受害者 (2) 對話紀錄還原真相

Mayanne走咗之後,Dorothy同Stephanie都有keep住update佢情況,亦有同返我哋講,office裡面嘅討論度好高,似乎唔少人都知道Hugo騷擾Mayanne嘅事。

Stephanie:「Mayanne問Hugo有冇請第二個女仔頂佢個位,擔心有其他人步佢後塵,我咪話佢囉,如果唔想有下一個受害者,佢應該挺身而出走去告Hugo吖嘛!」

我:「佢都挺身而出咗啦,結果點吖,老細咪又係炒佢。」

Stephanie:「咁又係,好肯定Hugo遲啲又請條女返嚟。」

我:「呢件事之後我愈嚟愈憎公司,老細竟然包庇個性騷擾下屬嘅高層。」

其實唔止我,好多女同事私底下傾開都覺得唔舒服,但職場始終係一個虛偽嘅地方,點唔鍾意個老細都好,唔會下下做到出晒面,唯獨是我阿姐Stephanie例外,佢份人太直喇,呢件事之後唔止行過會藐老細,對住Hugo更多次出現言語上嘅碰撞,啲語氣倔到呢,終於有一次出事炒大鑊。

嗰日朝早Hugo因為工作上嘅問題,直接走嚟我哋個部門搵Stephanie,我阿姐嘅反應係即時彈開。

Stephanie:「擺低啦!唔使行到咁埋講喎!」

Hugo:「我同你而家有幾個身位喎,使唔使咁講嘢呀?」

Stephanie:「梗係要,有咩打內線過嚟啦,唔得閒呀!」

Hugo:「其實我有咩得罪你呢?大家做嘢啫!內線講得到我就唔使行過嚟啦!」Hugo已經多次被我阿姐單單打打,今時今日先爆算係好好EQ㗎喇。

Stephanie:「你做過啲乜心知肚明啦!諗住炒咗Mayanne就冇人知呀?」

開火喇!佢兩個愈嘈愈大聲,office裡面好多同事已經望晒過嚟,Dorothy行埋嚟想做和事佬:「你哋唔好喺度嘈啦!」

不過太遲喇,老細喺房聽到之後走咗出嚟,個樣極度唔耐煩咁講:「你哋入我房,Dorothy你都一齊,Frankie、Jimmy、Eric,你哋都入埋嚟。」

Frankie、Jimmy、Eric係另外幾個department嘅阿頭,換言之所有部門主管一齊入晒老細房。

我哋小職員當然議論紛紛啦,有人估老細以正視聽怒炒Hugo,有人就估公司會落order唔畀員工再談論Mayanne事件,最震驚係有人覺得Stephanie會執包袱:「老細咁錫Hugo,邊個再嘈咪郁邊個囉!」

成班高層入咗老細房一個鐘,各同事就冇做嘢傾足一個鐘,佢哋「散會」出返嚟之後,全場即刻靜晒扮做嘢,只見Stephanie塊面紅晒,佢啲表情太易估喇,嗰個moment唔使問都知係好嬲好委屈。

我:「冇事吖嘛?」

Vienna:「炒你?一齊走囉,我唔會咁衰女一個人留低。」

Stephanie:「Mayanne呢個八婆死癲婆!」

突然間調轉槍頭嘅,咩事?

Stephanie :「原來Mayanne之前根本係同Hugo拍拖,之後分手,不過Mayanne唔肯放手。」

我:「Mayanne嬲Hugo玩佢?」

Stephanie :「Hugo玩佢?係Mayanne個死八婆玩我哋呀!記唔記得佢畀我哋睇過一張WhatsApp截圖?原來係cut頭cut尾㗎!」

Mayanne畀我哋睇嘅版本係Hugo堅持要返公司接佢,要買宵夜畀佢食,但實情係當時佢兩個鬧緊分手,Mayanne發脾氣講到要喺公司自殺,Hugo驚搞大件事所以焗住氹緊。

Stephanie喺房裡面提起呢件事先,結果Hugo成部手提電話遞畀大家睇,根據Stephanie描述,成個對話嘅完整版本係咁:

Mayanne:「如果你一定要分手,我就死畀你睇,我仲喺office,死都死喺公司,遺書都寫埋,睇你點交代。」

Hugo:「點解要搞到咁呢?」

Mayanne:「咁點解你要分手?」

Hugo:「我咪講咗好多次囉,相處落發覺大家唔啱吖嘛,無謂勉強啦好冇?」

Mayanne:「得啦咁,我send個message畀老細,然後就死喺office畀你睇,好想知你以後仲點樣可以喺度返工!」

Hugo:「你唔好咁啦!而家都10點幾,你一個人留喺公司做咩呢?」

Mayanne:「你理得我啫!你都唔係我男朋友啦!」

然後Mayanne send咗張相畀Hugo,係手持一把界刀。

Hugo:「我而家返嚟公司接你吖!」

Mayanne:「唔使喇。」

Hugo:「你冷靜啲先啦!」

Mayanne:「點冷靜?你有關心過我咩?你淨係驚我死喺公司,會搞到你冇咗份工吖嘛,你有冇真正關心過我呀?你有冇理下我留到咁夜食咗飯未呀?」

Hugo:「咁你食咗飯未吖!」

Mayanne:「食咗又點,未食又點呀?」

Hugo:「我返嚟接咗你先講。」

Mayanne:「唔好喇,無謂麻煩你啦!」

Hugo:「唔緊要啦!想食啲咩?好多舖頭閂咗門,一係我買上嚟公司畀你食。」

Mayanne:「真係唔使呀!」

Hugo:「你唔好咁啦,我都係關心你啫,我而家出門,你等我。」

真係大開眼界,原來Mayanne截圖畀我哋睇嘅版本,係刪除咗前前後後同中間好多訊息,因此變咗另一個故事。唔理佢兩個點解分手都好,邊個對唔住邊個都好,Mayanne從中做咗咁多功夫同手腳,然後再向我哋唱衰Hugo,已經證明咗呢個女人好恐怖。

Vienna:「Hugo係咪吹水咋!」

Stephanie:「都話Hugo成個WhatsApp畀我哋睇咯,你唔可以喺舊對話中間加咁多嘢㗎,有晒時間,有晒兩個藍剔,個WhatsApp number係Mayanne嚟㗎,我都有Mayanne電話,一樣㗎!對話只可以刪除,唔可以返轉頭夾硬加喺中間,條八婆設晒局呀!你明唔明啫!」

我:「你唔使咁勞氣喎,我知Mayanne利用咗我哋嘅同情心同信任,但你都唔使咁嬲嘅。」

Stephanie:「唔嬲?Mayanne條死八婆話我係淫婦呀!」

Vienna:「點會呀?無啦啦做咩話你係淫婦?」

Stephanie:「呢啲全部係Hugo成個WhatsApp原汁原味嘅對話History,我唔想提,仲有你兩個呀,Mayanne話你兩個有性病,叫Hugo小心你哋呀!」

我:「我哋有性病?」

聲譽攸關,加上我哋同Mayanne無仇無怨,為咗了解件事,我同Vienna直接走去搵Hugo問清楚。

Vienna一行埋去Hugo個位就表明立場:「唔係想八卦,但你而家個msg係涉及我哋,點解佢要話我哋有性病?」

Hugo拎咗部電話出嚟,跟手打開WhatsApp,再去Mayanne嘅對話紀錄度search「性病」兩個字,隨即就搵到嗰段說話。

原來唔知邊一日,Mayanne見到Hugo同我同Vienna喺Pantry傾計,講真當時傾咩都唔記得喇,但Mayanne見我哋3個笑得好開心,所以佢呷醋同埋覺得唔好受,跟手send咗個msg叫Hugo檢點啲,仲話我同Vienna呢啲女仔一睇已經知唔係好人,話我哋好開放,周圍同男人講笑,又話我哋一定好放蕩,似落蘭桂芳玩one night stand,斷言我同Vienna有性病……

咁都得?

我:「嘩,呢條女真係好恐怖,其實你點解唔一早講出嚟啫,佢周圍唱你性騷擾,全公司啲女都怕咗你,你係受害者嚟㗎!」

Vienna:「係囉,你又未婚,佢又未嫁,就算拍拖再分手都可以畀人知啫。」

Hugo:「唉…唔好提。」

呢個時候Stephanie又走咗過嚟,佢同Hugo講:「喂,之前對唔住,誤會咗你,不過我愈諗愈嬲,一陣食lunch啦,我想搵律師樓告Mayanne個賤人誹謗,一齊傾下吖。」

Hugo:「玩到咁大?算啦!」

Stephanie:「算?我check晒誹謗定義,告得入㗎,起碼要呢條女上法庭上報紙,你就更加要告啦,佢同全公司唱你性騷擾喎,你知唔知呢度啲女個個當你變態佬咁睇呀?仲忍?反擊啦!」

(未完待續)



受害者 (1) 女同事被男上司騷擾再被炒
https://hkofficedaily.com/?p=18989

error: