餐廳訂位No Show 隨時畀律師告

繼續有朋自香港來,因為開放旅遊後東京多咗好多人,加上呢度想食得好少少通常要book位,所以我都不敢怠慢即刻上去《食べログ》,佢就好似香港嘅《OpenRice》一樣,除咗可以訂位,仲有得撰寫同埋睇人哋嘅食評,咁我相信一樣係有水份嘅,當做參考囉!

如果你只係嚟日本旅遊,雖然冇需要登記做member(免費)或者儲唔到分,但我都建議你download個App,因為可以做完research先去,睇下有咩係必食,甚至可以先睇睇menu,翻譯完再去就唔使驚唔識得點菜啦!

擺咗幅圖喺下面,你會見到失約嘅後果係當日先取消booking要每位罰¥5000(HKD 263),我訂咗3位,放飛機就total罰¥15000,同埋佢都講得好清楚,若然取消仲要唔聯絡冇晒影,之後可能冇得再享受佢哋嘅服務。

每間餐廳守則唔同,預約時會講清楚

每間餐廳嘅罰則都有唔同,因為知道我細佬鍾意食蕎麥麵,所以又另外book咗一間同細佬下星期去食,由於呢間係要喺訂位時揀定個set,我哋揀呢咗個¥3500有8道菜包括蕎麥麵、天婦羅同埋刺身等嘅套餐,呢間如果no show或者喺約定日期2日內先取消,就會照收兩個人total ¥7000,下星期我會準時赴約,食完畀個包膠你哋。

有啲人可能會覺得:「搞錯呀!食餐飯啫!取消又要罰錢,又話以後唔招待乜乜乜,使唔使咁嚴呀?」

但即使我唔係站於餐廳嘅角度或者經營者角色,我都好贊成呢種制度,免得啲友仔係又book唔係又book,霸住啲位又no show,令到真正想食嘅人最終食唔到。

有罰亦有賞,由於《食べログ》係連結咗T-CARD,呢張積分卡喺日本算係非常普及,可以用嚟兌換商品或者折扣,你登記《食べログ》當然可以選擇唔連結T-CARD,不過就冇咁抵囉,例如我呢兩餐飯,出席已經可以每個人頭獲得 T-CARD 50 分,呢兩餐加埋又有250分喇(成個師奶咁🤣)。

不過我登記《食べログ》嘅時候並冇輸入任何信用卡資料,no show罰錢係咪靠嚇呢?我真係唔敢講,但就算你冇用《食べログ》呢個App,只係打電話去book,其實餐廳都可以透過你嘅名同埋電話,搵律師去追收返no show嘅罰款。

¥5000又搵律師,¥3500又搵律師,咁咪好唔得閒?律師費都唔止啦!原來日本有個叫做《ノーキャンドットコム》嘅律師網站,可以幫餐廳追收客人no show要畀嘅錢,服務費係張單嘅30%,假設你張單係¥20000,律師淨係追到個客畀¥10000,咁餐廳就要畀律師¥3000服務費,如此類推。

好喇,當餐飯¥20000,律師追到個客畀晒,30%都只係講緊¥6000,有肉食咩?我相信呢個律師服務係密食當三番,因為根據日本經濟產業省喺2018年11月嘅報告中指出(附圖),日本餐飲業喺2017年嘅No Show損失係2,000億円,計佢當中有4分3追唔到,得4分1追得返,咁都已經有500億円, 每年賺到30%佣金都幾和味㗎!

日本經濟產業省報告提及,日本餐飲業因no show一年損失約2000億円

日本當地仲做咗幾項調查,包括啲人因咩事會no show,依次序排名如下:

1)唔理食唔食,訂咗位先講;

2)因為間餐廳係人氣店,驚walk in冇位,訂完到時再算;

頭一二位有啲相似,亦好似我上述講嘅情況,噚日篇文提及過,我樓下間扒房因為電視台去拍攝而忽然爆紅,預約要提早一個月,呢種情況喺日本經常發生,基本上唔book定都唔使旨意食。

其實呢間扒房唔算誇張㗎喇,我附近仲有間賣Pancake定唔知蛋糕嘅甜品店係一日排到黑,勁到下晏兩點已經賣晒收舖,原來又係電視節目效應,我就冇心機排喇,所以近在咫尺都未食過。
另外幾個no show嘅原因仲有:

3)唔記得咗;

4)同朋友嘅約會改咗期;

5)落大雨天氣惡劣。

其實no show對於客人同餐廳都係一種惡性循環,作為客人想book嘅餐廳冇位,就要退而求其次食其他(可能仲要被迫去SUKIYA食其家🙈)。另外,餐廳唔想浪費食材,可能就會冇咁多變化同選擇,客人食嘅嘢自然比較呆板。

至於餐廳更加唔使講啦,除咗有機會浪費新鮮食物,仲隨時會因為留位而冇咗啲walk in嘅客人,加埋員工嘅薪金支出等等(有啲餐廳會因應booking而額外聘請臨時工),金錢上嘅損失有數得計,大集團可能頂到,小店就好吃力。

究竟喺日本訂完位no show係咪真係會收律師信呢?收到之後又係咪有人乖乖交錢呢?係咪所有嘢都靠嚇,毫無根據同埋先例呢?我真係唔知,亦都唔打算去測試條底線,因為我而家已經出咗門口食飯喇,下星期食蕎麥麵仲會拍下片同大家分享。

無論喺邊個國家都好,訂咗位就唔好no show喇,始終遇到心儀又好食嘅餐廳都係一種緣份嚟嘅,我喺東京都撞過唔少劣食㗎,你估日本就一定間間都好食咩!所以有好嘢一定會好好記低,將來再有朋友嚟就同佢哋去encore!

error: