有一年愚人節老細唔知係咪食咗過期偉哥，竟然喺group裏面send咗以下呢段message開玩笑：「各位同事，公司生意唔好，應該捱唔到幾耐，大家可以搵定工，多謝各位一直以嚟嘅付出🙏🏻」仲可以一字不漏打出嚟，因為仲睇得返個msg.
當時係朝頭早，老細個人係未返到嚟，同事見到之後都議論紛紛，有人好緊張，有人處之泰然，甚至有人直接喺個group裡面問：「今日4月1號愚人節，係咪開玩笑咋？唔好嚇我喎！」而老細竟然回答：「唔係玩㗎，認真！」
呢個所謂「認真」嘅玩笑一直保持到晏晝4點幾，原來老細係想畀驚喜我哋，唔止唔會執笠同炒人，仲有得加人工，雖然加幅個個唔同，不過人人有份，佢甚至將加薪信逐封逐封派到同事手上，營造收「大信封」嘅緊張刺激感。
好多同事話一早估到係玩嘢，因為冇聽過公司唔掂，HR同Account都收唔到風，個別幾個同事都有少少嬲，但由於見到加薪幅度理想，所以詐完型之後就冇事，仲反過嚟多謝老細，我都同老細講：「有錢大晒咩？等我仲同屋企人講就快失業。」
老細邊笑邊打圓場，佢話自己之前喺外國做嘢，好多鬼佬都鍾意咁玩，啲公司官方網站仲會出post好認真咁講一段流料，隨時上埋Twitter做到Marketing嘅功效，4月2出返個post話講笑咁又呃多一次like & share喎！
嗰陣有個新同事，我都唔記得個女仔叫咩名喇，不過佢好做得嘢，係幾outstanding，個女仔見到老細嗰段愚人節msg之後就辭職，因為佢當時仲未過試用期，但過咗一個月，所以不少於7日通知就可以走得，仲要留都留唔住。
原來個女仔嗰排同時見咗幾份工，雖然最後揀咗我哋公司，但係有另外一份就遲咗先向佢開offer，呢位同事本身都十五十六，諗住做生不如做熟，見到老細咁嚇人嘅留言之後咪唯有打去accept另一間公司嘅offer囉，老細想撲火叫佢留低，不過佢話lunch time嘅時候已經答應咗另一邊，傾好晒價錢同返工日子，唔想咁兒戲。
真係要強調一次，呢位女同事係好幫到手，醒目、有禮、有責任感，所以我哋係好放心將工作交畀佢，因為唔會有手尾跟，佢唔做即係要再請人，仲要花心思花時間再教下一個新人，咁你話老細呢個玩笑係咪開得太大呢？
老細可能礙於面子問題，仲要覺得呢位女同事點解可以咁快辭職有新工，咪講咗囉，人哋之前搵工唔止見你一份，啲offer又唔會一次過同日返晒，所以人哋有其他選擇真係唔出奇，香港得你一間公司咩？何況佢學歷同臨場應對一啲都唔差。
知道個女仔要走，老細仲嬲咗兩日，究竟係嬲人定嬲自己呢？但我哋就多得老細唔少，一個咁冇分寸嘅愚人節玩笑搞到要再請人，之後嚟咗兩個都係返咗幾日就走，第三個終於叫做穩定，不過醒目程度就差好遠，玩吖玩吖！開咗個玩笑，冇咗個同事喇！
仲有另一單愚人節玩出火事件，不過呢單唔係職場，係情場💔
《愚人節玩驗孕棒玩到分手》
https://hkofficedaily.com/?p=21259