公司較早前嚟咗一波大裁員，被裁嘅人固然難受，但係留低嘅人可能更痛苦，因為大家都擔心會成為下一個被辭退嘅員工，冇人想喺咁嘅時勢之下失業，漸漸地office成個生態就出現轉變，冇任何一個同事夠膽收工，至少唔敢第一個收工。
以前夠鐘6點走人嘅場面不復再，個個都唔想成為第一個起身離開嘅人，所以OT到9點幾10點已經變成常態，你一熄Mon孭袋就會畀經理窒，但其實經理都係等緊有人走佢先夠膽走，仲有嗰種死寂嘅氣氛，有時喺公司真係會覺得唞唔到氣。
不過OT又唔係冇嘢做扮忙，因為大家真係忙，大裁員每條Team都少咗人手，好似我個部門咁，本身有9個人，而家得返5個，換言之以前9個人做嘅嘢而家攤分落5個人身上，老細亦講明今年內唔會有budget再請人，須知道而家只係年頭，所以呢種情況同埋工作量喺短期內都唔會改變。
最遺憾係市道差個個都逆來順受，即使面對不平等嘅待遇都唔知可以點做，例如有同事確診，唔可以返office要繼續Work from Home都算，但老細要人接受無薪病假，咁唔係好犯駁咩？既然當無薪病假，咁點解要assign工作畀個員工做，佢有做嘢就唔應該無薪啦！
喺疫情下我呢啲case 只係冰山一角，無論睇報道又好，睇出面啲討論區都好，其實有唔少公司都係咁樣對待員工，證實確診就炒魷都聽過，身邊亦有人係由陽性轉咗陰性超過一個月仲未獲准返工，又係被迫繼續放無薪假，究竟咁嘅日子幾時先至會完？
有個同事同我講：「後生仔，咁嘅環境OT唔算慘，失業先至最慘，唔好咁多怨言喇！」
明白佢講呢句說話嘅出發點係為我好，驚嚟緊繼續裁員會有我個名，但見到咁嘅情況真係好唏噓。
我都有OT，不過唔係等到有人收工先至敢走，純粹workload大咗好多，office hour根本做唔完，但我唔會遲過8點走，有時做得切甚至7點幾就鬆人，永遠都係公司裡面最早走嗰個，經理已經畀過好多次說話我聽，仲叫我不如自己resign，我話唔會，一係你就裁埋我，補返足啲錢。
佢話我自己走，嗰封reference letter會寫得好啲，裁員就會打laid off，拎去見工都唔好睇喎！我唔在意呀，寧願要補水，去見工我會向新公司講明個情況，如果咁都覺得係我嘅問題，即係新公司同而家冇分別啦！
最後我真係被裁，其實傍偟㗎，但唔可惜，希望我盡快搵到新工作啦！