老細嘅要求係分開唔同department叫入房講解遣散細節，因為一次過太多人宣布驚控制唔到場面，而且喺會議室仲需要大家對一對份糧同埋賠償金額有冇問題，要逐個簽嘢，所以公司有幾多個部門，我就要重複做呢樣乞人憎嘅行為幾多次。
坦白講，咁大間公司執笠，你話完全無跡可尋其實係冇可能，所以有部分人嘅表現都好冷靜，仲有同事話：「都收到風啦，係啲高層扮晒嘢話唔係之嘛，不過你哋早啲講等大家有心理準備吖嘛，賠代通知金大晒咩？呢個時勢未必搵到嘢做㗎！」
講緊執笠遣散，班同事唔通開開心心喺度笑咩，都預咗大家面口唔會好，好似頭先嗰種嘅態度已經好好㗎喇，後來有個阿叔直頭拍枱用粗口鬧我：「我DLLM呀！你當我哋係乜嘢呀？呢班人都係我喺舊公司拉過嚟做，我點同佢哋交代呀！」
我：「你冷靜啲先，其實我負責執行㗎咋！」
阿叔：「冷乜L嘢靜呀！你啲仆街HR就最冇人性，你知唔知香港最乞人憎嘅職業係咩呀，第一，HR，第二，的士佬，你哋呢兩種人都係一L樣！」
我：「但唔係我話遣散㗎嘛……」
阿叔：「你哋有冇提過同事搵工呀？話炒就炒！呢班同事幫公司賣命㗎，我DLLM吖！老細呢！你叫佢同我親自講！」
我：「你唔好講粗口先……」
阿叔：「食屎啦你！你未夠班同我講呀！我鍾意Diu你咪Diu你囉，使擇日呀？我Diu埋你祖宗十八代都得呀，你個咁嘅死八婆，我問你老細喺邊呀？我要同佢講！」
我：「老細今日唔返……」
阿叔：「DLLM縮頭烏龜！夠膽炒人唔夠膽返嚟面對，你都唔L係好人啦！因住生仔冇屎忽呀！」
得㗎喇，有心，我個小朋友有屎忽，雖然呢個阿叔比我想像中嘅情況更激動，但我係有晒心理準備，而且我好耐之前做過CS，對住呢啲人如果反應太大或者同佢鬥鬧，場面會更加難控制，先畀佢爆晒出嚟就會自然平靜㗎喇！
聲大夾惡我唔驚呀，最擔心其實係……
「有冇搞錯呀，上次我辭職你點解唔講呀？咁我而家即係當自己resign，冇代通知金？」係之前個肥仔，我都預計到會有對質嘅一日。
我：「唔好意思，因為你已經辭咗職，所以冇。」
肥仔：「咁你都好狗啫！」
我：「我唔係狗，其實我有一路叫你再考慮清楚先……」
肥仔：「考咩慮清楚啫，你直接講咪得囉，仲收我封辭職信？擺明係幫公司隱瞞，想慳返啲代通知金賠少啲。」
聽完肥仔咁講，佢department嘅人喺房內亦開始嘈我，嗰種群眾壓力真係令人透唔到氣，而且我係完全冇援兵，Helen走咗，老細話有事唔返公司，我真係一個人頂晒所有咒罵同質問，其實諗諗下佢畀我份糧真係唔多，挺身而出做衰人做箭靶受盡千夫所指，又要聽粗口又要畀人話生仔冇屎忽，估唔到個老細會諗到遣散請個contract工執行咁毒，佢真係乾手淨腳。
然後到最難面對嗰關，就係pantry嗰幾個同事。
魚仔：「一句到尾，你係咪一早知道公司要執，冇理由公司今日宣布執，咁短時間仲請個人。」
我：「係，我入嚟嘅工作就係處理遣散安排。」
Jacky：「嘩，你真係刷新我眼界，仲扮冇事同我哋嘻嘻哈哈食飯。」
Maisy：「啱啱識嗰陣唔熟我唔怪你，後來大家咁close日日傾計食lunch，你明示暗示都冇，我覺得你份人都幾恐怖。」
Zoe：「你同我一樣都有小朋友吖，幾歲人仔，你應該好明白一個父母失業對屋企有幾大影響，得啦，當睇清楚個人，我自己傻啫！」
完全明白，照單全收，都係嗰句啦，一間公司結業要行到遣散呢一步，換轉係我都會徬徨或者憤怒，真係唔好期望同事會再同你好好地傾偈、講笑、寒暄，甚至保持聯絡，因為咁樣係違反人類常態，所以粗口阿叔我忍，肥仔單嘢我唔再辯護，對住pantry班飯腳我亦有表達歉意。
我處理緊嘅係破事兒，即係令人煩厭嘅工作，冇人會想面對，見到佢哋咁樣我都唔開心，我只求順順利利完成任務，有糧出就ok，我當發咗一場惡夢，雖然呢份工只係contract而且好短暫，但真係永世難忘。
老細no show，傻嘅都知道係逃避，我成為全民公敵之後真係連廁所都儲埋幾次先敢去，因為經過每個同事嘅位都受盡鄙視，當然唔少得竊竊私語，亦有人會兜口兜面畀說話我聽，宣布遣散當日嘅朝早，我已經喺女廁聽到同事咁講：「唉，走喇，費事留喺廁所同啲西女人一齊。」
難聽說話同埋難睇嘴臉我可以詐唔知，但係有個女同事得悉冇得做之後踎喺度喊，我就真係唔知點樣處理，佢話自己一年前入職，當時係推咗兩個offer，點知千揀萬揀都係做咗個錯誤決定。
因為佢就咁踎喺人事部前面，我唔理又唔得。
我：「你唔好咁啦，其實塞翁失馬，東家唔打打西家啫，何況又賠足代通知金，所以都唔叫有損失。」
「你講得輕鬆，嗰陣我推咗另一個offer，個headhunt覺得我玩嘢，話會blacklist我，你估呢行好大呀，出得起錢來來去去得嗰幾間，另外幾間好細，我屋企仲要好麻煩，你話公司遣散佢哋唔信㗎，一定覺得我畀人炒。」
我：「其實唔take offer就blacklist你，會唔會係個headhunt有問題呀，屋企人方面我會建議照講真話，佢哋信唔信係一回事，你冇必要因為屋企人唔信而走去講大話，不如我講個故事你聽吖，嗰陣時……」
正當我想講自己嘅真人真事嗰陣，另一位同事路過就拉走咗佢喇，臨尾仲窒多我一句：「你同呢啲人講做咩吖，啲HR冇性㗎，魚仔佢哋話呢條女仲日日同佢哋食lunch搏friend，幫老細收料，你咪同佢講咁多嘢啦！」
其實我邊有搏friend幫老細收料呀……
難過嘅日子都要過，頂硬上就得喇，由於老細完全唔想面對，連reference letter都交晒畀我搞，所以我真係花咗好多時間幫所有人砌到封reference letter靚一靚，總之走嘅時候可以連埋其他文件成set畀齊同事，等大家無後顧之憂，亦希望佢哋可以盡快搵到另一份好工……而其實我都要搵工。
本來想安慰喊嗰位女同事嘅說話，我想喺度講一次，間公司咁多人，或者總有幾個會睇到，其實塞翁失馬真係焉知非福，我對上一份工係做HR，再對上一份都係，而嗰間舊公司直頭係突然結業，真係返到去office門口先至見到貼咗張紙，除咗個老細同股東之外完全冇人知。
更慘嘅係當時嗰間公司仲要欠薪，我哋成班人走上勞工處，最後搞咗好耐先至追到份糧，仲要係斬件上，無助到一個點，公司仲要冇幫我哋供幾個月嘅MPF，雖然之後佢焗住供返，但成件事真係好麻煩。
公司執笠冇通知再拖糧，撞正當時我又同前任分手，突然間情場事業全部失意，我以為人生冇希望，點知最後咪又畀我搵到另一份工，咪又畀我搵到而家個老公。
差啲唔記得講，嗰間突然執笠嘅舊公司都有啲名氣，因為佢唔止拖糧，仲拖咗啲客嘅錢，所以搞到好大，有記者上埋去，我見埋報添呀，冇打格㗎！點解記者唔係走去搵個衰老細出嚟影，反而係追住我哋呢啲受害者去影相呢？
嗰間舊公司一向都對我哋啲員工麻麻，不過人就係有種惰性，明知間公司冇得發展，都成日會諗做住先，因為每個人對於轉變都會有種不安同恐懼，最終佢執笠其實係幫我做咗抉擇，迫我踏出第一步去搵另一份工。
至於舊愛，又係嗰種典型渣男，又係一早知佢份人係點，而每個人除咗有惰性，仲會有感情同埋衰心軟，結果佢離開我，令我變返單身，如果唔係咁樣都唔會遇到我而家個老公，同樣係個天用另一種方式畀咗另一條路你行。
試下諗清楚啲，公司個老細連執笠都唔敢面對，又明知都畀同事辭職想慳代通知金，好極都有限啦，所以冇得做唔需要太可惜或者唔開心，可能有更好嘅工喺前面等緊你。（完）