作為一個球迷，其實我個人就比較熟悉Aaron Ramsey，即係阿仙奴球員兼威爾斯國腳艾朗藍斯，下屆佢就轉會意大利祖雲達斯喇，不過今次去倫敦，我就去咗搵另一個Ramsay，呢個係「a」唔係「e」，串法都有啲唔同，佢就係英國名廚Gordon Ramsay喇！
Gordon Ramsay間Bread Street Kitchen嘅招牌菜係Beef Wellington 威靈頓牛扒，一早聽聞好難book位，所以我去到倫敦之後都不敢怠慢，嗱嗱聲上網預訂，我揀咗下晝時間去，menu亦會比dinner平，呢個威靈頓牛扒就大約HK$600蚊一set，已經有前菜，main course，同埋甜品，好坦白講，個前菜妹仔大過主人婆（開咗個Gordon Ramsay album，大家可以去睇睇），十分好食之餘，未上main course都食到你飽飽地，如果你問我值唔值得去？我會話值得既，人一世物一世，亦唔算係一個負擔唔起嘅價錢，600幾蚊你去香港好多扮高級嘅食肆都唔得啦！
呢個set已經連埋香檳一杯，當日我唔知頭唔知路仲另外叫咗杯酒，所以下次你哋可以簡簡單單叫個set就夠喇，唔係慳錢問題，而係成件事本身就超飽，
今次去倫敦，或者大家平時去外國，應該都遇過店員熱情招待，不斷同你傾計，其實人哋係出於友善，當年我喺加拿大讀書仲未識得利用機會好好學英文，返學放學都係同香港人一齊，所以英文冇乜進步，直至回港後去咗一間教育機構工作，讀distance learning課程嗰啲，成間公司除咗個會計之外，全部都係美國人，仲有印度人，唔講英文係生存唔到，我亦都要硬住頭皮去講去聽，但正正係咁，嗰段時間幫我進步咗好多，所以大家一定要好好把握學習機會，或者係日常生活中嘅實戰機會。
以Gordon Ramsay間餐廳為例，一去到個receptionist已經會同你玩，由於我行錯路而遲咗5分鐘，抵達時佢同我講因為遲到而cancel booking，雖然好失望，不過我都要say sorry先，再問下可唔可以當walk in再輪候？個receptionist突然笑晒口同我講只係玩下，已經準備咗位畀我，嗰種失而復得嘅感覺梗係開心啦！只係我忽然喺度諗，如果佢喺香港工作又係咁玩，究竟會有咩事發生呢？你知香港冇嘢多，__ __就最多，可能佢開完玩笑嘅下一秒已經……
坐低之後，另一個女侍應又走嚟同我傾計講笑，我影食物打卡嗰陣，又有個男侍應衝埋嚟話要一齊影，呢啲咁搞鬼嘅互動真係會令人心情愉快，好想同佢哋講聲：「You make my day! 」
如果大家唔善忘，應該記得我喺公司入咗條國企team，有國內同事曾經講過：「中國那麼強大了，不明白為甚麼要我們說英語，難道老外（即係鬼佬）就不能學普通話嗎？」
我真係冇佢哋咁好氣，但就好想同自己嘅讀者講，世界係一本好厚好厚嘅書，如果唔學多啲，唔出去周圍見識，你睇嚟睇去都只係睇緊同一頁，學英文或者學任何語言唔係要討好外國人，而係可以選擇幾時聽同唔聽，幾時接收同唔接收，幾時討論同唔討論，你有呢個能力，主動權同埋話事權就喺你手。
留低Gordon Ramsay餐廳資料喺呢度，第日去倫敦可以經以下呢個網站book位，希望你會收藏啦！