早幾日我in咗兩個求職者，簡單嚟講就係一男一女，佢兩個無論background同埋面試表現都半斤八両，咁就掂啦，交畀老細自己做second interview慢慢揀，兩份resume擺喺枱面，次序上咁啱係男仔嗰份先。
老細拎起份resume，男嘅慢慢揭慢慢睇，然後到女仔嗰份，佢望咗一秒啫，真係一秒，跟住連後面幾頁都冇揭就丟埋一邊：「呢個唔要！你淨係約個男仔上嚟second in啦！睇下仲搵唔搵到多一個等我比較下。」
我咪就係知你嘅pattern鍾意二揀一，所以例牌揀淨兩份resume畀你囉……
我：「個女仔唔見呀？我覺得佢幾好㗎喎，英文又流利，同埋之前份工都做咗好耐。」
老細：「唔見！一睇就知唔掂啦！」
你唔係一睇就知唔掂，你係一秒就知唔掂喎！我拎返啲resume出去嘅時候，曾經盤算過佢係咪性別歧視，不過又唔係吖，上星期有個position我又係畀佢二揀一，佢見完之後請咗個女仔㗎喎，難道係舊相好？應該冇可能喇，老細50幾歲，個女仔20幾歲，做得父女有餘。
父女父女，唔通係有親戚關係？唔似喎，一個姓顧，一個姓鄭，又唔通係嫌個女仔唔靚？問心嗰句，兩份resume咁啱都有相，個女仔真人同上鏡都唔差吖，究竟係咩事一見到份resume就咁厭惡呢？
由於人事部有分工，我又已經做咗一年，所以我同阿姐係會分別負責唔同嘅position，見唔同嘅求職者，佢已經放晒手交畀我，好耐冇問過阿姐意見喇，但係今次實在摸不著頭腦，所以我都拎埋份resume走去搵阿姐請教。
我：「頭先畀兩份resume老細睇，呢份佢睇咗一秒就丟開話唔見，仲話一睇已經知唔掂，我in呢個求職者嘅時候覺得佢幾好㗎，你可唔可以幫幫眼望下，係咪有咩細節我留意唔到？」
阿姐一拎上手，反應同老細頭先一摸一樣，唯一唔同嘅係阿姐個樣唔係嫌棄：「哦！佢衰在叫Carmen囉！」
我聽緊啲咩？
我：「衰在叫Carmen？唔明。」
阿姐：「好耐之前我都遇過你呢種情況，不過你入嚟之後冇遇到，所以醒唔起要提你，總之個求職者叫Carmen佢就唔會請唔會見㗎喇，呢個女仔冇問題，你都冇問題，係老細對呢個名有偏見啫，咁都冇辦法啦，佢係金主，我哋控制唔到。」
我：「Sorry，叫Carmen有咩問題，有冇上文下理畀我之後請人參考下？」
衰成日轉工我聽過，衰唔夠經驗又聽過，衰英文唔好我都聽過，就係未見識過點解會衰喺叫Carmen呢個名手上。
阿姐：「我記得有一次又係隊咗份叫Carmen嘅resume畀老細，然後佢掟返畀我，不過嗰次因為得一個求職者合適，加上我又鍾意打爛沙盆問到篤，結果畀我chok到個原因，老細話以前有個女朋友叫Carmen，呃咗佢好多錢。」
我：「唔係啩，因為咁樣所以憎晒全世界嘅Carmen？」
阿姐：「佢話自己嘅經歷好慘痛，買咗層樓畀對方，最後分手搞到要打官司，十足十周星馳同于文鳳單嘢咁。」
我：「但係我手上呢個Carmen，同當年呃佢錢嗰個Carmen，係兩個唔同嘅人喎！」
阿姐：「你講嘢咁似我當年嘅，不過我係兜口兜面咁同老細講，佢話帳面畀個Carmen呃咗近70萬，加上要打官司之後，見到呢個名就驚，見到呢個名就諗起以前嘅事，都係嗰句啦，老細始終係金主，佢係唔肯請，你迫到佢見咪盞個求職者難受，老細interview嘅面口肯定唔慌好，隨時仲會玩人，既然勉強冇幸福，佢又對Carmen呢個名先入為主，咁咪由得佢囉！」
Carmen呢個名其實好普通，不過我公司又真係冇一個同事係叫Carmen，但我知道未來嘅日子一定會收到叫Carmen嘅resume，假設對方條件真係好合適，因為人哋個名而唔畀機會又好似有點兒那個。
阿姐：「總之你第日見到求職者係呢個名就飛啦！仲有喎，中文名叫嘉文、嘉雯、卡文、家文、家敏……等等，老細都唔會請㗎，佢前女友就係中文名叫唔知咩嘉雯，所以英文名先會叫Carmen，老細一聽到就好大反應㗎喇，有啲求職者嘅身份證雖然冇落Carmen，不過佢哋介紹自己嗰陣都會講，唉，避得就避啦！」
唔知道香港有幾多個Carmen，只係知道我公司有一個傻人，呢個就係我老細。