最近喺社交網站見到一句說話，係出自美國Country Music殿堂級人物Kenny Rogers：「You can’t make old friends. You either have them or you don’t.」
意思係你唔會識到一個老朋友，「老朋友」呢樣嘢，你一係有，一係冇。
突然之間咁感觸，係因為以前做記者認識嘅一位舊同事結婚，我都有份去飲。
當年我哋體育組得10個人，9男1女，其中有一半而家仲做緊呢行，並且輾轉散落至唔同嘅傳媒，另外一半就轉咗行，有人去咗做公務員、有人開舖賣波衫、有人做緊PR、有人同我一樣打份寫字樓工，而嗰位女同事就一早嫁咗人做少奶奶。
嗰位女同事當年擺酒係請唔齊我哋咁多人，因為大家都仲係同一間報館同一條team，體育版基本上係返中班時間，總編唔會畀成個部門真空。由於手足之間感情好好，其中一位同事懇求總編成人之美，點知得到呢個答覆：「有人結婚聽日唔使出報紙呀？」情況就好似每次有新人返工都會問：「八號風球使唔使返工？」總編例牌一句ban埋去：「咁八號風球係咪冇新聞？」
今次有人結婚終於可以成班舊同事聚首一堂，全因為大家一早就各散東西，所以唔再受到限制，雖然中間嘅日子彼此唔係經常見面，不過我哋仍然記得大家嘅喜好同埋瑣碎逸事，有人就同我講：「衰仔，車路士捧盃你實開心到瞓唔著啦！」
又有另一位同事畀人窒：「你女朋友仲有冇迫你返教會？」
仲有一個同事因為食完煙返上嚟，結果畀我哋哦佢：「又話老婆叫你戒煙，仲食緊嘅你？」
佢答：「所以咪而家食囉，仲有幾個鐘可以散下啲煙味，我頭先搵支牙籤好似桔魚蛋咁桔住嚟食咋，費事手指有味，我老婆嗅覺超敏銳。」
你唔會識到一個老朋友，「老朋友」呢樣嘢，你一係有，一係冇，而最好嘅友誼其實係你忙你嘅，但有事記得要搵我。