清潔阿姐做唔停 「嗰個係老闆阿媽嚟㗎!」

返新工第一日,印象最深刻係公司一位清潔阿姐,因為當我坐埋個位嘅時候,佢特意走嚟抹張枱、抹電腦Mon、抹Mouse,連Keyboard都一絲不苟咁樣抹啲坑位,打過咁多份工都未遇過咁盡責嘅阿姐,而且作為新同事,冇畀人當透明確實好感動。

「唔該阿姐!」呢句我係由衷咁講,阿姐亦有答我:「唔使!最緊要乾乾淨淨,健健康康,入面個櫃(佢指住Pantry方向)下格有啲清潔用品,平時你鍾意都可以拎塊布去抹,啲布我每日洗得好乾淨㗎!有冇自備杯?如果冇呢,上格都有好多杯,用完放低就得,我會洗。」

認真講句,呢個阿姐比其他同事更忙,因為見佢成朝都掃地吸塵,抹呢樣抹嗰樣未停過,我仲睇住佢踎喺reception前面起勢咁捽,原來係地下有啲唔知咩漬,類似有人踩到香口膠再踩入office,但係阿姐超有耐性不斷刮不斷抹。

最勁係呢位阿姐會拎住個水樽巡下同事有冇飲水,聽到佢同我後面個女仔講:「要唔要水呀?溫水嚟㗎,唔凍。」女同事禮貌回覆:「好呀,唔該晒!」跟住阿姐又答:「唔使唔該,我想斟晒啲水畀你哋,騰返個壺出嚟啫。」兩個人嘻嘻哈哈好好傾。

我唔識分佢係茶水阿姐定清潔阿姐,因為我以前公司嘅Pantry Lady只係負責茶水間裡面嘅嘢,起碼唔會吸塵,但呢個阿姐就一腳踢,唔止細心有耐性,同其他同事嘅關係仲好好,個個人都同佢有講有笑,外交手腕極強,始終辦公室裡面好多人都唔會同姐姐講咁多嘢,亦未必會咁好笑容,睇得出佢哋關係好好。

做落咗之後我開始帶飯,有次去pantry叮飯盒,阿姐自己睇緊報紙,佢又好熱情咁同我吹水:「點呀後生仔,喺度做得慣唔慣呀?」

我:「慣呀!呢度啲同事都好好!」

阿姐:「咁你畀心機做喇知唔知呀?」

講真我有少少……唔識形容,因為阿姐嘅說話好鼓勵性,不過聽到係幾窩心。

我:「係喎,都仲未問你點稱呼?」

阿姐:「你叫我Susie啦!」

我又係唔知點形容,因為我以前公司啲姐姐通常自稱乜姐乜姐,好少用英文名介紹自己。

我:「Susie姐,我叫阿奇。」

阿姐:「哦,咁我叫你奇仔。」親切到呢!

同日我隔籬位個同事食完lunch返嚟,唔小心跌咗杯珍珠奶茶落地,真係一地都係,我本身想入pantry幫手拎抹布或者搵地拖之類,咁啱Susie姐喺度,我就同佢講:「同事倒瀉嘢,可唔可以幫手抹呀?」

Susie姐二話不說就拎嘢出去,我殿後跟住,一埋到位同事們都好緊張,個個搶住啲嘢嚟清潔,Susie姐就話唔緊要,等佢做,Manager好緊張咁對住我哋講:「你哋倒瀉嘢自己清理吖嘛!」

Susie姐:「唔緊要,我嚟啦,手板眼見功夫啫!」

Susie姐搞掂之後,Manager捉住我問:「你叫Susie抹㗎?」

我:「係呀……做咩?係咪唔應該搵Susie?」

Manager:「下次自己抹,盡量唔好煩到Susie,費事啦!」

我:「點解既?驚姐姐(我讀音係「遮遮」)唔鍾意我哋倒瀉嘢?」

Manager:「佢唔係姐姐,佢係老細個阿媽嚟㗎!」咁大鑊?我幾分鐘前先吩咐老細阿媽抹地咋喎?

聽返Manager講,老細阿媽驚自己退休後冇嘢做,好容易有老人痴呆,所以堅持要返嚟公司幫手,但佢唔識做文件嘢,故此就好似清潔姐姐同Pantry Lady咁,管理晒office嘅清潔同雜項工作,唔怪得人人對Susie嘅態度都恭恭敬敬啦,又唔怪得Susie叫我畀心機做嘅語氣係咁特別啦!

後來同其他同事講開,個個都話Susie好有耐性好勤力,但與此同時亦畀咗大家一定壓力,因為分唔清Susie係咪單純清潔定係會留意同事有冇偷懶,同埋老細個阿媽幫自己抹枱倒垃圾,真係用幾多時間都適應唔到。

其實佢哋講嘅呢種壓力我後期都feel到,不過講到尾Susie的確好貼地同埋好有親和力,仲要毫無架子,點都要畀個讚佢。


曾確診被埋怨 單打說話不斷
同事:「講笑啫,唔係嬲呀?」
https://hkofficedaily.com/?p=21450

error: