公司嚟咗個新女同事，我都唔識點形容佢，講得太盡又好似mean得滯，而其實唔少都市人都有佢嘅問題，舉個例，我哋公司喺灣仔，而我同佢有時放工會搭埋同一架小巴出荃灣，我總站落，佢就早啲，要喺光輝圍落車。
搭過兩次，第三次見佢光輝圍冇落車，咁我咪多口問句：「今晚出荃灣咩？約咗人呀？」點知呢位新女同事答我唔係，原來呢程車冇任何乘客嗌光輝圍有落，而佢自己又唔好意思嗌，有種怕瘀嘅感覺，又覺得司機好惡喎……
我：「呢條線嘅司機係惡啲，不過你都冇理由到站唔叫落車㗎喎！」
「由細到大我都係咁㗎，大聲嗌有落會好尷尬，又驚司機聽唔到飛站好瘀。」
我：「瘀？點都好過你要出去荃灣再轉車返屋企吖。」
「唔緊要啦，我行一陣先返去囉，所以我鍾意嗰啲有得撳鐘仔嘅小巴，最衰唔係架架都有鐘仔，有時同一條線又會有啲小巴有，有啲就冇。」
搭小巴唔好意思開口嗌有落，連出去食lunch漏單都唔好意思追個侍應，有次我哋一行三人大約1:05去到餐廳，大家一齊叫咗set lunch，雖然主菜唔同，不過一樣有甜品，我同另一位同事個餐正常速度嚟咗，新女同事嗰個反而遲遲未到。
我：「追下佢啦，係咪漏咗單呀？」
「唔緊要啦，可能我嗰個有雞扒所以要煮耐啲，費事催人啦。」
雖然嗰陣已經1:30，不過是但佢啦，同事啫，我又唔係佢家長，唔通餵埋你飲奶同換尿片咩，都咁大個人喇。
期間再叫呢位女同事催一催會好啲，但佢始終唔肯，直至1:40分，侍應上咗3個甜品……
首先呢，甜品係食完主菜先上，其次係，我同另一位同事已經食晒，仲要就嚟夠鐘返公司，仲等咩呀？等中秋呀？
我決定唔再問女同事意見，直接向侍應講有個主菜未到，對方即刻講晒唔好意思，仲話應該係廚房漏咗單，其實lunch呢啲繁忙時間，漏單情況耐唔耐都會出現，作為顧客就算體諒亦應該有個譜吖，等咗40分鐘喎，開口催下好合理啫，唔知個女同事擔心啲乜。
結果女同事個主菜隔咗3分鐘就到咗，set lunch好多都係整定，隔籬枱遲過我哋嚟，有人都係叫雞扒，而家都食完再埋單走喇。
我：「如果唔幫你追，lunch又夠鐘要走，你係咪打算照埋單唔出聲㗎？」
「哈哈，可能㗎……」
另一位同事：「唔係啩，應該形容你係怕醜定內向？如果你係男仔，我會覺得你好懦弱同怕事。」
我：「算啦，唔好同佢講嘢喇，得返好少時間咋，畀佢嗱嗱聲食埋個lunch啦！」
漏單唔好意思追，落車唔好意思嗌，我哋身邊總有一類人係咁，唔算罕見嘅，不過呢位女同事實在太誇張，佢係連自己人工有幾錢都唔好意思問，成件事係咪匪夷所思？人工喎！錢喎！打工唔問人工？為興趣呀？
話說呢位女同事做咗約莫兩個半星期之後，突然走嚟問我：「係呢，可唔可以問你幾錢人工呀？唔好誤會呀！我唔係八卦，因為想估計自己有幾錢人工咋。」
我：「估計？點解要估計？你唔記得咗自己幾錢人工呀？」
因為佢當時未做夠一個月，我曾經以為係冇出糧紀錄，而佢又唔記得咗HR講嘅offer有幾多。
「唔係呀，HR冇講過我幾錢人工。」
我：「咪住先，就算HR冇講，你都有份contract㗎嘛！睇返咪得囉！」
「HR冇畀contract我，你哋有contract㗎？」
我：「點會冇contract呀？人人打工都有contract㗎啦，你又唔係炒散，長工嚟㗎！你求其問個friend，佢哋啲公司都會有合約啦！」
「我又唔係驚HR呃我，不過真係唔知幾錢人工，佢好似冇正式講過。」
唔係驚唔驚HR呃你嘅問題呀，係你嘅人生仲有漫漫長路，我驚緊你以後點樣生存喺呢個世界上呀！
原來女同事interview咗一次，過程中HR有講過福利，例如有雙糧同埋幾多日大假之類，但就冇談及到人工，然後女同事隔咗一日就收到HR電話，叫佢幾月幾號正式返工，呢一趟電話又係冇傾人工，返工第一日亦都冇contract，點搞呀？我哋個HR出名又忙又大頭蝦，不過都冇理由請個人返嚟唔使簽contract啩！
我：「Contract你又冇簽，咁出糧戶口呢？都要報㗎，你月尾份糧入去邊呀？入落馬會定係麥當勞叔叔之家？」
經歷咗漏單唔敢追嗰件事之後，我今次冇等女同事嘅首肯（好肯定佢寧願等到月尾打簿都唔會問清楚），直接幫佢搵HR講，留意返吖，條女因為唔好意思，係冇跟埋我去人事部㗎！！！不過而家講緊佢份人工喎，係咪荒誕過科幻小說？
不出所料，HR果然唔記得咗，一單還一單，女同事係怕事同埋內向，但係HR嘅本份的確冇做足，最後份糧係跟返女同事填嘅expected salary，總算冇不愉快事情發生，HR同埋女同事呢對「孖寶」真係絕世雙驕。
HR：「哎呀，我唔記得咗呀，佢又唔問我嘅！月中喇喎！」
我：「仲賴人？ 人工唔記得confirm，contract又唔記得畀，快啲問佢拎出糧戶口啦，你要搞autopay㗎！仲有MPF呢！」我出埋你哋呢對絕世雙驕份糧好唔好？
沒有更荒謬，只有更荒謬，換言之，撇除啲咩合約同埋勞工法例等問題，新女同事係喺唔知道自己幾錢人工嘅情況下，就咁做咗兩個半星期，難聽啲講句，公司可以話冇請過你，係你自告奮勇走嚟做義工。
明白呢個世界總有人係內向同怕醜，不過都希望呢位女同事可以克服心魔同埋性格上嘅缺陷，冇人有義務幫你嗌落車，冇人有義務幫你追單，冇人有義務幫你搞清楚工作嘅細節，生活上有好多嘢係要自己爭取同出聲㗎！