早兩日喺街撞返個舊同事，佢好大聲咁叫我：「Paul！去邊呀？」嗰種大聲嘅程度係成條街嘅人都擰晒過嚟，我個心都震晒，果然係阿泉，佢係我舊公司嘅倉務，好想叫佢細聲啲，但係醒起阿泉份人不嬲都係咁，以前已經好粗魯好嘈。
「喂，好耐冇見喇，戴住口罩都認得我？」大家其實已經好多年冇見，嗰陣喺長沙灣一棟工廠大廈返工，同佢做咗足足兩年同事，感情都幾好㗎，可能公司唔大，連埋倉都冇10個人，當時朝見口晚見面咩都傾一餐，兩條麻甩佬仲日日一齊放工。
呢間舊公司令我印象深刻，因為佢置身喺房委會嘅舊式工廠大廈，有條長走廊好開揚好似公屋嗰種，得幾層高，咁呢棟工廈裡面有唔少傳統公司，當中有間紙紮廠，真係做紙紮用品再批出去畀街舖嗰種，雖然唔係同一層，但係人哋有時出貨嘅時候，上上落落無可避免會見到。
有次日光日白我嚇到標冷汗，個場景到而家仲記得，因為我行出走廊嘅時候，見到有對紙紮公仔凌空喺出面，講緊唔知5樓定6樓咁上下高喎，喺走廊外凌空仲要識郁，我同另外一個同事都「嘩」咗一聲，真係以為自己時運低。
再睇清楚啲，我諗間紙紮廠應該喺另外一層仲有公司或者倉，佢哋直接將對紙紮公仔喺走廊釣住畀樓下，即係好似你釣魚放餌落去咁呀，問題佢唔係魚餌，係一男一女嘅紙紮公仔喺空中飄浮，睇真啲先見到樓下有人伸隻手去收貨。
雖然當場已經搞清楚唔係撞鬼，不過諗起呢一幕都會驚，有時仲會見到奈何橋呢……所以我同另外幾位同事都唔敢OT，就算嗰日放工約咗friend未夠鐘，都寧願出條街周圍逛好過留喺公司，天黑仲驚呀！有時又會疑心生暗鬼呢，見到啲影呀，聽到啲聲呀，喺咁嘅環境之下難免會胡思亂想。
直至老細請咗阿泉呢個倉務，我覺得公司陽氣大咗好多，因為呢條老粗真係好嘈，講嘢又大聲，成個黑社會咁，不過佢份人係善良嘅，只係生得凶神惡煞，唔知點解有佢喺度個心都定啲。
阿泉嚟咗之後，有時我都會OT，當然視乎阿泉收工未啦，有次同佢一齊離開，當時已經係8點，天都黑晒，但我又真係好急，棟工廠大廈個廁所本身都夠晒恐怖，可能有返咁上下樓齡，又冇人翻新同修葺，廁所幅牆有啲瓷磚直頭碎咗跌晒落地，啲管又生銹，個feel幾頹垣敗瓦，加埋同一棟有紙紮廠嘅心理壓力，真係驚㗎！
嗰次我直接同阿泉講：「好急尿呀，陪我去埋廁所先吖！」
阿泉：「好呀，我都想去，我都驚！」
我：「你驚鬼怪嘢㗎咩，唔似喎！其實你喺度我先敢OT咋！」
阿泉：「梗係驚啦，我都係見你OT我先OT咋，頭先你執嘢，我咪執嘢囉！你有冇見過對面啲紙紮公仔吊落嚟？」
我：「點會未見過呀，初初以為撞鬼呀！」
阿泉：「係囉！我都係用粗口壯膽咋，如果行去啲陰暗位咪屌咗先囉！人哋話講粗口可以壓場，有個氣燄，一陣去廁所屌畀你睇。」
我：「廁所真係要呀，成個廢墟咁。」
老粗真係老粗，阿泉行到廁所門口唔係用手推門，佢係一腳大大力踢落度門，然後好大聲：「屌！」真係好有氣勢，點知我哋聽到廁所入面有人大嗌：「嘩！邊個？」跟住再聽到有人跌電話落地下嘅聲，我同阿泉廁所都冇去，擰轉頭就跑走。
阿泉一路跑一路問我：「人定鬼呀？」
我：「認得把聲好似係老細。」
阿泉：「好似係喎，我記得佢未走。」
我哋兩個又驚又笑，最後都冇去到廁所，第二日返嚟老細周圍問事前一晚有冇放工去過廁所，我梗係唔認啦，阿泉仲要扮冇事：「做咩呀？喺廁所唔見嘢呀？」
老細：「痴線㗎，噚晚唔知邊條仆街大力踢廁所門講粗口，嚇到我成部電話跌咗落地，mon都爆埋，畀我知係邊個佢就死！」
好在忍到笑，呢單嘢太過深刻，所以喺街撞返阿泉好自然又傾返，舊公司都搬咗喇，話時話，唔知嗰棟工廠大廈係咪拆咗呢，諗諗下都幾懷念。