我：「你點解要咁做呀？係咪有咩苦衷？Mabel姐好似五十幾歲，離咗婚有兩個女，大你十幾年，你個樣又唔似35，拖住手就算唔似母子都似兩姐弟，你真心咩？班同事傳得好勁喎，話見到你哋食飯撐枱腳。」
Dave：「你唔好講到Mabel咁差啦，係，佢係53歲，不過仲keep得好好㗎，你未見過Mabel後生啲相咋，好似個女藝員林凱欣，嗱，所以佢個女真係似林凱欣。」我即刻search下邊個係林凱欣，哦～～～不過就算似李嘉欣都好啦，Dave 35歲，Mabel 53歲，差18年，認真咩？
Dave係化名，不過佢真係令我懷疑自己咁早結婚係錯，因為條友仔嘅感情生活多姿多采，唔知Dave喺出面係點樣啦，淨係計公司裡面，呢3年佢已經同過4位女同事拍拖，唔想講都要講句：「啲女畀你溝晒啦！」
特別係佢入嚟公司做之後嘅第一個女朋友Jessica，26歲，剛畢業從加拿大回流，典型妹妹仔，唔少男同事都對Jessica「表示關注」，但由於Dave正正坐喺Jessica隔籬，近水流台先得月，兩個人好快已經打得火熱，日日交頭接耳，食lunch同放工又好似孖公仔咁，所以都算好公開。
講咗咁耐都唔記得形容Dave嘅外型，佢今年踏入35歲，同Jessica拍拖係3年前，即係佢當時32歲，未婚，都靚仔㗎，五官端正，身材高高大大，返工著西裝乾乾淨淨係睇得下，同埋我哋公司Single嘅男同事有3分2都「甩皮甩骨」，所以Dave拍落班毒男身邊會顯得更加出眾。
Jessica做咗半年就搵到另一份工，大家都以為佢同Dave仲keep住一齊，點知有同事放工撞到Dave拖住第二個女仔，而嗰個女仔亦係我哋公司嘅同事。先解釋公司嘅環境，我哋一共有4層，當中3層係連住（eg 17樓至19樓），另一層就零零汀汀隔開（eg 4樓），主要係坐HR同埋Admin，而Dave嘅新女朋友就係呢層嘅其中一位HR 阿靜。
即係咁，樓層唔同，你識到HR唔出奇，interview嗰陣點都見過，但識咗之後又點樣熟絡呢？我哋公司嗰3個HR包括阿靜其實都幾寸，真心未見過佢哋笑，畀人嘅感覺好cool，如果HR搵得你一定唔慌係好事，你仲要追埋嚟做女朋友？
嗰陣我同Dave已經好熟，因為大家都鍾意運動，特別係NBA同網球，會傾下波，所以我開心見誠問佢：「你點溝阿靜㗎？」
Dave：「冇呀，入職嘅時候我用中國銀行出糧，後來開咗個匯豐，咪搵HR幫我轉出糧戶口囉！咁啱阿靜幫我，無端端加重佢工作量唔係幾好意思，所以我就買杯珍珠奶茶請佢飲，順便落去填表，大家傾下傾下然後就熟咗，我又請佢食飯，其實班HR唔係咁cool㗎咋！」
高手，轉出糧戶口都畀你溝到女，印象中阿靜同Dave年紀好接近，大家都係30幾歲，不過拍咗唔夠一年又散咗，原因佢冇講。
再之後Dave就同另一層樓嘅Shipping同事Yumi拍拖，呢個女仔大Dave少少，唔知佢哋幾時搞埋一齊，只係知道大家都出貨嘅話，Dave嘅船期永遠都係優先，加埋Shipping平時唔會點上嚟我哋呢一層，不過嗰期Yumi就頻頻上嚟企喺Dave個位打牙骹。
Dave溝女叻之餘，佢最勁係心理質素，閒言閒語永遠唔會理，你有你講，佢有佢溝，後來唔見Yumi再上嚟已經知咩事，呢個時候公司又傳出Dave有新女，對象竟然係會計部嘅阿姐Mabel，因為有同事喺圓方見到佢兩個撐枱腳，我哋部門同Account基本上唔需要直接往來，而且Mabel始終係阿姐，真係大纜都扯唔埋。
我：「Mabel姐你又點溝㗎呢？我入嚟公司5年，同Mabel姐講嘢應該冇10句。」
Dave：「冇呀，有次喺樓下一齊等電梯，我讚佢條裙好靚，跟住大家就好自然咁傾計囉，我又膽粗粗約佢食飯，你知唔知Mabel先係咁多個女朋友入面最難追嗰個，佢擔心年紀問題，怕我玩玩下，同埋唔可以畀佢兩個女知道喎，不過呢，真係好有成功感。」
我：「我唔知聽咗啲乜，姐弟戀好有成功感咩？差十幾年喎！」
Dave：「我想試下四層樓都有女朋友，你唔覺得係成就解鎖咩？」
聽到呢句突然有啲心寒，究竟Dave係真心鍾意Mabel吖，定係為咗成就解鎖公司4層樓呢？如果你對網球熟悉，應該聽過咩係大滿貫，即係一個網球手喺澳洲、法國、英國，仲有美國嘅4項大賽中奪冠，鑑於呢4個大賽嘅場地都有唔同特性，例如法國係紅土場，溫布頓係草地，所以要贏盡大滿貫係極高難度。
Dave喺公司4層樓都分別溝到女，難度分亦相當高，4層樓不同風格，HR & Admin嗰層有啲冷，Shipping嗰層嘅人比較宅，Account嗰層阿姐級員工比較多，我哋嗰層就主力係後生女，26歲至53歲通殺，每個年紀都有唔同性格，真係佩服Dave，唔知佢緊接落嚟係咪挑戰不同部門呢？ IT Department全部係仔，Dave又會唔會為咗成就再解鎖而斷背山呢？
生得靚仔真係好。
情侶座今日都有新文章
行房要Make Appointment ：壓力好大
https://hkofficedaily.com/?p=21465