《同事的明星女友》完 有啲嘢由自己講冇咁尷尬

Terence叫我同Emily一齊去食Hailey嘅生日飯,最初我係say no,你女友生日喎大哥,梗係靜靜地撐枱腳啦,搵兩個電燈膽出嚟做咩呀?

Terence:「Hailey諗咗好耐㗎喇,太多人嘅地方又唔係咁好,加上佢公司希望拍拖都低調啲,結果我同佢一齊搵咗間比較grand嘅餐廳,不過我反覆諗過都係唔安全,所以咪想你同Emily一齊嚟囉,畀人影到都係一班朋友咁吖嘛,食完之後我就會車Hailey去兜風,到時先至二人世界喺架車度食蛋糕。」

我:「唓,以為咁好死叫埋我同Emily,原來想餐飯有男有女,比狗仔隊影到都冇咁大鑊,好啦,一世人兩兄弟。」

Terence:「我仲買咗個袋畀Hailey,希望佢鍾意啦!」

我:「Hermès呀?」

Terence:「唔係,早排見佢出席另一個牌子嘅活動,見佢做model孭上身好靚,我咪照住買囉。」

有個明星女朋友(或者男朋友)原來喺生活上會遇到幾多問題,除非兩個人都有自己個竇啦,咁樣應該會好啲,仲有送禮物方面都真係要費煞思量。

嗰餐生日飯喺一間高級餐廳食,貴係貴,不過總算換到一啲空間,埋單嘅時候我同Emily都好識做,自己出返自己嗰份之餘,仲堅持一齊出錢請壽星女Hailey,點知最後一蚊都唔使畀,因為有條西裝友行埋嚟同Hailey打招呼,原來對方係唔知邊個brand嘅高層,早排先搵Hailey拍咗個廣告,佢成張單幫我哋埋咗,傾咗兩句知道係慶祝Hailey生日之後,仲即刻叫餐廳送上蛋糕。

唔知係咪喺娛樂圈浸淫咗一段日子,我覺得Hailey無論對我哋定係對條西裝友都表現得成熟大方,同第一次喺方榮記見佢嘅感覺差好遠,不過呢啲改變都係好嘅,多咗一道氣場,好淡定。

飯後依照原訂計劃,我同Emily走先,唔阻佢哋遊車河,雖然唔知佢兩個仲食唔食得落第二個蛋糕,不過Terence第二日就話覺得好尷尬。

我:「因為有個高層咁嘅物體走嚟埋單兼請食蛋糕?」

Terence:「唔係,可能你冇為意,我咪話買咗個袋畀Hailey嘅,噚晚佢就係孭住同一個,原來嗰個品牌當日有送畀Hailey,唔使錢㗎!等我都學人用Carousell放返出去先,哈哈!」

雖然用笑聲結尾,但係聽得出Terence喺各個範疇都有種迷失同埋唔知點做嘅感覺,出街嘅地點、生活嘅圈子、對方工作嘅認知、時間上嘅分配…等等,所有嘢都好似唔係咩大問題,但又的確有問題,嗰晚佢兩個遊車河之後,原來已經一個星期冇通電話,更遑論見面拍拖。

Terence坦言,見到另一半喺螢幕上同男演員卿卿我我會不是味兒,而Hailey亦都承認有人追,雖然冇接受,但追求者唔係啲有錢仔就係大家都識得嘅男藝人,Terence話自己壓力好大,再加上雙方愈嚟愈少溝通,呢段感情似乎已經見唔到將來。

隔咗一排,我同Terence兩條麻甩佬放工去Happy Hour,佢忽然同我講已經分手。

我:「Hailey提出?」

Terence:「我提出,之前已經講過,但Hailey唔肯,今次我好堅決。」

我:「Hailey都覺得冇問題,咁你點解要講分手啫?」

Terence:「我自卑,唔想佢難做,點講呢,打個比喻,我怕人哋話我醜,所以我會自己話自己醜,我怕人哋話我窮,所以我會自己話自己窮,有啲嘢由人哋把口講出嚟會好難承受,自己講出嚟就冇咁尷尬,你明唔明我講乜?」

明啲唔明啲啦,都唔得閒消化喇,因為我見到Terence眼濕濕,佢覺得阻住個女朋友發展,又覺得以Hailey嘅條件可以搵到一個更加愛佢,更加畀到幸福佢嘅人,酒過三巡,男人老狗仲要流馬尿,真係好Sorry,我唔識點安慰,當時仲好怕畀人見到有個麻甩佬喺隔籬喊,畀人誤會我同佢咩咩就唔係幾好啦!

完全明白Terence嘅心情,作為男朋友,當然想另一半嘅事業愈嚟愈好,入得娛樂圈如果唔可以大紅大紫,最好就冇人認得,因為有咩事再出去搵嘢做都冇人識吖嘛,半紅不黑就最慘,所以見到Hailey咁爭氣,Terence係好開心,但生活中有好多現實同埋細緻嘅問題真係冇辦法解決,當然佢可以擺喺度唔理,不過長遠都要面對。

又或者咁講,Terence嘅決定亦都有少少自私成份,佢真係承受唔到同明星一齊嗰種不為人知嘅壓力。

和平分手之後,Hailey嘅演藝之路發展得好順利,Terence事隔兩年後亦都再同另外一個女仔拍拖,最好笑係佢女朋友都鍾意Hailey,雖然稱唔上係fans,但就多次讚過呢位女明星好靚,又話佢著衫好睇。

我:「你有冇同佢講過?」

Terence:「有次見佢loop IG走去like Hailey啲post,我話呢個係我前女友,然後佢叫我食屎。」

我:「佢唔信呀?」

Terence:「正常都唔信啦,佢仲串返我,話自己係古天樂個ex,咁唔通我show返以前同Hailey啲合照出嚟證明咩,無謂啦!」

咁又係,知道咗仲煩, 一陣係咁問以前啲嘢,仲要比較,真係唔知好過知,不過Terence同佢而家個女朋友都幾夾,唔止有共同話題,出街拍拖又輕鬆,佢放咗架車喇,因為女朋友話揸車泊車麻煩過搭巴士喎,有次Terence送咗個名牌袋畀女朋友,雖然收到嗰陣好感動,但係女朋友就哦足佢一個月,話唔需要咁貴買個袋,萬萬聲孭出街好驚刮花,結果大部分時間都係用返個平民手袋。

兩個人一齊如果有心發展,最緊要合拍同埋相處得舒服,對一世㗎嘛,而家見到Terence可以做自己,真心替佢高興,至於同Hailey嘅一段情其實曾經擁有已經無憾啦,呢啲經歷大把公子哥兒恨都恨唔到呀!

(完)


《同事的明星女友》1 從素人開始認識
https://hkofficedaily.com/?p=19183

《同事的明星女友》2 再努力 收入仍差一截
https://hkofficedaily.com/?p=19190

《同事的明星女友》完 有啲嘢由自己講冇咁尷尬
https://hkofficedaily.com/?p=19197

error: