愚人節玩驗孕棒玩到分手

2022年啦,愚人節仲玩驗孕棒呢啲爛gag?每年嘅呢一日,身邊總有啲friend會收到女朋友msg,內容係一支驗孕棒,然後話自己有咗,想試下個男仔會唔會負責任,玩出火我都見過幾次,好玩唔玩做咩搵呢啲嘢嚟玩呀?

見過有個蠢仔load唔切,又冇為意當日係愚人節,佢知道女朋友「有咗」之後竟然猶豫,走嚟搵我哋班男仔傾,而原來佢已經回覆咗唔想咁後生結婚,唔想要個BB,如果真係好想生出嚟,可以金錢上support照顧,但唔建議女朋友咁樣做……

望一望個月曆,4月1日愚人節,我哋叫佢唔好咁死蠢,問清楚先,咪一嚟就話唔想要個BB,點知一切都太遲喇,個女朋友嬲咗,仲要係堅嬲嗰隻,雖然下場未致於分手,但之後成日會為呢件事鬧交,久唔久又摷返出嚟嘈,你當初開呢啲玩笑有乜謂呢?

另一單仲經典,又係條女喺愚人節話自己有咗,希望男方會同佢結婚,因為好想生個BB出嚟,唔希望扼殺一個小生命喎,個男嘅又係意識唔到係玩笑,好認真咁話唔會負責,仲要求同個女仔分手,而佢哋亦真係因為呢件事散咗。

開個愚人節玩笑搞到散咗?係呀!個男仔畀返啲msg我哋睇,大約見到啲對話係咁:

女:「個BB無辜㗎!」

男:「無辜?我仲無辜喎!我哋半年冇搞過嘢,你同我講有咗?你想我食死貓呀?」

女:「同你講下笑之嘛,你睇下今日係咩日子先啦,你使唔使用食死貓呢個字咁難聽呀?」

男:「搵呢啲嘢講笑?你驚我鬧你之嘛,老老實實,個BB邊個既?係咪你之前條仔,我知你兩個仲有聯繫㗎!」

女:「你痴線㗎!你當我係咩人呀?我係咁隨便㗎咩?」

男:「唔隨便?我親眼見到你生日嘅時候,你之前條仔send msg畀你,我一直唔出聲咋,你夠膽講冇咁嘅事?」

女:「咁生日佢禮貌上同我講Happy Birthday啫,我覆咗句Thank you之後都冇同佢傾啦!」

男:「你講我就信呀?咁你話有咗BB係咩事呀?次次我想做你都話攰,而家突然話有咗?」

女:「都話係講笑,愚人節呀!April Fools呀識唔識聽呀?你講嘢係咪要咁刻薄呀?」

玩啦玩啦!搞出個大頭佛最終收唔到科,散埋!

今朝我哋幾個同事傾緊呢啲愚人節fail例子嘅時候,其中一個男同事咁啱收到佢女友msg,一支棒棒相加一句:「仆街!六合彩又唔見我中。」

男同事得戚咁同我哋講:「啲女真係好幼稚,我就即刻答佢結婚同埋幫BB改名。」

我:「等等先,呢支唔係驗孕棒喎,係快測棒喎,你女友應該係講緊確診……」

男同事:「唔係啩!」

係呀,佢女友快測兩條線,中咗,不過我同事原來成個月冇同女友出街,否則我哋全公司都可能要集體住方艙。

error: