喪禮中，每當前來嘅人完成三鞠躬，再轉向家屬謝禮，阿豪都會忍唔住笑，個人覺得阿豪係知道發生緊咩事，無奈控制唔到亦表達唔到恰當嘅情感，但由於佢姐夫邀請咗其他人嚟，嗰啲人唔清楚阿豪嘅狀況，所以搞到姐夫覺得好尷尬同失禮，差啲忍唔住當眾郁手打阿豪。
其實姐夫對阿豪嘅怨恨唔係一朝一夕，佢覺得名義上雖然係老婆個細佬，但畢竟已經四十幾歲人，由青年軍足球夢碎開始，直到而家都冇再搵嘢做，已經失業廿幾年，淨係識得問屋企攞錢，儘管金額唔係多，但係姐夫依然認為阿豪好廢，特別係曾經發現老婆會私底下畀幾千蚊細佬做零用嗰陣。
佢姐夫、佢家姐、我，仲有幾個中學同事，喺過往嘅日子都曾經介紹工作畀阿豪，可惜無論咩工佢都唔肯做，我嗰次算最成功，介紹咗份餐廳外賣員畀阿豪（當時都仲未興FoodPanda同Deliveroo），佢有去見工，相熟老闆仲諗都唔諗就請咗，非常幫忙，點知阿豪做咗一個鐘就自己返咗屋企。
當日佢爸爸打畀我：「喂，阿豪返咗嚟呀，佢連人哋叫嗰份外賣都拎埋返嚟，話唔想做，而家點算？人哋會唔會告佢偷嘢㗎？」
我：「下，咁樣呀……得得得，我打去茶餐廳同個老闆講聲，我會賠返錢㗎喇，唔使擔心。」
睇得出，亦都聽得出，阿豪嘅父母喺呢十幾廿年真係好辛苦，好擔心，好傍偟，但係大家都束手無策。
阿豪家姐甚至帶咗佢去睇心理醫生，不過通通都唔work，情況仲好似愈嚟愈嚴重，特別係阿豪媽媽過身之後，我覺得佢有惡化跡象，自言自語同埋自己笑嘅頻率更多，喺屋邨內已經出晒名，或者呢種係阿豪掛住媽媽同埋傷心嘅表現，只係展現出嚟嘅姿態同情緒有別於常人。
嗰段時間我自己都辛苦，30歲之前冇份工做得長，跟住搵到份行街Sales，踏入跑數生涯，壓力大到爆燈，以為順風順水，又遇上公司結業，輾轉之下去咗間仆街公司，錢係搵到呀，但日日畀人鬧到隻狗咁，忍咗幾年谷鬼氣自己搞小生意，我唔應該用狗比喻自己，因為狗都比我過得舒服。
我的志願呢？做足球員做球星？諗起都得啖笑，生活嘅折磨已經夠疲累，唔好話踢波，我連咩英超咩世界盃都冇時間睇，大個咗之後我得一個志願，就係唔使捱窮唔使捱餓，發達唔需要喇，唯一嘅願望係想過得有尊嚴，唔使乞唔使借，搞得掂自己生活已經阿彌陀佛。
結果我真係冇捱窮，而家嘅生意唔算大，不過絕對養得起自己，扣埋公司嘅基本支出例如燈油火蠟同埋出糧，每月平平穩穩有六位數淨利潤，距離買大屋買靚車仲係好遠，但係我滿足喇，因為人生在世好多嘢冇得計算，有時機關算盡都係未如人意，唯有默默耕耘先至會有收穫，付出幾多得到幾多就冇可能㗎喇，電視劇先會有嘅情節，不過你肯付出100%，多多少少50%都可以收得返嘅。
已經有一個阿豪，咁你明白我睇住表弟為咗等政府工足足3年唔做嘢係幾炆憎啦！或者我以前人生經驗唔夠，加上前半段事業真係唔成功，算係大器晚成，所以當時唔識得點樣幫阿豪，如果廿幾年前我剷到阿豪上天花板，再唔係不顧兄弟反目都打佢一身，今日未必會睇住阿豪變成咁，我都唔知時光倒流救唔救到佢。
今時今日我唔會放過表弟，佢老豆老母都好驚訝點解我要咁嬲，其實我唔係嬲，我怕太遲就救唔返。
阿豪嘅問題係一直唔搵嘢做，冇辦法識到新朋友，個圈子好局限，完全同社會脫節，冇能力去適應同埋探索呢個世界，咁你就會好容易諗埋一邊，永永遠遠置身於死胡同裡面。
當時我覺得自己生活得似隻狗嘅日子，一樣係睇唔到將來，睇唔到希望，但原來一個人會喺跌跌撞撞中發現更多新事物同埋新機會，回頭再望，我喺失意同迷惘嘅時候累積咗好多經驗同智慧，有時唔一定要遇到貴人，就算你沿途遇到嘅係仆街，啲仆街一樣會教識你好多嘢，未見過人渣，第時點識得避開人渣呢！
《我的志願》係每個人讀書嗰陣都寫過嘅作文題目，相信十個人裡面，有八個都做唔到當時憧憬嘅職業，但係咁樣並不足以論成敗，人生有好多個階段，最緊要識得comeback，呢個係球類運動經常見到嘅術語，意思係逆轉勝。
我唔知道阿豪有冇comeback嘅一日，因為佢媽媽已經走咗，爸爸坐緊輪椅，據了解姐夫決心移民，換言之遲啲可能連家姐都唔喺香港，我有時都唔敢諗阿豪之後嘅日子會點過。（完）
今日情侶座都有新文章
恐怖的婚姻 － 「我阿媽有事，我都唔會畀你阿媽好過」
https://hkofficedaily.com/?p=21224