「係呢，上一次拍拖係咩原因分開㗎？如果我知道會容易啲幫你搵另一半，盡量避免重複犯錯吖嘛，但你唔想講都ok嘅，最緊要你舒服，想傾心事又得。」每次我都會對住join咗 1 vs 1 speed dating嘅客人講呢幾句說話。
客：「講得，雖然過咗3年，反正我都想聽多啲意見，之前個女朋友同我一齊嗰陣成日提起前男友，咁我咪以其人之道還治其人之身囉，學下佢咁樣三句唔埋兩句就提起我再上一任女友，跟住佢就嬲咗，話要分手喇。」
聽返個客講，佢嗰個女友平時係咁樣提起前男友：
「呢個農莊之前同男朋友去過啦，幾好㗎喎，又大，價錢都唔算貴，我嗰次去仲要唔多人，係咁影相。」
「東京、大阪、名古屋、北海道，我同之前個男友去過晒喇，首爾都去過，曼谷去咗兩次，不如去馬爾代夫吖！」
唔知以為個客嘅前女友係黃翠如，好似所有地方都同洪永城去過，已經唔知可以再同蕭正楠去邊好喇，真係走遍世界每個角落都會諗起洪永城……
仲未講完，個客嘅前女友仲有好多例子：
「我以前個男朋友勁搞笑囉，返工前一晚會笠嗰啲頭網瞓覺，話第二日起身啲頭髮冇咁易彈起變天線得得B喎，勁肉酸呀，我見過佢笠，好似拍古裝片戴頭套咁。」
「你買車呀？好吖，我之前個男朋友都好鍾意車，搞到我都識少少，可以陪你一齊睇喎，嗰陣叫佢買MINI Cooper又唔肯，不如你買MINI Cooper吖！」
客人形容佢前女友提起個EX嘅頻率好高，已經表明唔鍾意咁樣，但係前女友仍然忍唔到口，最多都係提完之後會補句：「Sorry，唔記得咗，唔係有心㗎！」然後隔一排又會唔覺意再犯。
客：「咁我咪做返相同嘅嘢囉，目的都係想佢知道我有咩心情啫，來吧，互相傷害吖！」結果呢個客有樣學樣，隔一段時間就會話呢個地方同前女友去過，呢套經典戲同前女友睇過，呢間餐廳同前女友食過。
佢女友聽親都嬲，有次仲爆seed：「同個EX去過又點呀？你都有同前女友搞嘢啦，咁你而家係咪唔搞吖！」
我：「咁你點答？」
客：「冇呀，我答佢搞呀，都唔同，仲話前女友鍾意玩情趣玩具，大家唔同style，冇咩好比較，激到佢呢！」
贏咗場交（嗌交個交），輸咗段感情，結果佢兩個就因為咁樣而分手。
站於我嘅立場，佢兩個都有唔啱，只係先後問題，我覺得個女仔太掛住前男友喇，可能唔算太鍾意我呢個客，所以先會時時懷緬舊情，句句提住舊愛，一個女仔如果真心真意全程投入感情，理論上係唔會再掛住前度。
至於個客，我當然明白佢只係想激個女仔啦，但咁樣冤冤相報何時了，一世人流流長點過呀？而且佢亦都做返嗰個女仔相同嘅行為，明明自己啱，而家都錯埋一份，倒不如警告完一次，兩次，三次，仍然係咁就直接分手好過。
決定開始一段新戀情，就應該要放低舊事，經常望返轉頭真係冇意思，成日提住前男友點點點，成日講返前女友乜乜乜，其實對現任嚟講係極不尊重，彼此個心都會唔舒服，真心想發展就要識得顧及對方嘅感受，咁樣先可以長久。