「Terry，知唔知咩係SQL呀？咁PLSQL呢？你都係唔好同我解釋住喇，而家得唔得閒？有個candidate嚟咗，喺會議室，我in唔掂呀，一係你幫我入去in吖，總之請唔請交晒畀你揸主意得㗎喇。」
我做IT，所以你問我咩係SQL冇問題，唯一嘅問題係，問呢堆問題嘅係我上司，亦係呢間公司嘅IT Manager，咁都唔識要走嚟問個細嘅，仲要同個candidate做interview都慌失失，真係講你都唔信，如果唔係發生喺自己身上，坦白講我都唔會信。
解構下我所屬嘅IT部先，本來有3個人（包括我），之前個Manager因為舉家移民所以辭職，當時好多同事都以為會升另一位做咗好多年嘅Assistant Manager，點知公司最後冇選擇內部晉升，反而決定請個新嘅IT Manager返嚟。
如是者，嗰位做咗好多年嘅Assistant Manager一怒之下都劈炮，即係我個部門兩位大佬幾乎同一時間走，我入咗嚟做兩年左右啫，當然唔會升我啦，有段時間公司嘅IT部仲要得我一個。
公司首先請返個IT Manager，冇錯，就係嗰個連SQL係咩都唔識嘅人，其實佢返工第一日已經露餡，因為佢想裝個私家手寫版，仲話自己唔識用倉頡、速成，同埋九方呢一類輸入法，強調咁多年嚟都係用手寫版，覺得好好用。
用咩輸入法唔係重點，而係幫佢install緊手寫板嗰陣，呢位新嘅IT Manager咁樣問我：「點入嚟呢度㗎？去設定呀？跟住呢？撳邊度可以入到嚟呢個位呀？」
開頭以為佢係擺大佬款，搵啲細嘅幫手做下欄嘢，後來先知佢堅唔識，唔係扮。
好喇，又有次我哋同另一個department開會，人哋個阿頭講system integration嘅嘢，期間提到CSS, HTML, XML/JSON，呢位IT Manager竟然完全插唔到嘴。
插唔到嘴咁可以點呀？唔通睇住佢擘大個口得個窿，一齊dead air咩！隔籬team個阿頭已經好唔耐煩，我又有份開會，咁咪唯有下下代答囉！簡單啲講，我個IT Manager入嚟開會係冇參與過，佢只係做一個旁聽同埋現場觀眾嘅角色，問你死未？
不過呢位新任IT Manager有個「優點」，就係好老實，因為佢除咗問我咩係SQL之外，仲問過我咩係Core Java，我呢啲IT人講嘢唔識得修飾，所以嗰次忍唔住問返佢：「你真唔識定假唔識呀？你之前公司冇接觸過咩？仲有上次開會講嘅CSS同HTML……」
真心，唔係想寸佢，我只係覺得奇怪，因為就算唔係做IT都應該或多或少聽過啩，先生你仲要係Manager喎！
佢答得非常坦白：「我真係唔識㗎，之前間公司都唔使用到呢啲。」
我：「但係你嚟見工唔係要識呢啲咩？點會呀？唔好玩我啦！」
「講樣嘢畀你知，我見到廣告話請IT Manager，要有website經驗，咁我咪send囉，之前我真係幫公司搞website，不過唔使自己寫嘅，坊間好多網站畀錢就有template，要咩design都有，就算要有埋online shop都係撳個掣，邊使好似呢度咁麻煩㗎！我send咗好多份工㗎，得呢度有得見，咁我有舊公司信紙，個公司印就搵舊同事幫手吸，我話自己做咩position都得啦！」
我：「咁都得？不過你見工都會問你啩！如果唔識點可能in得成呀？」
「呢度個HR都唔識IT嘢，見工嗰陣冇問咁多，淨係叫我show之前公司個website，咁我咪show囉，佢應該以為成個website係我一手一腳寫出嚟。」
咁我大約明白喇，由於之前嘅IT Manager同埋Assistant Manager相繼辭職，HR又唔係第一時間出招聘廣告，等到收到CV再約人上嚟in嘅時候，兩位Manager已經走晒，IT部群龍無首，又冇理由叫我呢個得兩年經驗咁淺嘅人in個IT Manager，所以HR自己in自己決定，關鍵係個HR本身都唔熟呢方面。
其實呢個新嘅IT Manager要見得成呢份工再入嚟做，可以話係充滿幸運成份，首先我哋個HR唔熟IT，點解我會知呢，因為呢個HR試過想print嘢問我點樣set做橫印……
HR：「Print極都係打直嘅，cut晒兩邊點搞呀，你幫我整整佢啦，我見其他同事可以print到打橫。」
「你撳呢度，咪有得揀直印定係橫印囉，仲可以揀係咪填滿張紙嘅size添！」
HR：「咁麻煩嘅，佢唔識auto㗎？又話係電腦？我仲叻過佢。」
係喇係喇，叻，你至叻，試問個HR連橫印都唔識，你點寄望佢知道咩係SQL、PLSQ、CSS, HTML, XML/JSON，然後再考個candidate呢？重組案情，件事又變得好合理喇。
其實呢單嘢都有少少關個Assistant Manager事嘅，可能HR諗住之前個IT Manager走，仲可以叫個Assistant Manager幫手In，點知嗰位Assistant Manager知道自己冇得升就好嬲，直頭遞信扣假提早走，結果就演變到而家呢個局面。
新呢位IT Manager之所以問我咩係SQL同埋PLSQL，就係因為HR搵咗個candidate上嚟in Assistant Manager個空缺，然後我又喺度諗，今次幫你in冇問題呀，如果請個有料嘅Assistant Manager返嚟，呢個新嘅IT Manager仲坐唔坐得耐，但如果連AM都係呃飯食，最後咪做死我？
我出面啲朋友聽完之後，個個都叫我同HR講，嘥氣啦，都係嗰句，HR連點樣橫印都唔識，有咩好講呀？咁我又唔會周圍同其他部門啲人唱通街嘅，呢個唔係我性格，亦無謂打爛人哋飯碗啦，正正經經in個AM返嚟，由得個AM發現囉！
話說回頭，其實呢間公司請人都幾俹簁(音：乸西)，或者應該話呢個HR做嘢好俹簁，請個IT Manager咩都唔問，咩都唔test，求求其其滾水淥腳搵咗個乜都唔識嘅人返嚟，咁佢點解當初唔畀機會上一手AM啫？有時畀啲機會內部同事晉升，唔止交接可以順利啲，連帶士氣都會好啲啦！