兩年前，Mayanne畀咗一幅Whatsapp截圖我哋幾個女同事睇，內容仍然記得清楚。
Hugo：「我而家返嚟公司接你吖！」
Mayanne：「唔使喇。」
Hugo：「唔緊要啦！想食啲咩？好多舖頭閂咗門，一係我買上嚟公司畀你食。」
Mayanne：「真係唔使呀！」
Hugo：「你唔好咁啦，我都係關心你啫，我而家出門，你等我。」
仲有另外幾段對話截圖，內容大致係Hugo話好掛住Mayanne，仲有I Love You等等嘅示好說話，然後都會見到Mayanne答：我唔掛住你喎、我唔愛你呀、你唔好再msg我、麻煩講返公事……等等嘅回覆。
雖然Mayanne係隔籬team，同我哋唔算好熟，不過大家都係女人，聽佢訴說自己畀上司騷擾嘅經歷，仲畀埋WhatsApp截圖我哋睇，除咗嘩然之外，當然都不恥Hugo嘅所作所為。
我阿姐Stephanie最嬲：「痴線㗎！佢msg你嗰陣已經10點幾，叫你OT到咁夜，然後又借啲意要送你返屋企。」
另一位女同事Vienna：「佢騷擾咗你幾耐呀？」
Mayanne：「入嚟公司冇幾耐已經係咁。」
我：「除咗夾硬要接送你，佢有冇對你毛手毛腳之類？」
Mayanne露出難過又尷尬嘅表情，欲言又止。
Stephanie：「你講啦，或者我哋幫到你呢！」
Mayanne：「毛手毛腳就冇，但會講一啲好露骨嘅說話，例如話好鍾意睇我著絲襪，又問我個胸有幾大，仲話幻想到同我做會有幾舒服。」
Vienna：「你咁都忍？一係搵老細，一係直接告佢！」
Mayanne：「但我真係好需要呢份工㗎！所以就特登嚟搵Stephanie傾，想睇下有冇機會內部調嚟你哋呢組。」
Stephanie：「但我個department冇位，或者我同老細傾一傾。」
我：「淨係傾調組？之後仲要同一間公司做，你咁樣避Hugo唔係辦法喎，其實佢講嗰啲說話真係可以告性騷擾㗎，起碼你要考慮同老細講。」
Mayanne：「我知道，多謝你，我再諗下點做係最好。」
睇得出Mayanne嘅目的只係想內部調組，並冇用任何方式告發Hugo嘅意思，我哋都覺得好無奈，特別係我阿姐Stephanie，佢份人喜怒哀樂都擺上面，完全唔識做戲，自此之後每次見到Hugo都會怒睥，個人認為Hugo一定feel到Stephanie好唔妥佢。
可能係走投無路嘅緣故，Mayanne搵埋另一組嘅Team Head求救，嗰個department嘅阿姐Dorothy都有搵Stephanie傾，但由於大家嘅部門都冇吉位，所以佢哋曾經提議搵其他組幫忙，不過就發現Mayanne比較抗拒跟男性嘅department head，似乎係見過鬼都怕黑。
我：「換轉係我都會啦，何況Hugo同其他男department head比較熟，一陣講出嚟隨時畀Hugo公報私仇，而且性騷擾呢啲嘢，向其他男人講係好難啟齒，佢搵返我哋班女人求救都好正路。」
Stephanie：「我覺得Mayanne太怕事，冇理由為咗份工而啞忍，我同Dorothy傾緊好唔好私底下搵老細講晒成件事出嚟，公司有個男上司性騷擾女下屬喎，根本就唔應該留個咁嘅人喺度。」
我：「都係嘅，Hugo今日嘅target係Mayanne，難保第日唔係另一位女同事，而且Mayanne如果調組，之後一樣要請新人，到時又請新女同事返嚟，性騷擾事件隨時不斷重演，我哋知情不報隨時害埋其他人。」
Stephanie：「啱呀！我一陣同Mayanne傾多次，我會勸服佢同老細講，唔受理先再傾傾要唔要報警。」
一切都未嚟得切，當日下午已經見到Mayanne入咗老細房，隔多陣Hugo都入埋去，唔通佢真係諗通咗要舉報？
我哋組同埋Dorothy嗰team都留意到呢個情況，一見到Mayanne出嚟，Stephanie已經打內線去問，結果……
Stephanie：「炒咗你？」跟住見到Stephanie沉默咗一陣，再講多句：「好，之後先講，你晏啲WhatsApp我吖。」
我：「發生咩事呀？」
Stephanie：「老細幫Hugo，叫Mayanne即時執嘢走。」
我：「有冇搞錯呀！」
Stephanie：「佢喊晒咁，畀佢靜下先，晏啲我再了解下。」
場面真係好似電視劇一樣，全部同事都見到Mayanne拎住個紙皮箱離開，Office裡面亦開始議論紛紛。（未完待續）