點解要用呢啲手段呃我結婚?

最近知道咗我老婆講大話,個心好唔舒服,試過同朋友傾,佢哋覺得唔係咩咁大件事,起碼唔係紅杏出牆,又或者投資失利要孭債,只係比我預期提早咗結婚,仲話唔結都結咗,唔好諗咁多,明白佢哋係想我心情平伏,但真係有條刺。

我同老婆未結婚前拍咗兩年拖,咁佢的確係我嘅結婚對象,問題係我經濟同心態上都未ready,有計劃儲多兩三年錢,亦已經實行緊,因為你買樓又好租樓又好,點都要有少少儲備先安心,之前單身寡仔就冇所謂啫,結咗婚就要考慮兩個人嘅生活,唔希望咁倉促。

至於心態方面,唔係未定性,而係仲需要一啲私人時間同埋空間,舉例未結婚之前我每晚都會打機打到凌晨,唔係話結咗婚唔得,不過做咗人老公,唔通晚晚丟低老婆叫佢瞓先咩,就算佢口口聲聲話冇所謂,我心理上都會種壓迫感。

而且我未習慣兩個人日日對住生活,唔係唔鍾意,喺現階段仲需要私人空間,我真係有晒心理準備兩三年後結婚就要一齊生活,不過你都畀少少緩衝期我吖。

點解突然又結咗婚呢,因為老婆當時同我講,佢個老豆,即係我而家個外父有絕症,醫生話有心理準備剩返一年命,其實外父望落真係唔似有不治之症,但係老婆嗰陣時叫我扮唔知,屋企人唔想提。

咁有絕症又點呢?佢話老豆好希望臨死之前可以睇到我哋結婚,了咗件心事先至走得安詳,老人家咁諗可以理解嘅,所以我冇考慮太多,真係抱住遲早都要結嘅心態,嗱嗱臨影結婚相註冊擺酒。

後來點解發現唔對路呢,結咗婚兩年幾喇喎,外父唔止生勾勾,仲要健康過我,聲如洪鐘,上年我已經確診過兩次,外父咩事都冇,仲同班老友記周圍去行山,老虎都可以打死幾隻,咁我除咗覺得奇怪之外,都真係擔心外父嘅,終於搵到次機會單獨問佢。

我:「阿爸,最近身體幾好嘛?」因為我會叫外父做阿爸。

「幾好呀,做乜咁問?」

我:「因為之前聽阿瀅講你身體有啲事。」

「咩事呀?我冇事呀!」

我:「唔係喎阿爸,唔好死頂喎,有咩事講出嚟,我一定幫你。」

「有咩事呀?幫咩呀?」

我:「阿瀅話你有絕症,之前仲擔心你會捱唔到,所以我哋嗰陣先至咁急結婚。」

「痴線!我自己有絕症我會唔知?」

當時我已經好嬲,以為外父會同我聯手鬧爆老婆,竟然咒個老豆有絕症咁忤逆,點知外父好快就冷靜咗。

「個傻女應該係想早啲同你結婚啫。」

我:「點可以用老人家有絕症嚟開玩笑㗎!」

「算啦,我咪生勾勾喺度,冇事,最緊要你兩個開心。」

明既,始終嗰個係你個女,禮金你又收埋喇,睇怕都用晒啦,仲有咩好怪吖。

當晚我已經直接同老婆開波,佢亦都直認不諱,仲好惡添,發晒爛渣話我先係始作俑者,因為一直唔肯結婚,我再解釋一次唔係唔結,而係想經濟同埋心態上都準備好啲先,點解要出埋啲咁低嘅招數去加速個婚期呢?我哋兩公婆而家仲冷戰緊,全日喺屋企可以完全唔講嘢。

冇錯,遲又要結早又要結,但係枕邊人向你講個咁大嘅大話,有時真係愈諗愈恐怖,有冇聽過狼來了?你叫我以後點信你,我嘅著眼點唔係早咗結婚,而係兩個人一齊竟然要用到計謀,我真係唔可以釋懷。

error: