行房要Make Appointment :壓力好大

男同事最近冇厘精神,做咩都提唔起勁,就連成班人圍埋傾咸濕嘢佢都冇參與,明明係咸濕界嘅始祖,突然間變咗太平紳士?成件事好唔尋常喎,唔通陽痿?我拍一拍佢:「喂,你鍾意嗰個女優引退喎,有冇少少傷感呀?告別作download咗未?」

「冇睇AV好耐啦,跟甩晒,第日先download返囉,又唔會冇seed嘅。」冇睇AV好耐?呢句其實同冇咗呼吸心跳好耐有咩分別?不過講開又講,真係好耐冇聽過佢講任何咸濕嘢,近呢半年成個人都正經咗好多,一個人咁大轉變好得人驚㗎嘛!

我:「咩事啫?不舉呀?」

「好煩呀你,唔講嗰句都講埋,老婆限時限刻要我交功課,所以唔敢睇AV呀,驚對住老婆不舉,要時刻留力。」

結咗婚兩年咋喎,未致於咁快對住老婆不舉吓嘛?男同事話係壓力問題,因為老婆每次做愛都要Make Appointment,等等,Make Appointment?

「間唔時佢會whatsapp一幅圖畀我,係一幅highlight晒佢幾時嚟M嘅schedule,提醒我邊日同邊日要交功課,仲有,如果當日沖完涼佢突然走去剃格肋底毛同腳毛,咁潛台詞即係話---今晚要!」

男同事仲分享咗一單嘢,佢話有次星期日瞓醒晨勃,見唔好㗰,於是就撩老婆搞嘢,結果畀佢老婆請食檸檬。

「老婆同我講,話第二日有個好重要嘅會要開,開完實好大壓力好抑鬱,所以想留返星期一至搞嘢,順便減壓,自從佢升咗職之後忙咗好多,不過最估唔到係連搞嘢都要Make Appointment同埋遷就工作嘅時間表,服咗佢!」

我:「唔同,Make咗Appointment要改好麻煩,要同好多人溝通,但如果你真係唔想搞嘢,同阿嫂講一聲咪得囉,兩公婆嚟㗎嘛,有咩可以開心見誠講喎!」

「如果我冇搞,老婆會即時黑面,感覺上好似欠咗佢咁,所以有時我都想速戰速決,當係了咗件心事,希望搞完嘢就可以輕輕鬆鬆出返廳睇波打機,有次試過趁佢上床瞓覺嗰陣,我自己剝晒光豬跟埋入房,佢話覺得我當搞嘢係任務同工作,又嬲咗我,大佬呀,想我點呀?」

我:「唔好咁樣,其實搞嘢係開心事嚟,又要速戰速決,又要Make Appointment,而家係行房,唔係行刑呀。」

「第時等你結咗婚就明㗎喇!就算畀你娶到三上悠亞,日對夜對,久而久之就會冇咗當初嗰份激情,同埋講實要幾月幾日幾時幾分做愛,感覺就好似約實個客開會咁,都唔係嗰種feel啦!我唔想用交功課嚟形容,不過真係好似老細要我哋交report一樣,壓力好大。」

再係咁搞落去,我都擔心同事嘅處境會變成無性婚姻,因為Speed Dating啲客裡面,都有部分係離婚後回復單身,有人分享過自己結婚後第一年已經冇乜點同另一半做愛,可能半年先一次,慢慢再演變成為單純地同床。

曾經有傳媒講過類似嘅問題,並歸咎於香港住屋太細,如果有咗小朋友,兩夫妻就更加難有性生活,但其實無性婚姻唔係香港獨有,外國都好嚴重,早幾年就有本暢銷書叫《無性的婚姻》,當中講到美國有超過二千萬對夫婦每年嘅性生活次數不足10次,希望第時我結咗婚唔會變成咁啦。

error: