Speed Dating嘅客不乏離婚人士，傾計時都會略略問起之前嘅婚姻，並非出於八卦好奇，只係能力範圍內想佢避免重複犯錯，最近有一位男會員Johnny講自己嘅離婚原因就令我印象深刻，因為有啲恐佈。
佢話有次喺屋企食緊飯，前妻講起自己嘅媽媽腰骨痛唔舒服，亦即係Johnny嘅前外母，咁Johnny就正常地出言安慰，都係嗰啲唔使太擔心，聽日帶去睇醫生之類嘅說話，然後前妻就忽然發火：「睇咩醫生呀？搵邊個醫生先？點解要等聽日？再拖落去點算？」
其實嗰陣已經係夜晚9點幾，一般醫生收晒工，前外母嘅唔舒服又未去到要睇急症，所以Johnny都唔知應該再講啲咩。
「如果真係好痛，一係帶外母去嗰啲24小時嘅醫務中心先吖，跟住我再搵返專科同佢去睇。」
前妻：「醫務中心有用咩？啲醫生都係亂嚟，如果我阿媽check到有咩大件事醫唔好，我都唔會畀你阿媽好過。」
Johnny直言當時標冷汗，雖然理解前外母腰骨痛唔舒服會令到前妻好擔心，但係關Johnny阿媽咩事？並非唔錫外母，只係你阿媽腰骨痛又唔係我阿媽造成，兩件事同兩個人點解會掛勾呢？
同類型事件唔係第一次發生，前妻每次工作唔開心，返到屋企都會發癲，仲講到明自己唔開心，Johnny都唔使旨意開心。
Johnny：「仲有一次我瞓著咗，然後前妻拍醒我，我問咩事？佢話瞓唔著，所以我唔可以瞓先。」
呢類人其實喺社會上好常見，你同我喺生活中都見唔少，我唔開心，你都唔可以開心；我搵唔到食，我都唔想你搵到食；我哋身邊多多少少都有呢一種人，不過發生喺兩夫妻身上就真係有啲恐怖，自己唔快樂，點解要剝奪另一半快樂嘅權利？
「咁你都忍到？」
Johnny：「就係忍唔到，所以變咗前妻囉！」
一齊生活都咁樣，Johnny承認提出離婚後情況更惡劣，好在通通已經過去，當時有朋友勸告忍耐下，仲話前妻可能只係心情唔好，發發小姐脾氣，但佢覺得長此下去好難承受，甚至會扭曲到自己成為同一類嘅人。
Johnny：「離婚之後嗰一兩年，我出入都好小心，唔敢識女仔，費事有咩事害咗人，而家過咗幾年，應該都安全喇。」
識講笑就好啦，希望Johnny下次唔會再遇到恐怖情人。