「我朋友公司請人喎，不如問下表弟有冇興趣啦，好過一年365日匿喺房打機吖嘛！」365日只係貪順口，其實表弟已經賦閑在家足足3年，計日數超過1,000日，除咗食飯會行出客廳之外，其餘時間都匿喺房打online game，係名符其實嘅隱青。
我重重複複問，姨媽亦重重複複講同一個答案：「冇啦，佢唔會做㗎喇，你表弟話淨係想做政府工，話公務員係鐵飯碗喎，唉，講極都唔聽。」每次聽到表弟非政府工不做，我就會無名火起，佢成26歲人，畢業後完全冇做過任何工作，政府職位一日唔取錄係咪打算喺間房裡面過世？
見到表弟就諗起阿豪，阿豪係我識於微時嘅朋友，小學就認識，而家我同佢都45歲喇，我哋唔止同校，細細個仲一齊住喺葵芳臨時房屋區，有人叫呢啲做安置區或臨屋區，遲出世嘅人可能未必知嗰度就係葵芳新都會廣場前身，我同阿豪喺呢個安置區長大，一齊返學，一齊踢波，一齊做功課。
阿豪細細個踢波已經好勁，喺街場鬥波輕鬆扭過晒啲哥哥同大人，雖然我完全冇天份，但係讀書作文寫《我的志願》嘅時候，其實都係同阿豪一樣寫住：我大個想做足球員！
小朋友係咁㗎啦！足球員、歌星、醫生、律師、工程師，呢堆永遠係《我的志願》嘅熱門，當時都唔知呢類工作實質上係點。
後來安置區嘅人都獲安排上樓，即係入住公共屋邨，當年好似有得揀青衣同埋荃灣呢類地區，我同阿豪屋企都揀咗青衣，大家仲要繼續住埋同一個屋邨，所以呢份友誼一直維繫到中學，再直到而家40幾歲人，望返轉頭咁就半世喇。
嗰陣未有咩DSE，我考完會考繼續升讀預科，再掹掹緊叫做讀到大學，而阿豪就喺中學畢業後投考職業足球隊嘅青年軍，當時香港出名嘅球隊有南華、愉園、麗新、星島，佢哋會定期舉辦一啲青年軍選拔，ICQ都未興嘅年代，真係要靠睇報紙先至知，仲要好似係《天天日報》，呢份報紙已經一早冇咗。
其實我有同阿豪一齊去考青年軍，不過同大部分冇天份，只係得一腔熱誠嘅後生仔一樣，落場踢咗陣已經畀啲教練叫走，反而阿豪憑住純熟嘅球技獲得青睞，真係考到入去，作為老友梗係替佢開心啦，而我內心係好失落㗎，諗起阿豪之後可以寓興趣於工作，日日「返工」就係踢波練波，的確相當羨慕。
我同阿豪嘅生活各有各苦，喺香港就算做職業足球員，其實人工都係好低，更何況係青年軍，只係佢鍾意又踢得開心，捱下餓都值得嘅，而我就繼續忙讀書，壓力亦都好大，仲要前路茫茫唔知自己可以做啲乜，坦白講，大家都係安置區再搬去公屋，屋企環境好得去邊吖。
可惜嘅係，我未讀完書已經見到阿豪失業，由於已經係廿幾年前嘅事，細節唔係好記得，只係知道當時阿豪畀教練忽視，喺青年軍投閑置散，更加冇晉升成為一隊球員嘅機會，某日我聽到阿豪媽媽話個仔被解約，返到屋企後一言不發好唔開心，又唔搵其他工作，全日就宅在家乜都唔做。
大學嗰幾年我好忙，只能夠間中探望阿豪，但發覺佢性情大變，成日自言自語，個人已經頹到無可再頹，年紀輕輕嘅我除咗得閒陪佢之外，根本唔知可以點樣幫，輾轉間我又畢業要出嚟社會搵嘢做，人浮於事，冇份工做得長，前路茫茫自己都搞唔掂。
阿豪嘅狀況比我更差，因為佢冇再搵其他工作，終日在家又識唔到新朋友，之後幾年唔止性格上有大轉變，連外表都唔同咗好多，一個咁熱愛運動嘅人由於完全冇郁動，阿豪變到好肥，塊面成日生大膿瘡，我都唔知係咩嚟，好咗又生，生完慢慢好，跟住又生，阿豪成個人已經肥腫難分。
冇工作，自然就要攤大手板問家人攞錢，佢又唔知點解唔食屋企嘢，一日三餐光顧屋邨嘅茶記，所以街坊都認得阿豪，其中一個原因係見親佢都自言自語同傻笑，我知道青年軍事件令佢受到好大打擊，但唔明點解會打擊到一個人變成咁。
嗰段時間阿豪嘅爸爸媽媽仲有佢家姐都軟硬兼施，鬧又鬧過，氹又氹過，阿豪始終冇改善，而且每個人都有自己嘅難處，例如佢家姐，結咗婚搬出去，除咗畀家用之外，仲要經常返嚟畀錢阿豪，一早聽聞個姐夫好唔滿意，至於阿豪嘅父母到咗退休年齡亦唔敢退落嚟，因為擔心個仔嘅生活。
阿豪媽媽其實有長期病患，但為咗屋企一日做兩份工，有時仲出去搵替工做，洗碗又返清潔又返，結果積勞成疾，有次喺工作場所暈倒，被送去醫院後再發現身體有其他問題，臥床一段時間後離開咗，我有去醫院探望，記得處於彌留狀態嘅伯母一直望住阿豪，好似冇意識，又好似有嘢想講，或者就係唔放心呢個仔。
由細識到大，我父母同阿豪一家都好熟，所以有份出席喪禮。喺喪禮上好多親戚朋友都哭成淚人，但我見到阿豪喺一邊傻笑，佢姐夫都察覺到，仲幾乎想喺靈堂打阿豪。（未完待續）