賺到錢或者有成就之後先黐埋嚟嘅女人，基本上都係睇錢份上，愛係愛你個荷包㗎咋，真係貪你似吳彥祖咩！