Mayanne係兩年前入嚟呢間公司做，過咗半年就同Hugo拍拖，但唔夠半年散咗，換言之佢兩個之後嘅時間仲要對住做同事，諗起都尷尬。
Hugo一直唔公開係因為上司同下屬拍拖唔係咩威水事，先唔理老細點睇，其他同事都一定多說話，但佢唔係想一世收埋，只係希望雙方關係穩定啲先，點知拍拍下發覺唔對路。
Hugo：「Mayanne妒忌心好重，疑心好大，控制欲好強，記唔記得有一次公司食飯佢嬲爆爆自己走先？」
Stephanie：「記得，佢話唔舒服吖嘛。」
Hugo：「因為嗰餐飯你同我傾偈講笑，佢話我周圍溝女，又話你發姣，基本上我喺公司同任何一個女性講嘢，無論係公事定係普通吹水，之後梗有好多說話聽，而且係好難聽嘅說話，例如話你係淫婦，話Vienna佢哋有性病，話Dorothy水性楊花，當然有話我係賤男同埋大滾友，拍拖都一陣已經咁樣，我頂唔順。」
我：「唔好介意，其實我覺得你好驚Mayanne，係咪有咩把柄喺佢手？你欠Mayanne錢咩？」
Hugo：「我哋之間從來冇錢銀瓜葛。」
Vienna：「你有裸照喺佢手？」
Hugo：「痴線，梗係冇。」
Stephanie：「咁你驚乜嘢啫，好似好忌佢咁，Mayanne都周圍唱你性騷擾啦！你使畀面佢！」
Hugo：「我畀你哋任何一個人更加憎Mayanne，諗起佢都會發惡夢，唔怕老實講，我一早搵過律師，只係相識一場唔想搞到咁大。」
原來Mayanne嘅恐怖之處係會搞佢身邊嘅人，Hugo話而家唔係好敢喺Facebook同ig post任何嘢，因為Mayanne會研究有邊個留言同埋like post，甚至會私底下contact呢啲人。
Hugo：「最難忍係佢騷擾我身邊啲人，我曾經問過律師可唔可以告佢滋擾。」
我：「其實可以，任何人透過書面文字或者說話，發佈惡意言論去損害另一個人嘅聲譽，總之係惡意中傷或者誣蔑他人，即屬誹謗，佢話我有性病吖嘛，我好記仇，因為係Mayanne同你講，咁如果由我嚟告咪得囉！」
Vienna：「嘩，你讀Law㗎？」
我：「知道Mayanne話我有性病之後真係好嬲，我有個friend喺律師樓做，打去問咗好多意見。」
Stephanie：「Mayanne佢放唔低呢段感情，不過用咗最差嘅處理手法，你係咪冇同人講清楚，唔湯唔水呀！」
Hugo：「我唔止講得好清楚，仲用咗唔同嘅語氣去講，最初分手我不斷安慰同解釋，但你都見過嗰段對話啦，佢威脅我吖嘛！之後我畀佢煩到成個人好躁，所以曾經用好嚴重嘅語氣再講一次，強調唔鍾意佢，大家都係成年人，冇拖冇欠點解唔可以好嚟好去，跟住佢發晒爛渣鬧我，都好啦，反面都唔錯吖，唔使再纏繞落去吖嘛！」
我：「咁咪得囉！」
Hugo：「跟住過咗一日佢好似失憶咁，話好掛住我，結果所有爭拗又從頭loop一次，正確嚟講係loop無限次，我真係冇好日子過。其實我哋根本就唔適合對方，我同佢一齊好辛苦，好大壓力，好唔舒服，分手已經講得清清楚楚，但呢一年幾以嚟佢都唔放過我，而且用嘅方法好極端，佢仲試過打畀公司裡面同我比較熟嘅男同事，不斷打聽我嘅嘢，啲男同事覺得奇怪咪走嚟問我咩事囉，真係好尷尬，我受唔住呀！」
有冇睇過《大時代》？劇裡面鄭少秋好鍾意藍潔瑛，但佢纏住藍潔瑛嘅方法係要迫到對方抖唔到氣，總之佢鍾意你，你就一定要鍾意佢，當年我睇《大時代》覺得好恐佈，不過又認為現實中唔會有咁痴線嘅人，點知原來真係有。
Stephanie：「睇你以後仲敢唔敢搞辦公室戀情！」
Hugo：「唔係單單辦公室戀情，我覺得拍拖真係唔可以亂嚟，其實一個人唔可怕，揀錯人先至最可怕 。」
最好笑係，Mayanne未知道Hugo已經將成件事和盤托出，所以隔咗幾日仲搵Stephanie，目的係打聽Hugo有冇請新女同事返嚟。
雖然Mayanne係用WhatsApp send文字過嚟，但Stephanie就選擇用voice msg回覆：「 你問我做咩啫，我係淫婦吖嘛，你係咪咁講過呀？好心你放手啦！大人大姐成熟啲，唔好搞咁多嘢喇！」
點估到Mayanne不失霸氣係要執返個尾彩，聽完msg又回一句：「我問下Hugo請咗咩人咋喎！你有咩資格叫我成熟啲？你根本一早鍾意Hugo，你知唔知羞恥呀！」
只見Stephanie笑笑口講咗句：「唔係佢又send msg嚟，我都差啲唔記得block呢個人。」
我：「你竟然冇扯火？」
Stephanie：「你唔覺得Mayanne呢種性格好可憐咩？終於都明咩叫可憐之人必有可恨之處。」
其實我仍然保留法律追究權利，已經問咗Hugo拎Mayanne話我有性病嘅WhatsApp截圖，告唔告到佢誹謗都好，就算最終刑罰幾輕都好，我都想Mayanne受到教訓，佢同Hugo嘅恩恩怨怨我唔想理，但你咁大個人講嘢唔該用下腦同埋負責任。
分手，唔一定要傷害對方，更加冇必要騷擾埋對方身邊嘅人，你愈係咁做，就更加顯得同你分手係正確決定。
（完）
受害者 (1) 女同事被男上司騷擾再被炒
https://hkofficedaily.com/?p=18989
受害者 (2) 對話紀錄還原真相
https://hkofficedaily.com/?p=18997