4年前我有咗BB嗰陣，其實都唔知係咪產前抑鬱，總之就一直覺得胸口翳悶同埋唞氣唔順，仲會半夜三更瞓唔著走出客廳坐，有時甚至會自己喊，後來老公知道咗之後就勸我辭咗份工專心養胎，就係咁，我由一個HR變成全職師奶。
老公好錫我，係家庭經濟支柱，佢乜嘢都叫我唔使擔心，但係呢個疫情嘅影響實在太大喇，佢間工程公司迫啲員工減薪，唔肯減就炒，結果老公嘅收入少咗，而小朋友又一路長大，使費支出越嚟越多，難得奶奶肯幫手湊孫，所以我決定再搵嘢做，希望減輕老公嘅負擔。
我哋屋企經濟情況有變，其實成個香港咪又係一樣，雖然有多年嘅工作經驗，不過我都搵唔到工，有時諗諗下都覺得好正常，一間公司嘅人事部得幾個人，正所謂僧多粥少，個個喺咁嘅環境下都唔會隨便離職，空缺少係理所當然嘅事，唔擔心得咁多，唯有繼續搵啦！
後來畀我搵到一份contract工，講到明係兩個月合約，send咗CV去先啦，話唔定有機會轉長工，又話唔定兩個月後市面上多咗open position呢，最緊要有糧出啫，兩個月人工唔係錢呀？好幫到屋企㗎喇！
幸運地，send咗CV之後嘅第二日，真係有人打嚟叫我去interview，當時唔敢講話有著落，不過起碼有得見先吖！
Interview來來去去嗰幾味，我單刀直入問自己最關心嘅問題：「如果表現好，有冇機會轉長工㗎？」
對方係一位自稱叫Helen嘅HR：「冇！」
咁坦白？算啦，兩個月contract就兩個月contract啦！
Helen：「大家都係HR，實不相瞞，我哋老細講咗兩個月後就結束間公司，所以冇機會轉長工。」
我：「結束間公司？咁……仲請人？」
Helen：「首先你唔使擔心冇糧出先，相反地，我哋就係要搵個人處理員工嘅出糧同合約問題，當然啦，老細係想搵個好熟勞工法例嘅人，知道Account點計份糧，到時同員工慢慢對數同埋講解清楚，唔想有咩手尾要跟，所以咪得兩個月合約囉，你好介意？」
我：「少少啦！」
Helen：「不如你聽埋人工先，我見你expected salary係呢個價，其實我哋可以出到……」
原諒我冇寫埋個人工出嚟，但係呢份糧比我之前多咗1.5倍，亦即係比我填寫嘅expected salary多咗1.5倍，因為我用last salary做指標，畢竟自己都闊別咗職場4年咁耐，平手都等到而家先有interview，再填多啲我真係冇信心。
對方見我猶豫又接住講：「其實contract人工一定多啲，你做呢行實明㗎啦，始終合約員工冇乜福利可言吖嘛！」
我：「我明，坦白講人工係吸引嘅，不過一嚟就負責做炒人個角色，呢個位都幾乞人憎㗎喎，咁請問HR departmemt有幾多個人一齊負責？」
Helen：「而家就得你同我兩個囉，之前我對上仲有個阿姐，不過佢半年前走咗就冇請返，原來老細一早諗住唔做，玩自然流失。」
我：「咁佢請得個contract位返嚟，都係想多個人幫你處理啦！」
Helen：「唔係呀，我做埋今個月都走㗎喇，一個月後得返你。」
我：「下！即係要我一個人派晒啲大信封呀？我做唔掂喎，仲以為係我同你兩個負責。」
Helen：「計糧有Account負責，你幫手對數同埋向員工講解啫，唉！講起我都嬲，呢度辭職要兩個月通知，咪同你講我阿姐走咗之後冇再請人嘅，咁我當時唔知老細密謀摺埋間嘢吖嘛，以為要一個人負責晒所有嘢，又見唔到盡頭，我梗係搵工走人啦，點知遞完信之後一個月，老細先講準備執笠嘅嘢，所以到時個個都有得賠，得我一個冇得賠，因為我遞咗信呀！其實同公司派大信封相差一個月咋，咁就蝕咗啲代通知金畀老細喇！」
我唔想知咁多恩怨情仇呀，總之呢個職位係做衰人，我真係冇興趣，你畀我走啦！
嗰個Helen仲未呻完：「我問老細可唔可以計埋我嘅代通知金？佢一句就話唔得，真係勁衰囉！Account嗰邊都應該有同事一早知道，又冇人同我講。」
我：「唔好意思，我諗呢份工未必適合我。」
Helen：「你不如再諗諗先啦，老細都知呢個位難做，所以特登開高啲人工，講真太多經驗嘅人唔肯嚟做contract，太少經驗又handle唔到呢啲遣散嘅case，你再考慮下啦好唔好？」
是但答咗會考慮就走人，如果呢個Helen同我一齊面對都好吖，而家三煞位仲要我一個擋晒，有冇搞錯呀！
當係到此一遊算啦，interview都要熱身嘅，4點幾已經返到屋企，一開門見到我老公。
我：「咁早返嘅？唔舒服呀？」
老公：「同個仆街老闆嘈完，老婆……我辭咗職，對唔住，真係忍唔到，明明講咗減薪係短期，點知一減就年幾，完全冇諗住加返，成日開空頭支票，唔止我辭呀，阿貴同明仔都一齊唔做。」
我：「咁你老闆有幾衰，之前都聽唔少，算啦，再搵過份工囉！」
老公：「我係咪衰衝動呢？不過頭先喺公司個氣氛……總之我會盡快再搵工。」
老公嗰行話大唔大，話細唔細，我唔懷疑佢可以搵到另一份工，只係懷疑有冇可能咁快就搵到啫，諗起呢方面嘅問題又開始好大壓力，唔係冇積蓄，不過兩公婆都冇嘢做，嗰種不安真係唔知點樣去形容，我哋仲有個小朋友，大人唔食，細路都要食。
我：「其實我今日算係見成咗份工嘅，人工仲高過之前嗰份，不過就得兩個月contract，冇得轉長。」
老公：「咁都唔錯喎，而且你都幾年冇做嘢，當pick up返都好吖，兩個月短短地當係試水溫囉，何況到時我都可能搵到新工啦！同埋你點知一定冇得轉長？或者間公司唔想畀promise你，做得好自然有得轉㗎喇！」
我：「唔係呀，佢哋兩個月後執笠，而家係要搵個人善後，到時負責派大信封，講解遣散條款同埋法例。」
老公：「咁有冇糧出㗎？」
我：「實有，如果佢哋係諗住拖數欠薪，唔使特登請個人返嚟做呢個角色啦，好多老細都怕煩同埋犯法，佢哋唔想做錯計漏，一陣搞到有其他手尾跟，同埋你點知個老細出面仲有冇其他嘢，可能呢間公司對佢只係一個包袱，咪執鬼咗佢乾手淨腳囉，見唔少呢種老細啦！」
老公：「咁又係，做住先囉！」
我：「但係一嚟就負責炒人，好似好冇陰公咁，我話考慮下先。」
老公：「炒人唔係你嘅決定，你只係執行，總之計到所有嘢清清楚楚，都算係幫緊嗰度做嘢啲人吖！」
又啱，聽到老公咁講，我心理都平衡返啲，結果考慮咗一晚咁多，第二日就打畀Helen話會take呢個offer，同日仲上多去一次簽約。
然後我發覺，原來除咗老闆、會計部兩個同事、Helen，仲有我之外，成間公司啲人都唔知道即將執笠，而其實呢個Helen都唔係好人…… （未完待續）