Interview嘅時候因為老細唔喺公司，所以唔知道呢度有幾個保鑣長駐，否則見到咁怪嘅情景我應該會考慮下先決定嚟唔嚟做，因為office有幾個神高神大兼一致著黑西裝嘅人行嚟行去，個樣又好似死老豆嘅嚴肅，感覺真係唔自在，同埋會成日諗係咪有人嚟搞事，如果唔係都唔需要保鑣啦！
其實呢度好多同事都慣咗，係間唔中會私下投訴兩句，佢哋覺得呢幾個保鑣冇禮貌，除咗對住老細之外，對其他人係連打招呼都唔應，又會上下打量你，男女同事都打量，好似驚你會密謀襲擊老細，仲成日阻住條路，我諗佢哋應該係有企位同陣法。
「痴線，頭先老細去pantry，兩個保鑣一前一後夾住，成6呎高阻住門口，我想入去斟杯水都行唔到，講唔該借借又冇反應。」
「冇反應算客氣，噚日我去廁所，有個保鑣守喺門口，叫我等老細出嚟先去，我急到瀨咁滯，屙篤尿啫，係咪驚我收埋把刀入去行刺老細呀？」
以上都係成日喺office聽到嘅同事投訴，我研究過，一共有5個保鑣，但只會有3至4個同時出現喺公司，相信係輪休，著住西裝都睇得出好大隻，其中一個細粒啲（可能先係最好打），其他幾個就6呎咁上下。
返工第一日已經問咗同事咩料，佢哋話老細出面有好多生意，聽講其中一檔嘢同個partner反目，老細拎晒啲資料去ICAC篤灰告人，但係告唔入，而家檔嘢冇咗，但個partner有黑社會背景，仲恐嚇會搵人斬佢，自此公司就有幾個保鑣長駐，出出入入全程跟住，去pantry又跟，去廁所又跟，連公司有訪客都要經保鑣過一過目。
聽佢哋講，我未入嚟做之前公司曾經畀人淋紅油，係朝早receptionist第一個返嚟嘅時候發現，所以有啲同事其實好驚，男嘅驚點錯相，女嘅驚畀人淋鏹水，只係而家距離淋紅油事件已經接近半年，好似又冇乜嘢發生，大家個心先至定返。
如果office咁多人都要保鑣貼身保護，相信老細嘅日常生活都係差唔多，我呢啲小職員當然唔知仲有冇內情啦，不過有時見到啲保鑣夾住佢行，唔知點解會諗起《千王之王2000》入面，周星馳身邊嘅兩大護法基哥同埋志雄哥，當然仲有八兩金飾演嘅聾五啦，因為同事話老細幾個保鑣打招呼都唔應，仲唔係聾嘅？
不過講真吖，喺公司做嘢有幾個保鑣長期望實，間唔中仲會行嚟行去巡邏，真心幾唔聚財，好似細個考試啲老師周圍巡睇你有冇出貓咁，唔知呢個情況仲要持續幾耐呢？可能係疫情關係，求職網最近都冇乜新工，如果遲啲回復正常，我會考慮下轉工，咁嘅工作環境真係令人精神緊張。（完）
❤️今日情侶座都有新文章
訛稱外父有絕症
點解要用呢啲手段呃我結婚？
https://hkofficedaily.com/?p=21172