《同事的明星女友》2 再努力 收入仍差一截

你話我未見過世面都好啦,行入名店嘅感覺真係周身唔舒服,職責所在要睇實你嘅Sales、俗不可耐嘅燈光同環境、千篇一律又完全欠缺功能性嘅手袋,仲有為數不多又完全冇款嘅時裝,行UNIQLO好過啦,起碼自在啲吖嘛。

Terence拎部電話出嚟畀Sales睇一幅截圖,原來佢想買對Hermès長靴畀Hailey,Sales姐姐表示冇貨,咁排waiting list得唔得呢?睇表情同語氣似乎好渺茫喇,然後Terence就show咗另一幅圖出嚟,今次係個袋,Sales姐姐keep住微笑同埋禮貌表示冇,跟手介紹另一個袋畀Terence,但款式差好遠,所以最後咩都買唔到,我哋三個去咗海港城食飯。

我:「Hailey要你送Hermès咩?」

Terence:「佢冇叫,係我想畀驚喜佢啫,Hailey唔係追求名牌嘅人,佢而家拍節目嗰度有兩個比較friend嘅女仔都買咗,仲叫佢一齊買,話嗰對長靴着得對腳好瘦,影相好靚,咁Hailey唔識吖嘛,我哋咪一齊爬文同睇YouTube研究囉!最痴線係有啲你噏唔出名嘅電視台姐仔都買到成屋名牌仲show晒出嚟。」

Emily:「Hermès唔係你話買邊款就邊款㗎,YouTuber同雜誌介紹嗰啲一定受歡迎,就咁去門市唔會搵到,明星同闊太去Hermès都要睇返佢哋之前買咗幾多嘢,Sales至會幫佢哋留貨,仲要等一年半載先有得攞,有貨亦唔代表係你想要嘅顏色同款。」

我:「吓?真金白銀畀錢買㗎喎,又要買好多嘢先肯留其他貨,留完又唔係嗰隻色?搵鬼買呀?」

Emily:「大把人買,如果你係熟客,Sales會叫你入private room睇袋,雖然你要白色,佢畀紅色,但一樣好多人爭住買,唔信自己去睇片做功課啦!」

Terence:「其實我同Hailey上網睇都知道少少,你當係潛規則啦,消費滿一個金額,Sales先會offer個袋畀你買,有啲人為咗要留個袋,夾硬又買啲錶同埋衫,所以你上Carousell好多人放Hermès啲飾物之類,個價會平過張單嘅真實銀碼,因為人哋唔係真心想要啲accessories,純粹想湊夠個消費額。」

我:「咁唔得喎,去消費者委員會啦!有袋唔畀人買,係要人買埋其他嘢先得。」

Emily:「唔好咁天真啦,Sales唔會講出口㗎,買開嘅人就會明。」

名牌奢侈品嘅世界對我嚟講太複雜,突然覺得買件波衫幾百蚊,就算係球員落場版都係千幾蚊真係好抵,起碼唔使夾硬買對曼聯襪同埋阿仙奴波褲先有資格買件車路士主場波衫。

緊接落嚟嘅日子Terence好努力工作,佢曾經through獵頭搵到一個更好嘅offer,不過遞信嘅時候畀老細挽留,人工加到同新公司睇齊,成件事變咗跳草裙舞咁,無所謂啦,最緊要都係份糧豐厚咗啫。

當時三十歲未夠嘅Terence人工已經有3萬幾,但對比起演藝事業如日方中嘅Hailey仍然差一截。

Terence:「原來Hailey喺social media出一個post已經有我一個月人工,佢一個月仲要唔止一個廣告,仲未計嗰啲商場show同埋拍片嘅job,Yeah!我距離食軟飯又邁進一大步喇!」

因為我太熟悉Terence,佢咁講絕對冇葡萄女朋友嘅成份,反而係誠惶誠恐,收入同另一半相差太遠,對男人嚟講始終有啲唔知點嘅感覺,問題係就算Terence幾努力都好,呢個距離喺短期內都唔會收窄。

以往如果Terence揸車返工,即係代表佢嗰日約咗Hailey,但係佢架車已經好耐冇揸過,有時一個月一次,有時個半月一次,有時兩個月一次。

Terence成日同我講Hailey拍嘢好辛苦,捱更抵夜,佢又唔敢煩住對方,更加唔想問一啲好行外嘅低能問題,兩個人嘅溝通愈嚟愈少,佢話最近一次見到Hailey係喺螢幕上面,睇住自己女朋友同一位男演員嘅接吻戲。

我:「我噚晚都有睇喎,嗰個男一出晒名係大滾友,有冇叫Hailey小心啲呀?」

Terence:「唔會講啲咁幼稚嘅嘢啦!佢嘅工作嚟㗎嘛!不過最搞嘢係我阿爸阿媽一路睇一路鬧,因為我冇帶過Hailey返屋企,佢哋都唔知我有個做artist嘅女朋友,咁都好嘅,唔使交代,又冇咁尷尬。」

我:「唔知佢係你女朋友咁鬧咩呀?」

Terence:「佢哋話個女仔嘅樣擺明係狐狸精喎,一睇就知唔係好人,啲老人家係咁㗎喇,睇劇睇到代入晒,溏心風暴嗰陣佢哋都好憎關菊英㗎!」

曾經諗過將來Terence點樣帶Hailey返屋企介紹呢?老一輩父母始終守舊,會唔會因為見過新抱咀另一個男人而耿耿於懷呢?原來我嘅擔心係多餘,因為根本冇呢一日,Terence同Hailey嘅圈子實在係兩個世界,雖然大家都鍾意對方,但始終難逃漸行漸遠嘅命運,只係估唔到提出分手嘅係Terence,人生第一次有個男人對住我喊到肝腸寸斷。

(未完待續)

《同事的明星女友》1 從素人開始認識
https://hkofficedaily.com/?p=19183

《同事的明星女友》2 再努力 收入仍差一截
https://hkofficedaily.com/?p=19190

《同事的明星女友》完 有啲嘢由自己講冇咁尷尬
https://hkofficedaily.com/?p=19197

error: