近排見到又多咗報道話有人跌入求職陷阱，然後又有幾廿個假嘅求職網站，令我諗返起一單2020年發生嘅事，印象中曾經收過一個電話係問我幾時可以見工，聽到一頭霧水，公司根本冇請緊人，無啦啦見咩工呢？問對方叫咩名又冇答就cut線。
後來有一次，嗰朝早我大約8:50返到office，當時有個四眼嘅女仔我估廿到尾三十頭咁上下年紀啦，我一出電梯門就見到佢企正喺公司門口，好在日光日白同埋係女仔咋，否則真係嚇親，因為佢阻住開門，所以我一路拎鎖匙一路講：「唔該借借，請問有咩幫到你？」
「我今日第一日返工。」
我：「返工？邊個部門？」我咪係公司唯一嘅HR囉，點會請咗個人而係我未見過㗎？幾時請人呀？
「跟單嗰個部門。」
因為我哋冇一個部門係特別mention跟單，但係即刻叫佢走又好似怪怪哋，我又唔知呢位小姐係咪搵錯地址定係點，既然都係女仔又唔覺有攻擊性，我就禮貌地叫佢入嚟office慢慢講，搞清楚件事先。
我：「小姐你係咪搵錯公司？我哋應該冇請人喎，你搵邊間公司？」
「XX公司囉，門口個招牌都寫住。」
我：「係呀，呢度係XX公司，又或者咁，係邊個叫你返工？」
「梁小姐叫我今日返工㗎！」
當時我諗緊會唔會老細定邊個私底下請啲皇親國戚，不過冇理由吖，老細冇呢個先例，同埋我哋公司啲位係啱啱好，針插都唔入，邊有吉枱畀你做嘢。
由於仲有少少擔心係內部人事，驚搞錯，所以我請呢位小姐坐低傾得詳細啲。
我：「呢度冇梁小姐，公司亦都得我一個HR，由我負責請人，所以如果見過你同埋請咗你，我冇理由唔知。」
「但係我同梁小姐喺電話傾晒㗎喇，佢話覺得我好適合。」
我：「即係你冇上過嚟呢度？淨係電話見工？我哋公司真係冇梁小姐呢位員工，男同事就有姓梁，你會唔會搞錯咗？」
「唔係呀，係女人嚟㗎！」然後佢就拎部電話出嚟，開埋WhatsApp畀我睇同埋聽一個voice msg。
唔play個voice msg猶自可，一play已經知道係呃人，把聲有濃厚鄉音嘅喂！
我：「我諗你畀人呃咗喇小姐，我哋真係冇請人。」
然後個女仔唔放棄，好努力咁show佢WhatsApp裡面其他關於呢份工嘅文字msg畀我睇，又講咗好多經過，其實除咗公司名同地址係正確之外，內容所講嘅嘢冇一樣同我哋公司脗合，就連行業都係錯。
傾下傾下，都已經9:10，公司嘅同事陸陸續續返嚟，老細都返埋嚟，個個圍埋嚟了解發生咩事。
老細了解咗件事之後皺晒眉，相信係關乎公司嘅名聲，因為佢幾躁底同埋幾緊張，不過我哋咩都做唔到，唯有請呢個女仔先離開，但係呢個時候佢忽然爆喊，呢下真係始料不及。
原來一直用WhatsApp溝通嘅梁小姐已經block咗佢，send msg冇回而且係得一個剔，但呢個並唔係佢爆喊嘅原因，呢個女仔竟然大嗱嗱畀咗兩萬蚊對方，佢話係介紹費，仲要透過一條link上網畀錢，雖然係兩年前啫，都已經係2020年吖，搵工要candidate畀錢，仲要網上過數咁多疑點都中招……
問個女仔喺邊度見到我哋公司個請人廣告，佢話係fb一啲招聘group，個post冇列明公司名，聯絡咗出post個人之後先會喺WhatsApp講喎！
老細同我都叫佢報警先，我哋都有報，好在之後公司冇再遇到呢啲事，相隔兩年應該安全喇，不過就唔知嗰個女仔最後追唔追得返啲錢。
其實當時見到呢個情景，我覺得好心酸，因為個女仔曾經講過一句：「不如你哋請我吖，咩職位都得㗎！」
老細都覺得個女仔好慘，但冇可能你中招要我哋埋單，先唔講對方適唔適合份工，咁公司真係冇需要請人。
近呢兩年斷斷續續見到有啲求職陷阱新聞，大致都係有人假冒某公司喺WhatsApp, TG, FB group呢啲地方請人，有部分就唔係用介紹費呢招，而係叫你碌卡或者買點數幫公司做嘢，之後會claim返錢，真心唔明點解仲會有人信，不過亂世出妖獸，個市愈係唔好，出面就愈多呃人嘅陷阱，希望大家搵工嘅時候小心啲，唔好因為心急而做一啲魯莽嘅決定。