成日聽會員講佢哋嘅分手故事，有啲聽完會好嬲，有啲聽完會令人啼笑皆非，但最近聽到一個就好尷尬，最終結局以一筆$478.6嘅轉帳收場，銀碼大啲都話吖，點解要搞到咁肉酸呢？話晒大家都曾經一齊過。
呢位女會員叫Ann，因為前男友識咗第二個所以分手，本身一切回復平淡，點知9個月之後再收到呢位前男友嘅WhatsApp，內容係問佢拎返$5,300：「我都呆一呆，即刻諗係咪借咗佢錢唔記得還，但真係冇喎，調返轉佢仲借咗我錢未還。」
我：「係咪啲分手要還返禮物畀對方嘅老土嘢呀？」
Ann：「唔係呀，佢係print返銀行信用卡statement出嚟，highlight咗幾筆飯錢、一次迪士尼入場劵嘅錢，幾次買電影戲飛嘅錢，話既然大家分咗手，想我share返呢筆錢，總數$5,300，我火都嚟埋。」
我：「咁你係咪唔想煩，然後就畀返錢了咗件事？定係大家又嘈一大輪？」
Ann：「我冇嘈，仲好冷靜咁同佢計數添！佢鍾意計吖嘛！」
阿Ann不厭其煩咁喺自己online banking又搵返啲statement，原來有幾次食飯係佢畀錢。
Ann：「好在係碌卡唔係畀cash，有根有據，同埋我家姐開公司，一般我會畀埋啲飯單家姐用嚟報稅，咁得啦，有數得計，加加埋埋二千幾，另外有次睇演唱會，又係我買飛，再扣多千幾，仲有一次佢問我現兜兜借$1,000，我payme畀佢嘅，screen cap埋record，佢一直冇還，我亦冇追，而家冇理由唔計啦！」
我：「借錢冇還仲問你拎返之前拍拖啲食飯錢？會唔會係想引你注意咋？」
Ann同佢前男友其實有幾個common friends，聽講佢前男友最近溝咗條新女，唔知點解搞到個個月唔夠錢用，思前想後，可能呢個就係前男友要走嚟追返以前飯錢嘅原因。
我：「咁最後你畀返錢佢，定係佢要畀返錢你？」
Ann：「減完呢樣嗰樣，最後計到我欠佢$478.6，我問佢仲要唔要，佢話要，咁我咪用payme畀返$478.6佢囉！」
聽返阿Ann講，畀完錢之後前男友就即刻block咗佢WhatsApp，搞到佢想講多句：「以後唔好再搵我」都趕唔切。
雖然唔知道佢前男友係咪因為條新女而搞到要追返啲飯錢，不過兩個人由相識到拍拖共同建立一段關係，分手之後仲要隔9個月先至追飯錢，更加要用$478.6呢個銀碼嚟做終結，真係唔知應該講咩好。
或者唔係每個人都稀罕再見亦是朋友，而即使唔做朋友，其實分手都可以體面啲，不致於要搞到咁肉酸。