因為想慳得就慳，所以返新工之後我自己帶飯盒，有一次叮緊嗰陣老公打嚟，咁我就行開咗聽電話，再返入pantry已經見到微波爐裡面兜飯唔係屬於我，然後有個女仔同我講：「你個飯盒喺度呀，幫你攞咗出嚟。」
原來呢位女同事幫我擺咗喺pantry張餐枱，當時已經有其同事入咗嚟準備食lunch，因為公司有兩個微波爐，有人已經叮咗，有人等緊叮，有人就叫咗外賣拎入嚟食，我講完唔該之後，另一位男同事就叫住我：「你係新嚟嘅HR？點稱呼呀？」
我：「我叫Grace，我應該點叫你？」
「Hello Grace，我叫Jacky，過嚟一齊食啦！」
因為我知道自己入嚟呢間公司嘅任務，所以唔想同啲人太熟，正想開口婉拒嘅時候，pantry裡面其他同事又陸續同我打招呼。
「我係Zoe呀！」
「叫我Maisy得喇！」
「佢哋叫我魚仔。」
個個都好友善喺度自我介紹，真係推唔到，結果我留低喺pantry同佢哋一齊食。
呢班同事仲要唔係扮friend扮nice，因為從呢次lunch嘅傾談中，發覺佢哋之間相處幾融洽，而且聽得出私底下感情都好好，因為彼此間都好熟悉對方，仲會交換飯盒嘅餸，咁都未算，佢哋更加分咗啲食物畀我。
魚仔：「我阿媽整嘅雞翼公認好味，次次都整多好多等我派畀同事，你都試一隻吖，包你食過翻尋味。」魚仔講完之後真係夾咗隻雞翼放喺我飯盒。
Maisy：「Jacky，伯有係咪今晚整印尼菜呀？我想食上次嗰個……咩多。」
Jacky：「加多加多，我老母實會整啦，Grace，你知唔知咩係加多加多呀？」
我：「加多加多？未聽過呀，咩嚟㗎？」
Jacky：「印尼菜，好好食㗎，聽日預埋你嗰份。」
唉，真係唔識點推，結果我第二日再同佢哋一齊食lunch，我亦特登整多少少餸，禮尚往來，冇理由淨係食人哋啲嘢㗎嘛！
除咗分享食物，呢班同事仲會分享好多私人嘢，Zoe原來同我一樣有個小朋友，仲要差唔多大，分別只係佢當時生完冇辭職，而我就做咗幾年家庭主婦先再返出嚟搵工，所以我同佢哋有好多共同話題，呢次大鑊！
公司𥚃面友善嘅同事唔止咁少，諗起呢班「pantry buddies」咁好感情，個幾月之後就要各散東西，其實我都覺得好難過，有時喺人事部望住成個office，我會不期然喺度諗：「個個人都仲未知道就嚟冇得做，去到正式宣佈嘅時候會點呢？佢哋又會有咩反應呢？」
愈諗愈唔敢諗，我亦已經逐漸抽身，開始減少同佢哋一齊喺pantry食lunch，但係時間一日一日咁過，距離Helen嘅last day得返幾日，意味住我好快要自己一個人面對公司嘅遣散行動。
「Hello，我想辭職呀，請問封信應該畀你定係畀Helen？」做做下嘢有個肥仔行埋嚟。
我：「辭職？」差啲衝口而出同佢講唔好辭住啦，就快就遣散仲有錢賠，你呢個時候自己resign好傻㗎！
肥仔：「係呀，兩個月通知吖嘛，我應承咗新公司兩個月後返工，已經同咗自己個department講，呢封係正式辭職信，你使唔使我補多封official嘅email畀你哋人事部吖？」
我：「你……使唔使再諗多幾日呀？不如你真係考慮多幾日先啦！兩個月通知……夠時間喎！」
呢個時候Helen唔知喺邊度又行返埋位，佢聽到肥仔想辭職，亦聽到我想勸肥仔唔好辭職住，所以好緊張咁衝過嚟加把嘴。
Helen：「辭職呀？你畀我吖，Ok㗎喇，今日生效。」
肥仔仲要好開心咁應佢：「唔該晒！唔該晒！咁交畀你喇。」
等到肥仔走咗之後，Helen竟然用責怪我嘅口吻話：「傻咗咩你，老細咪話咗唔講得囉，你做咩叫佢諗多幾日呀？」
我：「但係就快遣散喇喎，公司會唔會唔畀代通知金佢㗎？咁咪好唔抵囉！佢根本唔使resign，完全夠時間返新工。」
Helen：「下！你可憐佢呀？咁邊個可憐我呀？我遞信畀老細嘅時候佢都冇提我啦，我咪又係蝕咗代通知金，攬炒囉咩事呀！」
我：「就係因為你都係受害者，應該更加明白當中嘅感受，啲錢又唔係你出，點解要幫公司慳呀？慳咗都唔會入落你個袋啦！」
Helen：「你同佢透露或者暗示，其他同事知道點算呀？老細話最驚係咁，佢怕有同事會知道公司就快摺埋所以玩嘢，有機會特登搞破壞，所以先至唔洩漏半點風聲。」
我：「有冇咁多嘢畀人破壞呀？」
Helen：「人心隔肚皮，你點知唔會呀？」
Helen係典型嗰種「我過得唔好，都唔想你過得好」嘅人，而且思想好扭曲，老細搵咗你笨柒，乜唔係應該嬲老細而幫同事咩？點解要見到人哋同你一樣遭遇先至覺得開心？你喺呢間公司咁耐，同其他同事真係完全冇感情可言？
不過Helen走咗之後，我嘅結局比想像中更慘，過程亦都比想像中更難捱，因為老細要求我分批逐個department叫入房講遣散同埋對數，有人用粗口鬧我，有人想打我，有人喊，仲有人叫我小心生仔冇屎忽……（未完待續）
今日《情侶座》都有新稿
「成日提起前男友 以其人之道佢又要分手」
https://hkofficedaily.com/?p=22461